IRPHUTNA 9 - PATHIAN LEKHABU IRTHIANG C.L. Bible (BSI)

Nova kuanga Pathian thuthung

¹ Khan Pathianin, Nova le a nâihai kha bor a pêkhaia, an kuang khan, “Irchi tamtak thâka hong pungin irnêng chung lua insip roi.

² Nangnihai hi irnêng ramsahai le vâhai khomin chitna nangni nei an ti; annihai le bokvâka fâk zong murdi le tuipui sûnga ngahai khom, nin kuta pêk an ni zit ta.

³ Thilhring châng thei murdi khom nin hrangin fâk thei ni an ta, anhring nangni ki ipêk ang khan itinrêng nangni ki pêk zit ta.

⁴ Khannisianlân sahai hi a thisen om pumin nin ifâk hrang ni ma.

⁵ Khan nin thisen, nin hringnahai chu keiin phuba ki ilâk ngêt hrang a ni, sa murdihai laia khom mihriam laia khom, mi tin an urêng laia khom phuba chu ki ilâk ving hrang a ni.

⁶ Mi tukhom mihriam thisen insuaktu chu, mihriam ngêtin ama thisen an insuaktir hrang a ni. Pathian irangpuia siam an ni sikin.

⁷ Khan, nangni chu irchi suanpâr tam takin hong pung unglân; irnênga hin nâi tamtak nei unglân; irnêng hong sip roi,” a tia.

⁸ Khan Pathianin Nova le a nâihai kuanga khan,

⁹ “Irngai roi, keima ngêtin nangni le nin irchi la hong om hranghai kuanga ki thuthung chu ki indet a ni,

¹⁰ nin kuanga vahai, sahai le ram sahai, irkuang ata suak murdihai laia.

¹¹ Nin kuang ki thuthung chu indet ki ta, taksa nei murdihai khom tuilêtin indîlin irhmang ta no nihaia, irnêng insiat hrangin tui khom lêt ta no ni,” tiin a hrila.

¹² Khan Pathian ngêtin, “Hi hi kei le nangni le nin laia thilhring om murdihai laia khom mongni nei loia om mai hranghai laia thuthung irsinsiana a ni.

¹³ Sûmphâi kâra sumrisâng inkûi a ta, kha kha kêng kei le nangni kâra thuthung irsinsiana a ini hrang.

¹⁴ Khan, hiang hin ni a ta, irnêng chunga sûmphâi ki’rzâmtirin chu, sumrisâng chu sûm laia inlang a ta,

¹⁵ kei le nangni le taksa nei murdihai thilhring tinrêng kâra ki thuthung om hi inhre mai ki ta, khanchu tuihai chu taksa nei murdi insiat ta loi hrangin hong lêt ta no ni.

¹⁶ Khan sumrisâng chu sûmphâi laia inlang ta a ta. Khanchu Pathian le irnêng chunga taksa om murdi thilhring tinrêng kâra kumtuanga ki thuthung om chu kin hriat maina hrangin en hen ki ti,” a tia.

¹⁷ Khan Pathian ngêtin Nova kuanga khan, “Hi hi kêng kei le irnêng chunga taksa nei murdi laia ki thuthung det irsinsiana a ni,” a ti nôka.

Nova le a nâihai

¹⁸ Nova nâihai irkuang ata zôkhai chu Sema, Hama le Jafeta an ni. Hama chu Kanaana pa a ni.

¹⁹ Hi mi inthumhai hi Nova nâihai chu an ni. Anni inthumhai irchi hi irnêng chung an isip tâk a ni.

²⁰ Khan, Nova chu loi sinthopu a nia, grep irhuan siam masatakpu a ni.

²¹ Uain kha a ina, an ruia, a puan ina khan korongboiin a zâla,

²² khan Hama, Kanaana pa khan a pa korongboia om chu a va hmua, pên tianga a urênghai ruai kha a hrilhaia.

²³ Khanchu Sema le Jafeta’n puan an lâka, an tuama an hnung tiang an irzôna, hnung tianga irheiin an pa korongboi kha, an irkhû en loiin,

²⁴ khan Nova uain inrui a hong harin chu, a nâi mitumtakpa thiltho chu a hon hriat suaka.

²⁵ Khanchu, “Kanaana chu khosâl tongin om ri se; a urênghai siahlohai siahlo ni ri se,” a tia.

²⁶ Rengpa, Sema Pathian chu inpâkin om ri se, Kanaana chu siahlo’n om ri se.

²⁷ Pathianin Jafeta chu mi lian inchangtir sianlân, Sema puan ina om ri se; khan Kanaana chu siahlo’n om ri se. a ti nôka.

²⁸ Khan Nova chu tuisâng a lian zoiin kum 350 a dama,

²⁹ khanchu Nova dam sûng kum chu 950 a ni, khanchu a thi ta.