IRPHUTNA 10 - PATHIAN LEKHABU IRTHIANG C.L. Bible (BSI)

Nova nâihai irchi

¹ Khan, Nova nâihai Sema, Hama le Jafeta hai irchi chu hiang hin a ni. Tuilian zoia chu nâilete an hong neihaia.

² Jafeta nâihai chu Gomera, Magoga, Madaia, Javana, Tubala, Meseka, le Tirasa hai an ni.

³ Khan Gomera nâipasalhai chu Askenaza, Rifata le Togarma hai an ni.

⁴ Khan Javana nâipasalhai chu Elisa, Tarsisa, Kitima, le Dodanima-hai an ni.

⁵ Annihai ata irthoka hin kêng, Jentail ramchârna hmuna an ram omna hrang hmun chita an indara; an chong hmang ang hrang le an nam om hrang ang chitin an om tâk.

⁶ Khan Hama nâihai chu Kusa, Mizraima, Puta le Kanaana hai an ni,

⁷ khan Kusa nâihai chu Seba, Havila, Sabta, Raama le Sabteka hai an ni, khan Raama nâihai chu Seba le Dedana an ni.

⁸ Khan Kusa khan chu nâipasal Nimroda kha a neia, ama hi irnênga hin mi hrâttak a hong ni tâka.

⁹ Rengpa makunga sa kâp hrâttak a nia; khasikin, “Rengpa makunga sa kâp hrâttak Nimroda ang a ni,” an iti ngai kha a ni.

¹⁰ Khan, a rêng chang phutna ram chu Sinar ram Babel khua, Erek khua, Akad khua le Kalne khuahai a nia;

¹¹ kha ram ata a suak zoiin, Assuria rama a lûta, Ninevi khua, Rehobot-ir khua, Kala khua,

¹² Ninevi le Kala khua kâra Resen khua a chuana. (Resen khua hi khua inthang tak a ni.)

¹³ Khan Mizraima khan Lud hai, Anam hai, Lebab hai, Nafta hai,

¹⁴ Pathros mihai, Kaslu mihai. Hi mihai hi Filistia le Kaftor mihai irchihai an ni.

¹⁵ Khan, Kanaana khan nâilutîr Sidona a neia, Hetha khom a nei nôka;

¹⁶ Jebus hai, Amor hai, Girgas hai le

¹⁷ Hiv mihai, Arka hai, Sin mihai, le

¹⁸ Arvad hai, Zemar hai, Hamath mihai an hong irzira: kha zoiin chu Kanaana namhai chu an irthek indarh zoi tâka.

¹⁹ Khan, Kanaana hai ramri chu Sidon khua ata Gerar sim tiang pang Kaza khua dênin; Sodom le Gomora le Adma le Zeboim sim tiang Lasa khua dênin a ni.

²⁰ Hihai hi kêng Hama irchihai an ini, an nam omdân hrang angin, an chong hmang hrang angin an nam le an irchi om hrang angin an om ta.

²¹ Khan Sema, Ebera nâihai irchibul, Jafeta upa khomin nâi a neia,

²² Sema nâihai chu Elama, Asura, Arpaksada, Luda, le Arama hai an ni.

²³ Khan Arama nâihai chu Uza, Hula, Gethera, le Masa hai an ni.

²⁴ Khan Arpaksada’n chu nâipasal Sela a neia; khan Sela’n nâi Ebera a neia.

²⁵ Khan Ebera’n nâipasal hni a neia: inkhat irhming chu Pelega a nia, a dam laiin a ram kha senin a oma; a sangpa irhming chu Joktana a ni.

²⁶ Khan Joktana’n nâi Almodada, Selefa, Hazarmavetha, Jera le

²⁷ Hadorama, Uzala, Dikla le

²⁸ Obala, Abimaela, Seba le

²⁹ Ofira, Havila le Jababa hai a neia: hihai murdi hi Joktana nâihai chu an ni.

³⁰ Khan an omna chu Mesa ata nisua tiang Sefar lam panna lam a nia.

³¹ Hihai hi kêng Sema irchihai an ini, an nam om hrang dân angin, an chong hmang hrang lam angin, an irchi om hrang le ram om hrang angin an oma.

³² Hihai hi Nova irchihai le nam omhai an ni, an irchihai angin, an irchihai laia, tuilêt zoi ata irnêng chunga chi tin nam tin a hong indarh a ni ta.