IRPHUTNA 19 - PATHIAN LEKHABU IRTHIANG C.L. Bible (BSI)

Sodom khua sualzia

¹ Khan, vântîrtôn inhni khohloi tiang Sodom khua an tunga; Lota chu Sodom khua dâimitzînga a lei toia: Lota’n a hmuhaia, lômhai hrangin a ngîra; khûksadelin chubai a mûkhaia;

² “khan lungkham takin puhaio, nin sinthotu ina hin irngam unglân, nin ke nin kut irsûkin zân riak unglân, zîng nôka nin thoi le nin fena hranga la fe ta roi,” a tia. Khannisianlân anni’n chu, “Ni no ni, keini chu kholaidunga riak kin ti,” an tia.

³ Khannisianlân a ngênhai hrai sikin, an zuia, a ina an lûta, bu anh a suanga, bu anh tuitak fâkin an oma.

⁴ Khannisianlân, an zâl mân Sodom khuaa mi, bunglu bungdop, a lian a chînin an irhuala;

⁵ Khan Lota kuanga khan, “A vuana ni ina mi hong lûthai kha khôn mo an om? anni kin irpôlpuihai theina hrangin kin kuang zuang tuanghai ro,” an tia.

⁶ Khan, Lota chu mikot a van honga a enhaia, in a khâr nôka.

⁷ Khan, “Urênghaio lungkham takin hi angpa hrai hin chu sual no roi ba!

⁸ irngai roi, pasal la irpôlpui ngai loi nâi dôngmate inhni ki nei: lung nin kham unglân, anni hi nangni kuta nin izo zôt lôhai roi, a sa nin iti angin ompuihai roi; hi mihai chunga vai hin ite dengintheihai no roi, khasikin kêng ki ina an hong irngam,” a tia.

⁹ Khan anni’n chu, “Irkhâi zel ro,” an tia. Khanchu, “Hi mi hi mo, hitaka om hranga hong lût, roirêltu chang nuam a la ni sa rêk: atûn chu annihai nêkin, nangma chunga kêng nang kin isoisak ual hrang,” an tia. Khan, Lota kha inkhâr insiatin an irbuanpuia.

¹⁰ Khannisian, mihai khan an selhaia, Lota chu in sûnga an kai lûta in an khârkhuma;

¹¹ khan inkhâr kôla omhai, a chîn a lianhai mit an incho pehaia: khanchu inkhâr hmu thei loiin an siahai ta.

Lota’n Sodom khua a suaksan

¹² Khan, mi inhnihai khan Lota kuang, “Hi mihai ti no hi ni irnâipui mo an la om? Nâipasal, nupang, ni moi ni mâk murdi hruai suakhaiin lân, hi khua hi suaksan ta roi,

¹³ Rengpa inhriatin an sualzia an thang tâk sikin, hi khua hi insiat hrang kin ni ta: insiatpai hrangin Rengpa’n a ni zuang itîr a ni,” an tia.

¹⁴ Khanchu, Lota chu a suaka, a mâkpahai a va hrilhaia; “Thoi unglân, hi khua hi suaksan ta roi, Rengpa’n hi khua hi a ihâl hrang a ni ta,” a tia. Khannisianlân a mâkhaiin chu taksôn loiin fiamthu angin an lâka.

¹⁵ Khan zîng kôl a hong irsalin chu, “Thoiin lân, ni dôngma le ni nâi dôngmate inhnihai hi hruaihai ro; khano’nchu, hi khua siatna hin thina nin ti,” tiin Lota chu an tuar tâka.

¹⁶ Khannisianlân irhnot loiin, ar ial maia; khanchu Rengpa’n lung an khamhai sikin, a kut leh a dôngma, a nâihai kuta chelin kho pên tiang an hnûk dokhaia, an siahai ta.

¹⁷ Khan hiang hi a nia, kho pên tiang an om zoiin, “Ni hring theina hrangin intân ta ro; ni hnung khom irhei no ro, phâizôla khom hin irngam viat no’n lân, tâng tiang intân ro; khano’nchu ni ithi sa hrang kêng,” an tia.

¹⁸ Khannisian Lota’n “Ka pu hiang bâk hin chu ni no ri se ba.

¹⁹ Irngai ro, ni sintho hin chu ni mit ki itung mo ni ma. Nangma khonzâna chu a liana, kha khonzâna kha ki chunga hin ni saninzôkin nin lang pe’n lân, so tânga son chu intân thei no ning; thil saloi tongin ki ithi hrang kêng.

²⁰ Irngai ro, so khua chînte so kêng intâna tung lat theina anaitak a ini; kho chînte ni khomsian ki zôk theina hrangin so son nin tântir ro,” a tia.

²¹ Khan anni khan, “Irngai ro, hi thil ni iti khom hi nang ki pom pe, khua ni iti khom so nang hâl pe no ning.

²² Irhnotin lân, so son van tân ro, ni tung mâka chu ite la ti thei ual no ning,” a tia. Khasikin kha kho’rhming khom kha Zoar an ti ta.

Sodom le Gomora kângsiat thu

²³ Lota’n Zoar khua a tung tena chu, irnêng chung chu misa a hong ir-al suak tâka,

²⁴ khan Rengpa’n Sodom le Gomora khua chunga khan irvâna Rengpa kuang ata meiri-al ropuivânsâng angin an thotira;

²⁵ khanchu kha khua le phâizôl lian dôr le a mi omhai le thil ite mông thei loiin a hâl irhmang zit tâka.

²⁶ A dôngma chu Lota hnunga omin a hnung tiang a’rheia, lungmichi a chang zel tâka.

²⁷ Khan Abrahama chu zînga a thoiin Rengpa kôla a ngîrna hmuna a fea;

²⁸ khan Sodom le Gomora phâizôl murdihai chu a thîra, a ena; kha rama meikhû kha hâlirhmang chit angin a khû irzâm hlut hlutin a oma.

²⁹ Khan hiang hi a nia, Pathianin phâizôl a hâl irhmang laia, Lota omna hmun kha Pathianin Abrahama kha an hriat maia, Lota chu irhmangna hmun ata a sansuak a ni.

Moab le Amon-hai suakna bul

³⁰ Khan Lota kha Zoar khua ata a suaka, tânga a oma; a nâi dôngmatehai inhni leh Zoar khuaa om ngam mahaia: an parêngin rôla an oma.

³¹ Khan a unu’n a sangnu kuang khan, “Ei pa laka hi a tar tâka, irnêng chunga hin dân ang taka ni’rpôlpui hrang lak pasal inkhat lua om ta mahaia;

³² tho ei pa hi uain in intir ei ta, irchi ei pung theina hrangin zâlpui ei ti,” an tia.

³³ Khanchu kha ni zân chu uain an in intira: a unu kha a pa kôla lûtin a va zâlpuia, an pa’n a zâlpui khom inhre loiin a thoi nôka.

³⁴ Khanchu zîng nôka chu a unu’n, a sangnu kuang khan, “Irngai ro, mizân zân khan ei pa ki zâlpuia, a vuan zân khom uain in intir ei ta; nangma lûtin lân, ei pa irchi pung hrangin va zâlpui ro,” a tia.

³⁵ Khan hi nî zân khom hin an pa chu uain an in intira: a sangnu kha a va lûta a pa leh an zâlsuama, a zâlpui le a thoi nôk khom inhre loiin.

³⁶ Khaang khan Lota nâinuhaiin an pa irpôlpuiin nâi an vonga;

³⁷ a unu’n nâipasal a neia, a’rhming chu Moab a tia: hi mi hi atûna Moab-hai irchibul chu a ni.

³⁸ Khan, a sangnu khomin nâipasal a neia, a’rhming chu Ben-amona a tia, hi mi hi atûn laia Amona-hai irchibul hi a ni.