ISAIA 11 - PATHIAN LEKHABU IRTHIANG C.L. Bible (BSI)

Irngeina ram

¹ Thing phûrna bul a hong incher nôk ang hin, Jesaia irchi ata rêng thar hong suak a ti:

² Rengpa irtha’n ompui a ta, vârna le inhriattheina hai, irfûktir theina le hâina hai, Rengpa chitna le inhriattheina irtha inneitir a ti.

³ Rengpa chi hi a lôm lamtak a nia, an lang dân ang hin roirêl no nia, mikuara a inhriat mai maihai hin thurêl insat ual no ni.

⁴ Inrianghai chu diktakin rêl pehai a ta, a ram sûnga mi irngaiin tômtehai khom chôiirsânghai a ti. Ama thua om nuamhai chu irnêng hi vîkhaina a ta, mi sualhai chu sêm thathai a ti.

⁵ Dikna chu kongkhitin hmang a ta, iamomna chu a konga khit a ti:

⁶ Inehai chu kêlbelrahai leh omsuam an ta, kâmkei le kêl khom kual suam an ti. Sehrât te le kâmkeibaknei têhai chu, satêhai leh omsuam an ta, Nâipangtein hruaihai hluk a ti.

⁷ Sehrâtpui le savom khom omsuam an ta, an têhai khom kual suam an ti. Kâmkeibakneihai khomin sehrât angin fapôl fa ta an ti.

⁸ Irhnu nêk laihai khom soksapho kôla lêng suam an ta, irhnu mâk chakhaiin sokngân kuaa an kut sia an ti.

⁹ Ki tâng irthiangna tinrênga chu, tûte a na tuang ta no nihaia, an siat khom insiat no nihai; tuikhanglian tui a ibit angin Rengpa an inhriatna hin ram hi bit ta a ti.

Sala intânghai kîrna

¹⁰ Kha ni tena khan chu Jesaia irchia rêng hong suak kha nam tinhai hranga irsinsiana ni a ta, a omna hong pan an ta, chôiindôm an ti.

¹¹ Kha ni khan chu Rengpa’n a bân phar nôk a ta, a mi la thi loihai. Assuria le Aigupta ramhai, Pathros ramhai, Sudan ramhai, Elam ramhai, Babulon ramhai, Hamath ramhai, tuikhanglian kôla tui le tui kâra omhai hruai kîrhai a ti.

¹² Nam tinrênghai mithmua irsinsiana târsuak a ta, Israel an inhnotsuakhai le Juda a rothai khom kôlkil minli ata hruai suakhai a ti.

¹³ Efraima hnarsa siatna om ta no nia, Juda doihai ngai khom om ta no nihai. Efraima’n Juda chu hnarsa ta no ni. Juda rêngin Efraima chu inbuai ta no ni.

¹⁴ Nitâk tianga om Filistia chu doi intam nôk an ta, nisua tianga omhai khom rok pehai an ti.

¹⁵ Rengpa’n Suez-ah irkuang irngamna khom inkangtir a ta, Eufrates tuipui khom phâivua lum hmangin inkangtir a ta, an kezapha lua dui loiin irkân thei an ti.

¹⁶ Aigupta ram rengata Israelhai an suak theina hrangin, lamlian a iom ang khan, a mi la omhai hrang Assuria ram ata khom, lamlian om rum thei ta a ti.