IRPHUTNA 48 - PATHIAN LEKHABU IRTHIANG C.L. Bible (BSI)

Jakoba’n Efraima le Manasea sat a vur

¹ Khanchu hiang hin a hong nia, Josefa kuang khan, “Irngai roh ni pa dam ma,” an tia. Khanchu a nâihai Manasea le Efraima a hruaihaia.

² Jakoba kuang khan, “Irngai ro, ni nâipa Josefa chu ni kuang a hong,” an ti pea; khanchu Israel chu a hong hara, zâlhmuna a toia.

³ Khan Jakoba’n Josefa kuang, “Pathian Itinrêngthothei chu Kanaan ram Luz khuaa ki kuang a zuan lâra, sat a ni vura,

⁴ ki kuang, ‘Irchi tam takin nan pung ki ta, irchi tam takhai irnghatna hmunin nang siam ki ti, hi ramhai hi nir chi suanpârhai khomin la hong lua an ti,’ a ni tia.

⁵ “Khan ni nâihai inhni Aigupta rama ni kôla ki om mâna Aigupta rama nir chonhai hi ki ta a ni: Efraima le Manasea-hai ruai hi, Reubena le Simona ang dênin ki ta ni an ti.

⁶ Khanchu hihai zoia ni nâi kêng ni ta an ini hrang.

⁷ Padan-aram ata ki hong lai khan, Kanaan rama Efrath khua tiang hlatak la omin ni nu Rakili chu lampuia a thia: kha hmun Efrath khua tianga ki phûma. (Kha khua kha chu Bethlehem a ni)” a tia.

⁸ Khanchu Israela’n Josefa nâihai chu a ena, “Hihai hi tuhai mo an ini?,” a tia.

⁹ Josefa’n a pa kuang, “Hihai ruai hi ki nâihai, Pathianin hitaka a ni ipêk an ni,” a tia. Khanchu, “Lungkham takin ki kôla ni hong nâi ri sehai, khan kêng sat ki ivurhai hrang,” a tia.

¹⁰ Israel mit chu a tar tâk sikin infelhai ta maka, a hong hruai innâiin chu pominkuain a tumhaia.

¹¹ Khan Israela’n Josefa kha, “Ni hmêl hmu hrangin nang tûng ta ma unga, nikhomsianlân, Pathianin ni nâihai hmêl tena a nir hmutir tâk a ni hi,” a tia.

¹² Khan Josefa’n a pa inkuapumin a hruaihaia, hnuai enpumin a pa chu chubai a mûk ta.

¹³ Khan Josefa’n a kut chang tiang a pa Jakoba kut vei tianga om Efraima a hruaia, Manasea chu a kut chang tiang Jakoba vei tianga om chu a hruaia,

¹⁴ khan Jakoba’n a kut irkherin a kut chang tiang Efraima nâipang ual lu chunga irnghatin, a vei kut chu Manasea nâilutîrpa chunga a’rnghata.

¹⁵ Khan Josefa chu sat a vura, “Ki’rchibul Abrahama le Isaka maton ata a vuan sûn tena nin fâtu Pathian,

¹⁶ siatna tinrênga nin zôktu vântirtônin nâipanghai hi satvur ri se, khan ki’rhming le kir chibul Abrahama le Isaka irhming pêlin om ri sehai, rammual pumpui hi lua sipa pungin om ri sehai,” a tia.

¹⁷ Khan Josefa’n a pa chang kut Efraima lu chunga irnghat a hmua, a milung hoi pe maka; khanchu a pa kut an bana, Efraima lu chung ata Manasea lu chunga thûl pe hrangin a chela,

¹⁸ “Ka pa hiang hrang hi ni ma: hi kêng hi nâilutîr chu a ini, khasikin ni chang kut hi ama lu chunga irnghat ro,” a tia.

¹⁹ Khannisianlân a pa khan nuam maka, “Kin hriat, ki nâi kin hriat: ama khom nam tiin koi ni a ta, khannisianlân a sangpa hi inlal ual a ti, ama irchi ata nam tamtak la hong suak an ti,” a tia.

²⁰ Khanchu Jakoba’n Israelhai angin, Efraima le Manasea angin Pathianin nangni ompui ri se, tiin nin irhming sâmin satvur ni an ti. Khanchu Efraima chu Manasea matona an omtir ta.

²¹ Jakoba’n Josefa kuang khan, “Irngai roh thi hrang ki ni ta, khannisianlân Pathian chu nin kuang om a ta, nin irchibulhai omna rama nangni la hruai a ti.

²² Hi khêla hin ni urêng danghai nêkin nang ki pêk intam, ki chemhring le ki thalngul, Amor-hai kuta ki ilâk pehai kha ni dongtum a ni sa,” a tia.