IRPHUTNA 31 - PATHIAN LEKHABU IRTHIANG C.L. Bible (BSI)

Labana in ata Jakoba rotna

¹ Khanchu, Labana nâihaiin, “Jakoba’n kin pa neinun murdi a lâk pe ving ta, hiang dôra roiinpuina hi a idong a ni ta,” an iti thu Jakoba’n an hriata.

² Khanchu Jakoba’n Labana hmêl a ena, matona angin a hmâi tâi pe ta mah ti an hriata;

³ khan Rengpa’n Jakoba kuanga khan, “Ni’rchibulhai omna rama ni sûngsuakhai kuang fe nôk ta ro, ni kuang om mai ki ti,” a tia.

⁴ Khanchu Jakoba’n mi a tîra, sûl hmuna kêlhai omna hmun tiang Rakili le Leaii a koihaia.

⁵ Khan an kuang khan, “Nin pa hmêl ki enin, matona ang khan ni ta mah ti kin hriata, khannisianlân ka pa Pathian chu ki kuang a om mai a ni.

⁶ Nangni khomin nin pa sin hi ki theidôr ki tho ti nin hmu,

⁷ khannisianlân nin pa’n a ni huanga, ki hlo khom hi voisôm dênin a ni thûl indanglam pe tâka; khannisianlân Pathianin a ni ompui mai.

⁸ A zia chial rek rukhai hi ni hlo ni a ti, a ti nôka; kêlhaiin a te chial rekruk an nei intama, khanchu a zia a râng irtong kai kêng ni hlo a ti nôka; kêl murdi’n a râng irtongin an inte intam nôka.

⁹ Khaang khan Pathianin nin pa kêlhai chu a lâkpai pea; keima a ni ipêk tâk a ni hi.

¹⁰ Khan hiang hi a nia, kêl an inrâi phutin ki’rmang tiang a pa kêl hrungtu kêl chu, a râng irtongin, a chial rekruk, debekbuk an ini hrang a ni tih ki hmua.

¹¹ Khan ki’rmangin Pathian vântirtônhaiin, ‘Jakoba an ni lei tia,’ ‘Hin ki om’, ki tia.

¹² Khan, anni khan, hong thîrin lân, hong envêl ta, a pa kêl hrungtuhai kêltêhai so, a râng irtong, chial rekruk le debekbuk kêng an itam a ni so te: Labana’n ni chunga a thilthohai hi kin inhriat ving;

¹³ kei hi, ‘Lungphuna sahriak ni ipol, ki kuanga chong ni inkungna Bethel Pathian kha ki ni: atûn hin thoiin lân, hi ram hi suaksan ta ro, ni’rzirna rama fe nôk ta ro,’ a tia.

¹⁴ Khan Rakili le Leaii’n hiang hin an tia, “Kin pa ina son kin hrangin mantum le irchon kin lua thei hrang a la iom ma ni?

¹⁵ ama’n chu khohmal ena a ni ien mo ni ta ma? a ni zuara, kin man khom a fâk zoi ta.

¹⁶ Pathianin kin pa sum a ilâkpai pe murdi chu keini le kin nâihai ta a ni hi te: khasikin Pathianin ni kuanga a iti murdi chu tho ta ro,” an tia.

¹⁷ Khanchu Jakoba chu a thoia, a nâihai le a dôngmahai chu saringsei chunga an chuangtirhaia;

¹⁸ khan Kanaan rama a pa Isaka kuanga fe hrangin a kêl murdi le a sum irtik murdi Padana-ram-ah a neinun murdihai chôiin an fe tâka.

¹⁹ Khan, Labana chu a belra mul ep hrangin a lei fe pata; khan Rakili’n a pa millim an rûk pea.

²⁰ Khan, Jakoba khom Suria mi Labana inhriat loi kârin a rotsana, ite hril viat loiin.

²¹ Khaangin a neinun tam dôr chôiin a rot tâka; khan a thoia, tuipui kha a’rkâna, Gilead tâng tiang panin a fea.

Labana’n Jakoba a’rzûl

²² Khan sûn thum zoia chu Jakoba a rot ti Labana kha an hrila.

²³ Khanchu a hnungzuihai hruaihaiin, sûn sari fena lama a’rzûla; Gilead tânga a hong phâka.

²⁴ Khan, Suria mi Labana kuanga khan zâna a’rmang tiang Pathian a zuang pea, a kuang khan, “Jakoba kuang ite a sia le a sa thu hril loi hrangin irdîn ro,” a tia.

²⁵ Khan Labana’n Jakoba a phâk tâka, Jakoba chu tânga khan a puan in a lei sin zoi tâka: Labana khom a hnungzuihai leh Gilead tânga puan in an sina.

²⁶ Khan Labana’n Jakoba kuanga khan, “I zât thil mo ni itho tâk, keima inhre loia ni irot tâk hi te, ki nâinuhai hi nu le pa boi anga irdon loia ni ihruaihai tâk hi?

²⁷ Itho mo inrûka ni irotpuihai, raifân taka hla, khuang leh hoitaka nangni intha theina hrang thu ite hril loia ni iom,

²⁸ ki tûhai le ki nâihai tumhai hrang ni ni iphal loi? ni thil tho hi invêt tho dân anga ni itho a ni.

²⁹ Nang insiat thei ki nih ti ni isôn loi ma ni: khannisianlân ni pa Pathianin zânin khan, ‘Jakoba kuanga ite a sia le a sa hril loi hrangin irdîn ro,’ tiin a ni hrila.

³⁰ Khan ni pa irngaiin a fe nuam zap khom unglân, itho sika mo ki pathiantehai nin ni inrûk pe?” a tia.

³¹ Khan Jakoba’n Labana kuanga khan, “Nang ki chi sika a ni; ni nâinuhai hi ni sutpai nôk ni ti, tiin ki insâp sika a ni.

³² Tukhomin ni pathian millim lâka omna chu dam no nihai; ni urênghai mithmua ni ta kin kuang om chu eninfelin lân, la ro,” a tia. Rakili’n a inrûk ti Jakoba lakin inhre maka.

³³ Khan Labana chu Jakoba puan ina, Leaii puan ina, le a siahlonuhai ruai puan ina a lût chita, khannisian ite hmu maka; khan Leaii puan in ata a suaka Rakili puan ina a lûta.

³⁴ Khan Rakili chu millimtehai kha a lei lâka, saringsei neinun siana kâra a lei thupa, a lei toiphaa, khan Labana’n puan in a en chita, hmu maka.

³⁵ Khan a pa kuang khan, “Ni makunga nang ki thoi pe no sikin, ki rêngpa, ni ning chu inmurtir no ro, nupang hmu ngai ki’rvei lai tak a ni sikin,” a tia. A zong irvêl ngot lakin hmu zoi ta maka.

³⁶ Khan, Jakoba ning an mur pea, Labana kha a hâla; Jakoba’n Labana kuang khan, “Imo ki insiatna, imo ki sualna, hi dôr ni ni hong irzûl?

³⁷ Ki neinun murdi ni phong chit khoma, ni neinun imo ni iman mo a om? eini ruai kâra tu mo a dik le dikloi ni urênghai le ki urênghai mithmua hin infel ei tih hong sia roh.

³⁸ Hi kum sômhni ni kuanga ki om tâka, ni belrapuihai, ni kêlpuihai an intea, a dam suak ngai loi mo an om, ni belrachal khom ite la thatin fa ngai ma ung;

³⁹ ramsa ithohai lua nang hril nuam loiin; keiin ki ta leh kêng ki irthûltir ngai, sûna mo zâna mo irhmang chu tuam hrang ni ni, ni ti ngai sikin.

⁴⁰ Hiang hin sin ki tho ngai; sûna misa luma, zâna a dâi irsein deng ni nin theitir tak taka, a zâl khom zâl ngai ma ung.

⁴¹ Kha kum sômhni sûng chu ni ina ki oma: ni nâinuhai ruai hlo hrangin kum sôm hleiminli samâk ki changa; ni kêlhai hlo hrangin kum ruk ni sin ki la tho nôka: ki hlo lak voisôm dên rakin nin danglamtira.

⁴² Ka pa Pathian, Abrahama Pathian, Isaka Pathian ki kuang om no sianlân chu, kut koronga ni ni infetir hrang kêng a inih mo ni mah. Pathianin ki dengthei le ki dûktonghai hi a le’nhriat sikin, mizân khan chu nang a irchu a ni ta,” a tia.

Jakoba le Labana chonginkungna

⁴³ Khanchu Labana’n Jakoba kuang khan, “Hi nupanghai hi ki nâihai an nia, an nâihai khom hi ki ta an nia, kêlhai khom hi ki kêlhai ving an ni, ni ihmu murdi hi keima ta ving a ni: a vuan hin hi ki nâihai le an nâihai chunga hin imo ki’rcham la om?

⁴⁴ tho kei le nangma kâra hin chonginkung ei ti; nang le keima kâra inhriatna hrangin ni ri se,” a tia.

⁴⁵ Khanchu Jakoba’n lung a lâka, lungin a phuna,

⁴⁶ khan Jakoba’n a urênghai kuang khan, “Lung va bukhai roi,” a tia; lung an hong buka, an phunna hmuna bu anh an fâka.

⁴⁷ Khan Labana’n kha lung irchuan hmun kha chu Jegar-Sahadutha a phuaa; Jakoba’n chu Galeed a phuaa.

⁴⁸ Khan, Labana’n, “Hi lung irchuan hi kei le nangma kâra inhriat maina a ni,” a tia. Khasikin a’rhming khom Galeed ti’n iphua a ni ta.

⁴⁹ Mizpa khom an ti sa. Labana’n, “Irsena ei om hnungin, Rengpa’n ni enkol ri se.

⁵⁰ Ki nâinuhai hi, deng ni intheitirhaia, dôngma dang ni neiin chu, tûte om loina hmuna, en ro, Pathian chu nang le kei nin hriatpuitu a ni,” a ti saa.

⁵¹ Khan Labana ngêtin Jakoba kuanga khan, “Hi lung irchuan hi en ro, nang le keima kâra lung ki iphun khom hi en ro,

⁵² ite ei irti loina hrangin hi lung irchuan leh phun hi eini ruai kâra inhriat maina lung changin om ri se.

⁵³ Abrahama Pathian, Nahora Pathian, an pa Pathianin ei kâra thu chu ngaitua ri se,” a ti nôka. Khan Jakoba’n a pa Isaka Pathian irhmingin khomâk a’rsâma.

⁵⁴ Khan Jakoba’n tânga khan irbôlna Pathian a thoa, a urênghai kha bai fâk hrangin a koihaia; khanchu bai an fâka, tânga khan an riak tâka.

⁵⁵ Labana chu zînga a thoia, a tûhai le a nâinuhai a tumhaia; sat a vurhai zoiin, Labana chu ama omna tiang a kîr nôk ta.