IRPHUTNA 41 - PATHIAN LEKHABU IRTHIANG C.L. Bible (BSI)

Josefa’n Faroa irmang a hrilfiana

¹ Khanchu kum hni zoia chu, Faroa’n irmang a phana; Nail vadung kôla hin a oma.

² Sehrâtpui sari satak le mar tak tak, tuidung ata an hong suaka, phâiruanghai fâkin an oma.

³ Khanchu sehrâtpui dang sari, kông tak tak, le por derdurin an hong suak nôka, tui ata kha sehrât danghai leh khan phâiruang bila hmun khatin an lêng suama,

⁴ khan sehrât kông le por derdurhai khan a sa le a marhai kha an fâkpaihaia, khanchu a hong har tâka.

⁵ A hong zâl nôka, irmang a phan nôka; bu kung khata hin a vûi sari lianpapa le ra satak takin a vûi om a hmua,

⁶ kha irzoiin chu a vûi sari nei phâivua isêm inrîl thei pai anga chînte te an hong suak nôka,

⁷ khan a vûi chîntehai khan, a vûi lian le sahai kha an involpaihai vinga. Khanchu Faroa a hong hara, e! ki’rmang kêng a ni hi teh a tia.

⁸ Zîng khua a hong vâra, Faroa chu a char an dong oka, khanchu Aigupta ram sûnga mitphil, dôithei, mi vârhai zong hrangin mi a tîra; khan Faroa’n a hril pehaia, khannisianlân tûte’n a hrilfia pe thei om mahaia.

⁹ Kha lai takin, uain pêktupa khan Faroa kuang khan, “A vuan hin ki sual kin hriatsuak ta.

¹⁰ Faroa’n a suakhai chunga a ning an mura, khasikin kei le bai siamtupa chu intângna in hruaitupa kuanga intângna ina ikhumin kin oma;

¹¹ zân khat chu kin ruaiin irmang kin phana, a dadang a nia;

¹² khanchu kha kin omna hmuna khan hruaitu inkhat, Hebrai ruathartepa a oma, kin irmanghai kin hrila, ama’n kin irmang omlam angin a ni hrilfia pea.

¹³ Khanchu atûn hin ama ni ihrilfia pe lam angin a hong idik a ni; kei chu ki sin ki tho nôka, bai siamtupa chu inkhâi thatin a om ta a ni,” a tia.

¹⁴ Khanchu Faroa khan Josefa kha a van koitirhaia, irhnot takin irkhumna in ata an hong hruaia, tui mei tôn zoiin, a tukrivohai thûlin, Faroa makunga a hong lûta.

¹⁵ Khanchu Faroa khan Josefa kuang, “Irmang ki neia tûte a hrilfia thei om mahai, nangin irmang thu nin hriata ni hrilfia pehai thei tih mi insîr kin hriata,” a tia.

¹⁶ Josefa’n, “Kha thu kha chu keima inhriat ni maka, Pathianin Faroa chu lungngam takin nang sâm ri se,” a tia.

¹⁷ Faroa’n Josefa kuang, “Irngai ro, ki’rmang tiang hin tui kôla ki lei oma.

¹⁸ Sehrâtpui sari satak tak, le mar tak tak an hong suaka, phâiruang bila an honga;

¹⁹ khan sehrâtpui sari dang, kông tak tak, por derdur an hong suak nôka, hianga kông sehrât hi Aigupta rama zel hin la om ngai mahai a ni.

²⁰ Sehrâtpui sari satak tak le marhai kha an fâkpaihai vinga.

²¹ an fâk zoihai khomin khop loiin an fâk lua’n irbe loiin an la kông le an la por maia, khanchu ki hong hara.

²² Voihnina chu bukung khata hin a vûi sari satak tak a sate zela tak an hong vûi suaka,

²³ kha zoiin chu, khaang dênin buvûi sari chîn tete phâivua isêm insiatpai hlet dôr an hong suak nôka.

²⁴ Khanchu buvûi sari chîntehai hin a vûi lian le sahai kha an involpaihaiin ki hmua; mi thiam mi vârhai ki hrilhaia, tûte’n a ni hrilfia pe thei om mahai,” tiin a hrila.

²⁵ Khanchu Josefa’n Faroa kuanga khan, “Faroa ni’rmang hi hmunkhat kêng a ini. Pathianin a itho lat hrang tak hi kêng nang a inhriattir a ni ta.

²⁶ Sehrâtpui satak tak le marhai chu kum sari a nia; a vûi sari satak takhai khom kha kum sari a nia; khasikin ni’rmang hi hmunkhat a ni.

²⁷ Sehrâtpui kông tak tak, le por derdur mar thei loihai khom kha kum sari a nia, a vûi sarihai leh hmunkhat a ni. Kha kha chu châm tâk hrang kum sari a ni.

²⁸ Hi kêng hi Faroa kuanga ki ihril Pathianin a itho lat hrang hi Faroa a inhriattirna a ni.

²⁹ Irngai ro, Aigupta rama hin irchongnain kum sari sûng om a ta.

³⁰ Kha zoiin chu châm tâk kum sari la hong om a ti, khanchu Aigupta rama irchongnahai hi irzukin châmin a ram hi a ifâk irhmang hrang a ni.

³¹ Irchongna hi a zuitu châm tâk sikin, hi ram hin a sate’n a la intak hrang a ni,” a tia.

³² Khanchu Faroa irmang voihni a iphan nasan chu, a tak takin zoro sôtloitea a hong hrang sika a ni.

³³ Khasikin Faroa’n “Mi inkhat mi vâr le mi bengvâr tak Aigupta rama hin inthang sianlân; hruaitu inchangtir ro, a tia.

³⁴ Faroa khan hiang hin tho sianlân, hruaitu inthang sianlân, hi irchongna kum, kum sari sûnga hin bu hmun ringa semin hmunkhat chu bukkhôm sianlân,

³⁵ khanchu hruaituhai khan kha buhai kha lâk khômin Faroa ina buk khômin enkolhai sian.

³⁶ Khanchu châm kum sari a tâk tena mipuihai nêk hrangin le’rsiam ta ri se,” a tia.

Josefa Aigupta rama hruaitu nina a chang

³⁷ Khanchu, kha thu kha Faroa le a sinthotuhai khomin a dik tiin an poma,

³⁸ khanchu Faroa’n a sinthotuhai kuang khan, “Hianga Pathian irtha iompui mi hi mo hmusuak thei ni ni?” a tia.

³⁹ Faroa khan Josefa kuang, “Pathianin hihai murdi hi nang a inhriattir sikin, nangma anga mi bengvâr le thiam hi om mahai:

⁴⁰ nangma ngêt kêng ki in sûngkuahai chunga hruaitu ni ni ta, ki khua le tui ni ienkol hrang; rêngtoihmuna vai hin kêng keima inlal ki ti,” a tia.

⁴¹ Khanchu Faroa’n Josefa kuang, “Irngai ro, Aigupta ram sûnga hin hruaituin nang siam nôk ki ta,” a tia.

⁴² Khanchu Faroa kuta kutsabi kha lâkin Josefa a’rbuntira, puanirphân tukrivo pêkin a’rbeltira, a ringa rângachak irthei a’rhlitir ta.

⁴³ Khan a sakor inhnina khan an chuangtira; “A matona hin mi tinin chubai mûk roi,” tiin an khêka. Khanchu Aigupta rama hruaitu a ni tâka.

⁴⁴ Khanchu Faroa khan Josefa kuang, “Keima Faroa’n ki ti, nangma thu ni loiin Aigupta rama hin tûte’n an ke an kut irlek thei viat no nihai,” a tia.

⁴⁵ Khanchu Faroa khan Josefa irhming kha Zafenat-panea a tia: khan Heliopolis khuaa deipu Potifara nâinu Asenathi an luatira. Khanchu Josefa kha suakin Aigupta ram murdi a’rfang phut tâka.

⁴⁶ Josefa chu kum sômthum mi a ni tena hin Aigupta rêng Faroa hnuaia sin a itho a ni ta; Faroa kuang ata suakin kho tina Aigupta ram chu a’rfang suaka,

⁴⁷ khanchu kha rama khan kum sari sûng kha chu bu a vâng intama.

⁴⁸ Kha sûnga bu an ineihai chu a’rfuangtirhaia. Kho sûnga le hmun inchumnahaia an hrêtirhaia.

⁴⁹ Khanchu Josefa’n tep zoi loi rakin tuipuia chiai nêka tamin bu a bukkhôm tâka.

⁵⁰ Khanchu châm tâk mânin Josefa’n nâi inhni a neihaia, Hekopolis deipu nâinu Asenathi ineipui an ni.

⁵¹ Josefa nâilutîr irhming chu Manasea a tia: “Pathianin ki sinthôna ra le ka pa in sûng mihai a ni’rnghiltir zoi tâk sikin,” a tia.

⁵² Khan a nâi inhnina irhming chu Efraima a tia. “Pathianin dengthei ki tuangna rama irchi a ni pêk tâk sikin,” a tia.

⁵³ Khan kum sari irchongna kum chu a hong hek tâka,

⁵⁴ châm tâkna kum sari chu, Josefa ihril angin a hong tung irphuta: ram tina châm a tâk tâka; Aigupta rama vai hin fâk nêk hrang a la omsun a nia.

⁵⁵ Aigupta rama mihai khan fâk hrang an boiin chu Faroa kuang fâk hrang zongin an va khêk ngaia, khanchu Faroa’n a mihai chu “Josefa kuang fe unglân; tho roi a iti murdi chu tho ngai unglân,” a tia.

⁵⁶ Khanchu a sate’n châm a tâka Aigupta rama khan, a bu siana in chu an honga, bu kha zuarin a semhaia.

⁵⁷ Irnêng chunga hmun tina a sate’n an châm sikin Aigupta rama Josefa kuanga mi hongin bu an hong izong ngai a ni.