IRPHUTNA 17 - PATHIAN LEKHABU IRTHIANG C.L. Bible (BSI)

Thuthung irsinsiana hranga sertan

¹ Khan Abrama kha kum 99 mi a niin Rengpa chu a kuang an lâr pea, a iti chu, “Kei Pathian itinrêng thothei ki ni, ki kôla omin lân, satirkipin om mai roh.

² Khanchu nangma le ei kâra thu thung ki ta, ni’rchi inpungtir ki ti,” a tia.

³ Khan, Abrama chu khûksadelin a oma, Pathianin a chongpuia;

⁴ “Irngai ro, keima’n ki thuthung chu nangma kuang ki intung a ni hi, atûn ata nam tin chi tin inpungpu ni ta ni ti.

⁵ Ni’rhming khom Abram ni ta no nia; Abrahama ni ta ni ti; nam dang dang inpungpu’n nang ki isiam a ni ta.

⁶ Nam tin chi tin nangma ata suak an ta, senkhat chu rêng ni an ta, rammual bitin pung ta ni ti.

⁷ Khan kei le nangma le ni’rchi hong pung hranghai Pathian ni hrangin kumtuanga hek ta loi hranga thuthung ki indet a ni ta.

⁸ Khan ni kôl le ni hnunga ni’rchi la hong om hranghaiin chu ni mikhualna ram, Kanaan ram murdi hi kumkhua irchon hrangin nangni ki pêk; khan keima hi an Pathian ni ki ti,” a tia.

⁹ Khanchu Pathian ngêtin Abrahama kuanga khan, “Nangma’n chu ki thuthung hi ni izôm hrang a ni; nangin ni izôm ngêt hrang a ni. Ni hnunga ni’rchihai dênin an izôm ving hrang a ni.

¹⁰ Hi hi nang le keima le ni’rchihai kâra thuthung chu a ni, nin laia pasal murdi chu ser nin itan hrang a ni.

¹¹ Khanchu, nin servun taksa kha tanin nin iom hrang a ni; hi hi kêng nangma le keima kâra thuthung irsinsiana a inih hrang a ni.

¹² Khanchu a suak ata sûn riat ni sûnga chu nangma nâi mo, mi nâi ni iompui mo, mikhual mo, suma ni irchôk a ni khomin, pasal murdi chu a ser ni itan hrang a ni.

¹³ Ni ina suak khom, suma ni irchôk khom a ser ni itan hrang a ni: khan kêng ki thuthung kha kumtuang thuthung a nih ti nin taksa khan a iom hrang.

¹⁴ Khan, pasal ser tanloi, a vun tan loia om chu, a’rchihai lai ata thatpai a ini hrang a ni; ama’n chu ki thuthung a insiat a ni,” a ti nôka.

¹⁵ Khan Pathian ngêtin Abrahama kuanga khan, “Ni dôngma Saraii khom a’rhming Saraii ti ta no chi nia; a’rhming chu Sari ni ta a ti.

¹⁶ Khan ama khom satvur ki ta, ama rengata nâipa nang ki ipêk hrang a ni, ama chu satvur ki ta, nam chi tin irchinu ni ta a ti; ama ata nam chi tin le rêng khom la suak an ti,” a ti nôka.

¹⁷ Khanchu Abrahama chu an boka, a lungrîla, a minui an za pea, “Kum irzakhat mi hin mo, nâi a la inei hrang? Sari kum sômkuak mi hin mo nâi a la inei hrang?” a tia.

¹⁸ Khan Abrahama’n Pathian kuang, “Ismaela hi ni makunga om thei ni sianlân!” a tia.

¹⁹ Khan Pathianin, “Ni thei no ni, ni dôngma Sari’n nâipasal nang neipui a ti; a’rhming khom Isaka phua ni ti: iti’n ki thuthung chu hi zoia irchihai hrang khomin kumkhua thuthung ni hrangin ki indet a ni.

²⁰ Ismaela chungthu khom irngaitua ki ti: irngai ro, ama chu sat ki vur ta, irchi tamtak inpung a ta; ama’n chu rêng sômkhat inhni nei a ta, ama khom chi inpungtu lian takin siam ki ti.

²¹ Ki thuthung hi chu Isaka, nakuma Sari’n atûn lai zoroa a inei hrangpa kuanga vai kêng ki indet ual hrang a ni,” a tia.

²² Khanchu a kuanga thuhril chu a monga, khan Pathianin Abrahama kha a suaksan ta.

²³ Khan, Abrahama chu a nâipa Ismaela le a ina suakhai le sum le puana a irchôkhai murdi, Abrahama urênghai laia pasal murdi a hruaihaia, Pathianin a ihril pe ang takin, kha ni sûn zel khan an servun a tan pehaia.

²⁴ Khan, Abrahama khom a servun taksa an tan lai hin kum 99 mi a ni.

²⁵ Khan, a nâipa Ismaela servun taksa an tan lai hin kum 13 mi a ni.

²⁶ Hi ni sûn ata hi Abrahama le a nâipa Ismaela khom sertan an ni ta.

²⁷ A urênghai le a ina suakhai le sum le puana a irchôkhai khom an rêngin sertan an hong ni ving ta.