IRPHUTNA 40 - PATHIAN LEKHABU IRTHIANG C.L. Bible (BSI)

Josefa’n intângna ina omhai irmang a hrilfiana

¹ Khanchu zoro sôtnote hnunga chu Aigupta rêng uain le bai siamtuhai ruaiin an pu ning an inmurtir pea.

² Khanchu Faroa’n hi hruaituhai inhni chunga hin a sate’n a ning an mur pea,

³ khanchu intângna ina a khumhaia; Josefa a ikhumna ina khan hmunkhatin an oma.

⁴ Khanchu intângna in enkoltupa khan Josefa kha annihai enkol hrangin a tia, khanchu a sintho’n zoro sôttak an om suama.

⁵ Khan intângna ina khan, zân khat chu uain le bai siam sinthohai inhni khan irmang an phana, omzia da dangin.

⁶ Zînga chu an omna hmuna khan Josefa a va fea, an hmêl ngûi khakhakin a va hmuhaia.

⁷ Khanchu Josefa’n, “Itho mo a vuan hin te nin ngûi bâka?” a ti pehaia.

⁸ Anni khan, “Irmang kin neia, tûte’n a ni hrilfia pe thei om mahaia,” an tia. Khanchu Josefa’n, “Irmang hrilfia theina chu Pathian ta mo ni ma? I irmang mo nin iphan ni hril roi ba,” a tia.

⁹ Khanchu uain siamtupa khan a’rmang a hrila, “Ki’rmangin, ki maton tiang hin grep kung a oma;

¹⁰ grep kunga khan ôn inthum a oma; a pâr irmuamin a hong pâr suaka, a pâra khan a ra hmin a hong oma.

¹¹ Khan Faroa khilât chu ki kuta hin a lei oma, a ra ki’rhmala, Faroa khilâta khan ki sôm pea, Faroa kha ki lei pêka,” a tia.

¹² Khanchu Josefa’n, “Kha kha chu hiang hin ni a ti: a ôn inthum kha chu sûn thum a nia,

¹³ a vuan ata sûn thum zoia chu Faroa sintho nôk ni ta: khanchu a uain pêktu ni ni laia ang khan Faroa khilât pêktu la ni nôk ni ti, a tia.

¹⁴ Khannisianlân ni vân a sa nôk tena chu a’rnghil vai ni hong irnghil no’n lân, Faroa kuang ki thurchi hril pe ngêtin lân, hi in ata hi ni hruaisuak lam ngaitua roh.

¹⁵ Kei hi Hebrai-hai ram ata mi’n an nin rûka, mi’rhmang ki nia, hi rama lak hin hianga irkhumna ina khum inruk hrang lakin ite ki insiatna om maka,” a tia.

¹⁶ Khanchu bai siamtupa khom khan hrilfiana thu kha an hriata, Josefa kuang khan, “Kei khom irmang ki phana, ki lu chunga hin bai khamphulu thum ki lei tiang irchuana,

¹⁷ a chungtaka khan Faroa hranga bu, bai chi tinrêng a oma; khanchu ki tiang pum khan vatêhaiin an hong inchuka,” a tia.

¹⁸ Khanchu Josefa’n, “Hi hi a hrilfiana chu a ni: khamphulu thum chu sûn thum ni a ta;

¹⁹ a vuan ata sûn thum tena chu Faroa’n ni taksa ata ni lu chôikâng a ta, thingrêla nan khâi a ta; khanchu vatêhaiin nang an inchukin nang an ifâk hrang a ni,” a tia.

²⁰ Khan sûn thum ni tena chu, Faroa suak ni sûn chu a nia; Faroa’n a suakhai hrangin hruai an thea, a siahlohai laia mi uain siamtu le bai siamtu lu a chôikânga.

²¹ Josefa’n a ihrilfia pehai ang takin, uain pe ngaitu chu uain petu ni nôk hrangin an sintir nôka.

²² Bai siamtupa rêk chu an khâi thatpaia.

²³ Khannisianlân uain pêktu khan Josefa kha inhre loiin a’rnghil rak tâk a ni.