ISAIA 15 - PATHIAN LEKHABU IRTHIANG C.L. Bible (BSI)

Pathianin Moab insiat a ti

¹ Moab chungthu chu zân khat sûngin Ar khua soisakin a oma, Moab chu a dok taa, zân khat sûngin Kir khua khom soisak a nia, Moab chu a dok nôk ta.

² Dibon mihai chu Pathian biakna hmun irsânga chap hrangin an fea, Moab mihai chu an lu an ep inkola, hnermul an voipaia, Nebo le Medeba khua an irzuk nôk tâk a ni.

³ Kholâi dunghaia bora puan silin in sûnga le kholâi dunghaia khom milung hoiloi takin an chapa.

⁴ Hesbon le Elealeh mihai irtha’nvâiin an khêka, Jahaz ata an hong inhriat thei a ni. Moab sipaihai khom, phûkinthingin an khêka, an zâm a’rzal ta.

⁵ Moab hai sikin ki milung a na tâka, Zoar le Eglath-Selesia hai tenin, râl chiin an intâna, senkhathai chu Luhit tunga khan chap pumin an fea, senkhat chu Horonaim tiang an fea, chardong takin an chapa.

⁶ Nimrim tui a kang tâka, pârhai chu a chuaia, a cher tharhai khom ite thil hring om thei ta maka.

⁷ Khasikin an sum la neisun sunhai leh Phoram vadung râla fe ta an ti.

⁸ Khêk irhâi Moab le ramrihai khan a oma, an ikhêk irhâi inring chu Eglaim khuahai inhriat thei a ni; an irhâi inringhai chu Berelim khua dênin inhriat thei a ni.

⁹ Dibon vadung tui khom thisen angin a oma; Dibon vadung chunga, hi nêka thil irkhêl ual intungtir nôk ki ti, Moabhai lai ata rothai chunga le, kha rama la om sunhai laia kâmkeibaknei inlêngtir ki ti.