IRPHUTNA 49 - PATHIAN LEKHABU IRTHIANG C.L. Bible (BSI)

Jakoba chong hnungkhôn

¹ Khan Jakoba’n a nâihai chu a koihaia, “Sûn hnungkhôn tianga nin chunga thil hong tung hrang nangni ki hril theina hrangin irkoibuk roi,” a tia.

² Nangni Jakoba nâihai irbuk unglân irngai roi; nin pa Israel thuhril hi irngai roi.

³ Reubena nang ki nâilutîr, ki sintho theina, ki hrât lai taka ra maton tak ni ni. A’rsângtak le thuneitak nina chu ni ta a ni.

⁴ Khannisianlân tui anga det loi ni ni sikin, a’rsângtak nina chu chang no chi ni. Ni pa zâlhmun ni kâi sikin, ni iporinchetir a ni kha.

⁵ Simeona le Levi hi ulenâi an nia. An chemhai chu thisen suakna hriamhrei a ni.

⁶ O, ki’rtha anni ngaitua angin om no ro, kin lalnahai hi, anni ruai irkopna hmuna om no’n lân. Ningmurin mi an thata, lungrîl saloiin sehrâtchal an thata.

⁷ An ningmurna chu khosâl tongin om ri sehai; nun saloitak an ni sikin. Jakoba-hai leh khom irkop no ri sehai. Israelhai ata khom sem indarin om an ti.

⁸ Juda ni urênghaiin nan pâk an ti. Ni kut chu ni idoihai chunga irnghat ni ta; ni pa nâihaiin ni makunga chubai nang mûk an ti.

⁹ Juda hi kâmkeibaknei nâi ang a ni. Ki nâipa ni sa sê chu ni mâksan ta. A kûna, kâmkeibaknei angin an boka; kâmkeibakneinu angin tu’n mo nang a kai thoi ngam hrang?

¹⁰ Reng khianghrol chu Juda kuang ata irsam no nia; roirêltu khianghrol khom a ke kâr ata irsam no ni. Nam tinin ama thu la zôm an ti.

¹¹ A sakor te chu grep hruia khit a ta, A sakuartung tê chu grep kung sataka thung a ti. A tukfam khom uain tui leh irsu a ta; a puan chu grep thisen leh irsu a ti, A mihai khom uain thisen angin om an ti.

¹² A hahai khom dût anga invârin om a ti.

¹³ Zebulun hin tuipui kôla omhmun khuar a ta, Irkuang irngamna hmun ni a ti. A ramri khom Sidon ni a ti.

¹⁴ Isakara hi sakuartung hrât tak, kêlbelra pâl kâra kual thei a ti.

¹⁵ Irngam chu a sa ti an hriata, a ram hoi lam khom an hriata. Khanchu puak pêl hrang zongin a oma. Khanchu sintho hrangin mihaiin an hmang ta.

¹⁶ Dana hin a mihai chu roirêl pehai a ti, Israel nam inkhat anga bêin,

¹⁷ Dana hi chu lampui kôla mirûl ang a ni. Mirûl tûr hrât lampuia irkhang ngai ang a ni. Sakor ke inchuk invûngtirtu ang hi ni a ti.

¹⁸ Khasikin Rengpa ni saninzôkna ki nghâk mai. Gada hi râlin doi an ta.

¹⁹ Khannisianlân ama’n khom an ke ârtui tiang doihai a ti.

²⁰ Asera hi a fâk chu satak ni a ta, Renghai ifâk nuam lam siamtheitu ni a ti.

²¹ Naftalia hi sazuk a nuam taka lêng ang hi ni a ti. Thu satak takhai hrildoktu a ni.

²² Josefa hi a ôn ra nuam tak a ni. Tuikuang kôla thing ra nuamtak ang kha; a ôn irzâmnahai khan lung danghai irkhûhai a ti.

²³ Thal kâp mihaiin a sate’n dengintheitir an ti, kâp an ta an nuamin an isoisak ang khan.

²⁴ Khannisianlân a thalngul chu ite châng viat no ni. A kuthai khom irnak songin hrât tak ni a ti. Jakoba mi hrât kut sinthotheina khan (kha khan chu belra hrungtu, Israel lampui a lei oma).

²⁵ Ni pa Pathian, nangma nang changpui hranga Itinrêngthotheiin, chung tianga vân satvurnahai, hnuai tianga satvurnahai, dûttui le rîla ra satvurnahai, Nangma satvur hranga inhrâtin a oma.

²⁶ Ni pa satvurnahai hin, Ki’rchibul satvurnahai khom kumkhontuangin sipin om a ta. Hihai murdi hi Josefa lu chunga om a ta, A urênghai nêka danglamin om a ti.

²⁷ Benjamina hi Inê inchar a ni. Zînga chu a sa that kha fa a ta, khohloia chu a ihlo dok chu sem suak a ti,” a tia.

²⁸ Hihai murdi hi Israel nam sômhleihnihai chu a ni. An sika satvurna an irphulam ang takin an pa khan a vurhai ving a ni.

Jakoba thina le phûma omna

²⁹ Khanchu a nâihai thu a pêkin an thâhaia, “Kei chu ki’rchipuihai kuanga hruaiin om hrang ki ni ta: Hit mi Efrona loia khur, Kanaan rama Mamre irdîna.

³⁰ Makpela loia khur Abrahama phûmna hmun irchon hranga a irchôk Efrona kôla khan ni phûm roi:

³¹ kha hmun khan Abrahama le a dôngma Sari an phûma; kha hmuna khan Isaka le a dôngma Rebeki an phûma: kha hmun ngêta khan Leaii ki phûma;

³² loi le a sûnga khur om leh khan Hit mihai ata irchôk sai a ni,” a tia.

³³ Khanchu Jakoba’n a nâihai kuang kha thu a bêhai zoiin chu, a ke chu zâlhmuna a bânga, a’rtha khan a mâka, a’rchipuihai kuang hruaiin a om ta.