IRPHUTNA 11 - PATHIAN LEKHABU IRTHIANG C.L. Bible (BSI)

Babel in irsâng

¹ Khanchu irnêng chunga mi murdi hi chong hmunkhat, thuhril lam hmunkhat an ni vinga.

² Khan hiang hi a nia, nisua tiang an irthon laiin Sinar rama phâizôl an hmua; kha hmun khan om hmun an khuara,

³ khan “Tho pilrôngar siam ei ta, a sate’n hâl inhmin ei ti,” an irtia. Khanchu lung irthûlin pilrôngar hmangin âlkatara leh inluanin.

⁴ Khanchu, “Tho khopui siam ei ti, in irsâng a sîp irzumin irvân sun rakin siam ei ta, ei irhming an thang theina hrangin, khano’nchu irnêng chunga hin irthek indarh zoiin om ei ti,” an tia.

⁵ Khan, Rengpa’n chu mihriam nâihaiin khopui le in irsâng an isin en hrangin a zuanga;

⁶ khan, Rengpa’n “Irngai roi, hi mihai hi pumkhat an nia; hi sin hi iphut a ni; atûn chu hi thil an itho hi khap thei zât khom ni ta no ni.

⁷ Tho zu fe ei ta, chong an irhlet thei loina hrangin an chong zu’ndanglam pehai ei ti,” a tia.

⁸ Khatak ata Rengpa’n annihai kha irnêng chunga a’rthek indartirhaia: khanchu an khua siam kha an mâksana;

⁹ khasikin a’rhming khom Babel an phuaa; Rengpa’n kha ni rengata kha irnêng chunga mihai hi chong dangin an chongtirhaia, a irthek indartirhai a ni ta.

Sema irchihai

¹⁰ Hi hi Sema irchihai chu an ni. Sema chu kum 100 mi a nia, tuilêt zoi kum hni tena chu nâipasal Arpaksada a neia:

¹¹ khan Arpaksada a nei zoiin Sema chu kum 500 a la dama nâipasal le nâinupang a la neihai sa.

¹² Khan Arpaksada’n kum sômthum ringa a ni le nâipasal Sela a neia;

¹³ khan Sela a nei zoiin Arpaksada chu kum 403 a la dama, nâinupang le nâipasal a la neihai sa.

¹⁴ Khan, Sela kha kum 30 a ni le nâipasal Ebera a neia;

¹⁵ khan Ebera a nei zoiin Sela chu kum 403 a la dama, nâinupang le nâipasal a la neihai sa.

¹⁶ Khan, Ebera’n kum 34 a ni le nâipasal Pelega a neia;

¹⁷ khan, Pelega a nei zoiin Ebera chu kum 430 a la dama, nâinupang le nâipasal a neihai sa.

¹⁸ Khan, Pelega khan kum 30 a ni le nâipasal Reua a neia;

¹⁹ khan Reua a nei zoiin Pelega chu kum 209 a la dama, nâinupang le nâipasal a neihai sa.

²⁰ Khan Reua khan kum 32 a ni le nâipasal Seruga a neia:

²¹ khan Seruga a nei zoiin Reua chu kum 207 a la dama, nâinupang le nâipasal a neihai sa.

²² Khan Seruga khan kum 30 a ni le nâipasal Nahora a neia:

²³ khan Nahora a nei zoiin Saruga chu kum 200 a la dama, nâinupang le nâipasal a neihai sa.

²⁴ Khan Nahora kha kum 29 a ni le nâipasal Tera a neia;

²⁵ khan Tera a nei zoiin Nahora chu kum 119 a la dama, nâinupang le nâipasal a neihai sa.

²⁶ Khan Tera kha kum 70 a ni le nâipasal Abrama, Nahora, le Harana a neihai sa.

²⁷ Khan, hihai hi Tera irchihai chu an ni, Tera khan nâipasal Abrama, Nahora le Harana hai a neihaia: khan Harana khan nâipasal Lota a neia.

²⁸ Khan Harana chu a’rzirna rama, Kaldai hai khua Ur, a pa Tera kôla a thia.

²⁹ Khan Abrama le Nahora hai chu dôngma an neia: Abrama dôngma irhming chu Saraii a ni; Nahora dôngma irhming chu Harana nâinu Milkaii a ni, Harana chu Milkaii pa le Iskaii pa chu a ni.

³⁰ Khan Saraii chu nâi boiin a chinga.

³¹ Khan Tera’n a nâipa Abrama chu a tupa Lota, Harana nâipahai kuanga a moinu Saraii chu a hruaihaia; khan Kanaan fe hrangin Kaldai hai khua, Ur-ah irthokin an suaka; Haran khua an tunga, kha hmun khan om hmun an khuara.

³² Khan Tera dam sûng chu kum 205 a nia; khanchu, Tera chu Haran khuaa khan a thi ta.