IRPHUTNA 39 - PATHIAN LEKHABU IRTHIANG C.L. Bible (BSI)

Josefa le Potifara dôngma

¹ Khanchu Josefa chu Aigupta rama an hruaia: Faroa hnuaia hruaitu inkhat, a enkolhai chunga hruaitu, Aigupta mi Potifara’n Ismaela hai kuang ata a le’rchôka.

² Khan Rengpa chu Josefa kuanga omin, Josefa chu vânnei tak a nia. Aigupta mi ina omin,

³ khan a pu khan, Rengpa’n a ompuia, a sinthônahai hi Rengpa’n hlochukna a pêk ti an hriat suaka.

⁴ Khanchu Josefa chu a pu mit a tung tak taka; khanchu a in sûngkua tena hruaitu nitna khom iam zoiin a pêka, a inei murdi a kut chunga a sia zita.

⁵ Khanchu hiang hin Rengpa’n satvurna changin Josefa sikin Aigupta in sûng mihai chu an in le loi, neinun sampârhai chunga Rengpa’n sat a vur ual uala.

⁶ Khanchu a inei murdi chu Josefa kuta a sia vinga, a kuanga irchon om murdi chu a pu’n inhrepui loiin a kuta a pêk hleta, a bu nêk hrang ti no kai chu. Khan, Josefa chu mi hmêl sa le nunhoi tak a nia.

⁷ Kha zoi chu hiang hi a nia; a pu dôngma’n Josefa chu an dita; sûn khat chu, “Ni zâlpui ro,” a tia.

⁸ Ama’n chu, a pu dôngma zâlpui hrang khan nuam maka, “Irngai ro, ka pu’n hi ina hin, ki kuang neinun omhai chunga ircham neina ni pêka ama’n ite nin hrepui maka,

⁹ hi ina hin keima nêka irchamnei tûte om mahaia; a dôngma ni ni sikin nangma ti no chu ki kuanga hin ite inhroi maka; khasikin itin mo hi sual liantak hi sinin Pathian chunga sin ki insiat thei hrang?” a tia.

¹⁰ Khanchu sûn tin zân tin hmunkhat hmârkhata ompuiin, a chongpui khomin ama zâlpui hrang rêng rêng tum viat maka.

¹¹ Khaanga sintho hrangin in sûnga a va lûta; kha ni khan in sûnga tûte mi dang om mahaia.

¹² Khanchu a pi khan, “Ni zâlpui ro,” tiin a songkol a lei chel pea: khanchu a songkol mâksanin an tâna, a suaksana.

¹³ Khanchu a pi kuta a songkol mâksanin an tân tah ti an hriatin chu,

¹⁴ a ina omhai chu a koihaia; “En roi hi, mualphoi ni sak hrangin Hebrai mi inkhat a hong lûta, ni zâlpui hrang tiin, irhâi inringtakin ki ikhêk a ni hi.

¹⁵ Irhâi ki phoi pea ki khêkkhum tena chu hi a songkol mâksanin an tân ta,” a tia.

¹⁶ Khan Josefa pu hong mâka chu a songkol a lei dôn chiana,

¹⁷ khanchu hiang hin kêng a ni tah ti thu a hrila, “Hebrai mi ei kuanga sintho hranga ni hong ihruai khan, mualphoi ni sak hrangin ki omna a hong lûta.

¹⁸ Khan hiang hin a nia, irhâi inringin ki khêk pe tena kêng a chi’n a ni intânsan; hi a songkol mâksanin a om rak ta,” a tia.

¹⁹ Khanchu hiang hin a nia, Josefa pu khan a dôngma’n “Ni sinthotuin,” hiang hin a ni ilo lam a nih ti a hril an hriatin chu, a ning a sate’n an mur pea.

²⁰ Khanchu Josefa pu khan a hruaia intângna ina a khuma, khanchu kha intângna ina khan a om tâka.

²¹ Khannisianlân Rengpa chu Josefa kuang khan a om maia, intângna in nghâktuhai khom an rentirhaia;

²² khan, intângna in nghâktu khan, intângna ina om tuhai chunga hruaitu’n an siaa; khanchu an itho murdi kha Josefa itho a hong ni tâka.

²³ Rengpa chu Josefa kuanga a oma, a sintho murdi Rengpa’n hlo an chuktir pe sikin; intângna in enkoltu khan Josefa kuta thil om kha ite a nangna om pe ta maka.