ISAIA 12 - PATHIAN LEKHABU IRTHIANG C.L. Bible (BSI)

Lômthu hrilna hla

¹ Kha ni tena chu hiang hin ti ni ti: “O Rengpa, nang kin pâk, ki chunga hin ni ning an mura, Khannisian ni ningmur insum mak chea, Irtharngam ni ni saka.

² Pathian chu a ni saninhringtu a ni, Ama iam ki ta, chi ta no ning. Rengpa ki Pathian chu, a nin hrâttu, ki hla a ni. A ni saninhringtu a ni.

³ Saninhringna tuikuang ata, râifân takin tui chôi roi,

⁴ Kha ni khan chu hiang hin ti ta nin ti: Rengpa inpâk unglân, ar hming chôiindôm roi, A sintho chu a mihai hril unglân, A’rhming inthang lam hi inpuang roi.

⁵ A sintho roiinpui tak sika hin, Rengpa chu inpâk unglân, Rammual pumpui hi inhril roi.

⁶ Zion tânga omhmun khuarhaio, Râifân takin zâi unglân, khêk suak roi; Nin laia om, Israel mi irthiang chu a roiinpui ok a ni.