IRPHUTNA 18 - PATHIAN LEKHABU IRTHIANG C.L. Bible (BSI)

Abrahama kuanga nâipasal pe hranga chonginkung

¹ Abrahama chu sûn lum laitaka puan in mikot kôla a toi lai takin, Rengpa chu Mamre seso thing kôla a hong inlâr pea;

² khan a hong tanga, a ena, khan irngai ro, a kôla khan mi inthum ngîr a hmua; a hmu infelhaiin chu, anni lômhai hrangin a van tâna, khûksadelin chubai a va mûkhaia;

³ “Ka pu lung nin khamin lân, ni siahlo hi ni lôi no hrâm roh.

⁴ Tui tômte hong la ki ta, nin kehai irsu unglân, thing dâihlîm hnuaia hin sôl irngam roi.

⁵ Bai fâk zât chînte va la ki ta, nin fena lama nin hrât theina hrangin, ki in nin ni lômpuina le keima’n nin sin ki thôna nin chang pe roi,” a tia. khan anni khomin, “Ni iti angin va tho ta ro,” an tia.

⁶ Khanchu Abrahama chu Sari omna puan in sûnga a lût lata, “Bai indiap sai, danh thum siamin lân, hmet inzôiin changpêr angin siam ro,” a tia.

⁷ Khanchu Abrahama chu sehrât omna tiang a fea, sehrâtchal satak hi a hong kaia, a sin thotuhai kuanga a pêka, an siam pe lata.

⁸ Sehrât dût le sehrâtchal suang sai a lâka, a va darhaia; khan thing kôla a ngîr chiana, anni’n an nêk pe tâka.

⁹ Khan anni’n a kuanga khan, “Ni dôngma Sari teh khôn mo a om?” an tia. khan ama’n, “So puan in sûnga son,” a tia.

¹⁰ Khan anni laia inkhatin, “Zoro hi a hong tung nôk tika chu ni kuanga hong nôk ki ti, khan irngai ro, ni dôngma Sari’n nâipasal nei a ti,” a tia. khan a hnung tiang puan in mikot ata Sari’n an hriat chiana.

¹¹ Abrahama le Sari chu ulian tak tartak anni tâka; nupang ihmu ngai khom ite hmu ta maka;

¹² khanchu Sari’n, “Tar ki ni zoi hin lômna mo la nei ning, ki rêngpa lak a ulian ok tâka?” iti insâpin a minui an za pea.

¹³ Khan, Rengpa’n Abrahama kuang khan, “Itho sikin mo Sari’n kei tarnu hin nâi ki la inei thei hrang mo? tia a innui?

¹⁴ Rengpa hrangin thiltho hi a intak hrang mo a isôn? zoro’nkunga, a zoro a hong tung tika chu, ni kuang zuang nôk ki ta, Sari’n nâipasal nei a ti,” a tia.

¹⁵ Khanchu Sari’n, “Innui lua ma ung duah” tiin chit le rumrâiin a tia. khan ama’n chu a ni lo loi kha ti no ro, “Nin nui kha te,” a tia.

Abrahama’n Sodom khua hrang a ngên

¹⁶ Khan, mi murdi an thoia, Sodom khua tiang an ena: Abrahama’n annihai thak hrangin a om saa.

¹⁷ Khan Rengpa’n, “Ki itho hrang hi Abrahama teh hril loiin mo om ning?

¹⁸ Abrahama lak hi irchi tamtak le sinthothei a la ini hrang a nia; ama rengata hi rammual mi tin sat la vur ki ti.

¹⁹ Rengpa hnung an zui theina hrangin a hnunga a nâihai le a in mihai, thil fel le roirêl indik hrangin kin kung tâk sikin, khanchu ama chungchânga hrila Rengpa’n Abrahama chunga a tung theina hrangin,” a tia.

²⁰ Khanchu Rengpa’n, “Sodom le Gomora khua irhû a siatin a sate’n an sual tâk sikin;

²¹ atûn zu fe ki tah an irhû a isiat ang hin an sual le sualloi zu’nfel ki ta, inhre thei ni a ti,”

²² khan mi inhni an suaka Sodom mâksanin, khan Rengpa chu Abrahama kuang a la oma.

²³ Khan Abrahama’n a va pana, “Mi felhai khom hi mi dik loihai laia hin ni ithathai sa hrang ma ni?

²⁴ kho sûnga hin chu mi fel sômringa vêl chu an om khom a ni thei: a sûnga mi fel sômringa omhai khom hôihai loiin an khua hi ni insiat hrang ma ni?

²⁵ nangma’n chu khaanga mi felhai mi suala an lût thei loina hrangin, mi felhai hi a sualhai le thathai hrangin chu tak nang sôn ma unga; irnêng chunga roirêltu’n fel takin a irêl ngai mo ni ma?” a tia.

²⁶ Khanchu Rengpa’n, “Sodom kho sûnga hin mi fel sômringa ki hmu khomin, anni sikin a khua pumpui la hôi ki ti,” a tia.

²⁷ Khan Abrahama’n, “Rengpa keima pilpoka siam hin nang ki chongpui thei tâkin te,

²⁸ mi fel chu ringa irsamin sômringa an kâi no khomin ni ithathai hrang mo?” a ti nôka. Khan Rengpa’n “Sôm minli ringa ki hmu’n chu thathai no ning,” a tia.

²⁹ Kha hnung chu a’rdon nôka, “Sômminli vai mi fel ni hmu’n te,” a tia. Ama’n, “Sômminli vai an om khomin thathai no ning,” a tia.

³⁰ Khan Abrahama’n, “O Rengpa ni ning chu inmur no ro, nang la’rdon nôk rong: sômthum vai an omin te,” a tia. Khan ama’n, “Sômthum vai an om khomin thathai no ning,” a tia.

³¹ Khan ama’n irngai ro, nang ki ichongpui thei a ni sikin: “Sômhni vai an omin te,” a tia. Khan, ama’n, “Sômhni vai an om khomin irhmangtir no ning,” a tia.

³² Khan ama’n, “O Rengpa ni ning chu inmur no ro, voikhat vai nang irdon nôk ki ti, sômkhat vai an niin te,” a tia. Khan, ama’n chu, “Sômkhat vai anni khomin thathai no ning,” a tia.

³³ Khanchu Rengpa chu Abrahama leh an chong zoiin chu a fe tâka; khan Abrahama khom a omna tiang a kîr nôk tâka.