IRPHUTNA 5 - PATHIAN LEKHABU IRTHIANG C.L. Bible (BSI)

Adama irchihai

¹ Hi hi Adama irchihai chuangna bu chu a ni. Pathianin thu ringota mihriam a siam nî khan, Pathianin ama ir-angpuiin ama kha a siama;

² Thu ringotin pasal le nupang kha a isiamhai a ni. Thu ringota siam an ni lai khan sat a vurhaia, an irhming khom “Mihriam” a tihai ta.

³ Khanchu Adama kha kum 130 a ni kumin, ama irangpuiin nâipasal a neia; a’rhming khom Setha a phuaa.

⁴ Setha a nei zoiin Adama chu kum 800 a la dama nâi nupang le pasal dang a la neihaia.

⁵ Khanchu Adama dam sûng kum chu 930 a ni zoiin a thi tâka.

⁶ Khan Setha khom kum 105 a ni’n nâipasal Enosa a neia,

⁷ Enosa a nei zoiin Setha chu 807 a la dama nâinu le nâipa a la neihaia,

⁸ kha zoiin Setha dam sûng kum chu 912 a niin a ithi a ni.

⁹ Khan Enosa chu kum 90 a ni kumin nâipasal Kenana a neia,

¹⁰ khan, Kenana a nei zoiin Enosa chu kum 815 a la dama, nâinu le nâipa a la neihaia;

¹¹ khanchu Enosa dam sûng kum chu 905 niin a ithi a ni.

¹² Khan, Kenana khan kum 70 a niin nâipasal Mahalalela a neia.

¹³ khan, Mahalalela a nei zoiin Kenana chu kum 540 a la dama, nâinu le nâipa a la neihaia.

¹⁴ Khanchu Kenana dam sûng kum 910 a niin a ithi a ni.

¹⁵ Khan, Mahalalela’n kum 65 a niin nâipasal Jareda a neia,

¹⁶ khan Jareda a nei zoiin Mahalalela chu kum 830 a la dama, nâinu le nâipa a la neihaia,

¹⁷ khanchu Mahalalela dam sûng kum chu 895 niin a ithi a ni.

¹⁸ Khan Jareda khan kum 162 a niin nâipasal Enoka a neia;

¹⁹ khan, Enoka a nei zoiin Jareda chu kum 800 a la dama, nâinu le nâipa a la neihaia,

²⁰ khanchu Jareda dam sûng kum chu 962 niin a ithi a ni.

²¹ Khan Enoka khom kum 65 a niin nâipasal Methusela a neia,

²² Methusela a nei zoiin Enoka chu kum 300 chu Pathian le omsuamin, nâinu le nâipa a la neihaia,

²³ khanchu Enoka dam sûng kum chu 365 a nia.

²⁴ Khan Enoka chu Pathian leh omsuamin om ta maka, Pathianin a hruaipai tâk sikin.

²⁵ Khan Methusela khom kum 187 a niin nâipasal Lameka a neia,

²⁶ khan Lameka a nei zoiin Methusela chu kum 782 a la dama, nâinu le nâipa a la neihaia,

²⁷ khanchu Methusela dam sûng kum chu 969 niin a ithi a ni.

²⁸ Khan Lameka khan kum 182 niin nâipasal a neia,

²⁹ khan, “Hi mi ngêt hin Rengpa khosâl tongna irnêng chunga sintho intaka fâk nêk zong hi, ni sanin irzângtir ngêt a ti,” tiin a’rhming khom Nova a phuaa.

³⁰ Khan Nova a nei zoiin Lameka chu kum 595 a la dama, nâinu le nâipa a la neihaia;

³¹ khan Lameka dam sûng kum chu 777 niin a ithi a ni.

³² Khan Nova chu kum 500 mi a nia, Nova khom nâipasal Sema, Hama le Jafeta a neihai a ni.