IRPHUTNA 28 - PATHIAN LEKHABU IRTHIANG C.L. Bible (BSI)

¹ Khanchu, Isaka’n Jakoba kha a koia, sat a vura, thu a pêka a kuanga khan, “Kanaan ram dôngmatehai hi dôngma hrangin ni ienhai hrang ni mah.

² Thoiin lân Padanaram-ah ni nu pa Bethuela ina fe’n lân, khataka ni nu nuchapa Labana nâinuhai laia inkhat va luahai roh.

³ Khanchu Pathian Itinrêng thotheiin sat nang vur a ti; nam tamtak ni la hong chang theina hrangin, na’npungtir a ti;

⁴ ni mikhualna ram, Pathianin Abrahama a ipêk hi, ni lua theina hrangin Abrahama satvurna khom nang indong sa ri se; nang le nir chihai khom,” a tia.

⁵ Khanchu Isaka’n Jakoba kha an fetira; khan Padana-ram-ah Esaua le Jakoba nu Rebeki nuchapa mi, Bethuela nâipa Labana kuanga khan a fe tâka.

Esaua’n dôngma dang a nei

⁶ Khan Esaua chu Jakoba kha a pa Isaka’n sat a vur tâk sikin, dôngma nei hrangin Padana-ram-ah a tîra; sat a vur lai khan, Kanaan rama dôngmatehai hi dôngma hrangin ni ienhai hrang ni ma, tiin thu a pêk, ti le

⁷ Jakoba’n a nu le a pa thu lâkin Padana-ram-ah a fe tah ti an hriata;

⁸ khanchu Esaua’n Kanaan dôngmatehaiin a pa, milung chuk mah ti inhriatin;

⁹ khanchu Esaua chu Ismaela kuang a va fea; Abrahama nâipa Ismaela nâinu Mahalathi, Nabaiotha farnu chu a dôngma hrangin, a dôngmahai khêla a nei nôka.

Bethel hmuna Jakoba’n irmang a nei

¹⁰ Khan Jakoba chu Berseba rengata a suaka, Haran khua a pana;

¹¹ misa a tâk pe tâk sikin, lam chimripa hmun irthiangna hmuna a riaka; khataka khan lung inkhat a lâka, lukhamin a doa; a zâlin a in tâka.

¹² Khan irmang a phana, irngai ro, irnêng chunga hin leidâk a zuang irdoa, a sîp irzumin irvân a suna, Pathian vântirtônhai an luiin an chuma.

¹³ Irngai ro, a sîp taka Rengpa an dinga, “Kei hi Rengpa, ni pu Abrahama Pathian le Isaka Pathian ki ni: ni zâlna hmun kha nang le nir chihai nangni pe ki ti;

¹⁴ khan nir chi khom irnêng chung sip an ti, nitâk tiang, nisua tiang, sim tiang, hmâr tiang la bit zoi nin ti: nangma ata nam tin la hong harsuak an ti.

¹⁵ Irngai ro, kei ni kuang om ki ta, ni fena hmun tina nang hrung ki ti; hi rama hin nang hruai nôk ki ti; ni kuanga ki ihril hi a tak a tung mâka nang irnghil no ning,” a tia.

¹⁶ Khan Jakoba kha a hong harin chu, “Hi hmun hin Rengpa a om ngêt; keima’n le’nhre loiin,” a tia.

¹⁷ “Khanchu hi hmun hi ichi le inzak a om tâk a ni! hmun dang ni ma, Pathian in kêng a ini, hi kêng hi irvân fena lampui a lei ini,” a tia.

¹⁸ Khan zînga Jakoba chu a thoia, lukham a ido kha a lâka, lungin a phuna, a sîp tiang sahriak a buaka;

¹⁹ khanchu kha hmun irhminga khan Bethel a tia: a khua irhming masa chu Lus a ni.

²⁰ Khan Jakoba’n, “Ka pa ina irtharngamtaka ki kîr theina hrangin Pathian ki kuang a oma,

²¹ hi kin zin ram lama a ni hruaia, fâk hrang bu le silkai a ni pêk hrangin chu, Rengpa chu ki Pathian ni a ti.

²² Hi ki lungphun khom hi, Pathian in ni a ta; khan ni ni ipêk hrang murdihai khom hin sôma inkhat chu nang pe ngêt ki ti,” tiin chong an kunga.