ISAIA 1 - PATHIAN LEKHABU IRTHIANG C.L. Bible (BSI)

¹ Uzia hai, Jothama-hai, Ahaza hai, le Hezekia-hai Judai rama an inlal laia Amoza nâipa Isaia’n Judai ram le Jerusalem khuaa inlârna a ihmu thurchi chu;

Pathianin a mi a irchuhai

² Rengpa’n thu a hril hi, “Irvânhaio, irngai unglân, irnêng khom ni mikuar lei sung roh. Nâi le te kin fâhaia, kin liantirhaia, khannisian, an ni tehel pe zoi ta.

³ Sehrâtin a chongpu an hriata, Sakuartungin a pu bu pêkna irkuang a inhriat angin, Israelhaiin chu inhre mahai, ki mihai hin inhre thei mahai.

⁴ O! nam tukullian, sualna sip, irchi saloihai, mi helâk loihaio! Rengpa nin mâksana. Israel mi irthianghai nin hnôlhaia, nin mâksanhai tâka.

⁵ Itina mo nin la inuar pe mai? vîk nin la izong mai ma ni?

⁶ Nin kezapha ata hôi loiin la na irsua ving nin ti, a pop a liam, vîk irdul insip nin ti: An sui khom insui loiin, a tuam khom tuam loiin, hloi khom pol loiin.

⁷ Nin ramhai khom ar hmang zoi ta, nin khua khom a kâng irhmang ta, nin mithmua nam danghaiin nin ram an lua zoi ta, nin râlhaiin an insiat zoi a ni ta.

⁸ Jerusalem khua vai a la zôka, an irhual hrai sikin, kul nei loia, grep irhuan a irpuk angin, fanghma irhuana a’rzâmtirna ang ma maiin.

⁹ Itinrêng Rengpa’n a dam sun tômte hi chu nihai no sianlân, Sodom khua ang khan irhmang zoi ei ti, Gomora khua angin om ei ti.

¹⁰ Roirêltu Sodom khuaa mi anga omhaio! Rengpa thuhril hi irngai unglân, nangni Gomora khua mi anga omhaio, kin Pathian thu hi nin mikuar lei sung roi.

¹¹ Rengpa’n hiang hin a ti: “Nin irbôlnahai hi keima hrangin i ma nia? Nin belra pum hâlhai hi kin hnê theia, Sâ a mar nin irhlanhai hi nuam ma unga Sehrât, belra, le kêlchal thisenhai hi, lôm ual ma ung.

¹² Ki kuanga nin hor hlanhai hi, tu mo nangni an phût, ki tual nin hong idênpui ngai hi?

¹³ Thil hor hlan kochok ta no roi, ite ar fêna om ma, rimhoi nin ihâlhai hi kin tir ta, tha tharhai, sabat hai, Inkhômpui nin itho ngaihai leh hin, Inkhômpui nin iuarhai khom hi, ki hnông zoi ta, sualin a sip tâk sikin.

¹⁴ Ni tha thar kût hmang ngai le nikhua poimo danghai hi a sate’n nangni ki hnôngpui! keima hrangin porche a nia, tuang zoi ta no ning.

¹⁵ Ni ngênin nin bân phar khom unglân, ki mit nangni insîngsan ki ti, chongchai sabak khom unglân, ki mikuar sung no ning.

¹⁶ Irsil unglân, fâi ta roi, thilsual nin itho ngai hi ma ta unglân, thilsual tho ta ngai no roi.

¹⁷ Sin sa sin irchu unglân, a dik hi irzûl roi. A boihai sanhai unglân, farahai roirêl indikpuihai roi, meithâihai sanhai roi.

¹⁸ Rengpa khan, “Thoi hong roi lei ngaitua irhlôm rei! Nin sualhai kha seninlâr angin om ta khomsian, ivur angin la vâr a ta; senduk angin sen ta khom sianlân, belra mul angin om ta a ti.

¹⁹ Ki thu nin zômin chu, nin rama thil sahai fa nin ti.

²⁰ Khannisian, nin nuam noa, tehel nin zongin chu, khandaiin nangni fa zoi a ti: Rengpa bâi khan kha kha a insîr tâk a ni,” a tia.

Khopui sualna

²¹ I thoa khopui iamom tak chu Notizuar angin teh a om tâka? Dik taka, roirêlna, mi dikhai omna chu, mi thathai omna teh a hong ni tâka!

²² Nang tangkarua chu a êkin a iman zoi ni ni ta.

²³ Nin hruaituhai chu nakhrâtsong an nia, Inruhai rualsa an ni; mi huang hrang an zonga sum irzûlin an om zoi ta, Farahai diktakin roirêl pehai loiin, meithâihai enkolna khom nin irsama.

²⁴ Khanchu, Rengpa tinrêng Rengpa’n Israelhai mi hrât thu suakin hiang hin a ti: kho mo, ki râlhai chunga lei irsiam sabak hi rong, a ni doihai chunga phuba lei la hi rong.

²⁵ Ni chunga ki kut inlek ki ta, tangka ru angin lei hâl infâi rong, a êk siathai chu hâl infâi ki ti.

²⁶ Tiana nin roirêltuhai anga kha, sia nôk ta ki ti, nangni irfûktirpuhai ang kha nangni pe nôk ki ti; khanchu, “Khopui iamom le dik,” nangni ti nôk an ti.

²⁷ Zion khua chu diknain sansuak ni a ta, a sûnga sual irlethai khom felna khan inzôk ni an ti.

²⁸ Ama makunga tehel le mi sualhai chu vîk indarhai a ta, Rengpa irheisanhai chu irhmang zoi an ti.

²⁹ Sesua thinga siam Biak In khârnahai kha lan zak nin ti, Irhuan ser nin isiamhai khom inzakpui nin ta,

³⁰ sesua thing thi ta hrang angin thêm nin ta, tui hmu ngai loi irhuan angin châr nin ti.

³¹ Mi sinthothei tak chu, mei irbu ang hi a ni, a sintho khom meirisi ang hi a ni, kâng ir-ût a ta, tûte’n that thei no nihai.