HOSEA 9 - PATHIAN LEKHABU IRTHIANG C.L. Bible (BSI)

Israel hremna hrang Hosea’n an puang

¹ O Israel, nam danghai angin raiinfân lûk lûk dôrin lôm no ro, ni Pathian kha nôti ni zuarsana, hruizôl tina a man kha nir ngai inhlua.

² Hrui le grep sômna khurhai khan an milung inchuk no nihaia, uain thar hlosam a ti.

³ Rengpa rama khan lêng no nihaia, Efraima kha Aigupta tiang kîr lik a ta, Assuria rama bu irthiang loi nêk an ti.

⁴ Rengpa kuang Uain kha bun suak no nihaia, an thil irhlanhai kha a ta hrangin lôm om ni ual no ni; an bai kha lusûnhai bu ang ni a ta, a nêk murdi porinche an ti; an bai kha an hringna hrang vai ni a ta, Rengpa ina hong lût no ni.

⁵ Inkhômpui ir-up nikhua le Rengpa kût nikhuaa khan imo nin itho hrang tâk?

⁶ Irngai roi, siatna zuang tung a ta, indarh an ta, Aigupta khan anni kha hong irkhôm ual a ta, Memfis khan lei phûm a ti; an tangkarua thil inditomhai kha kâng irkholin bôm a ta. An puan inhai khan hloi ilhlingnei om a ti.

⁷ Raifânna nikhuahai kha a zuang tunga, thuanna nikhuahai kha a zuang tung e; Israel khan kha kha inhria a ti. Ni tho’nchâina kha a tamin an roi irsâi loina an ipêtsanna kha a’rkhêl sikin, Deipu kha an vêta, irtha nei mi kha a invêt a ni.

⁸ Efraima râl enkoltu kha hi Pathian kuanga om a ni, deipu lak kha lamtuanin chângkamtu chânga a oma, a Pathian ina khom roi irbuloina a om.

⁹ Gibea khuaa om lai nikhuahai ang khan a sate’n anni kha an tho’nsuala. An pualoina kha inhre mai a ta, an sualnahai kha thuan a ti.

Israel sualna le a ra

¹⁰ Israel kha ramchâra grep ra ang maiin ki hmua. Nin pahai kha theipui, zoro masaa a ihmin masa angin ki hmu; khannisian anni kha peor tânga Baal chu an pana, thil inzakom taka khan an irpumpêk tâka, an irngaiinhlu tak millimhai ang dên khan an iporinche a ni.

¹¹ Efraima lak kha, a roiinpuina kha vâ angin vuangpat a ta. Nâi neihai, nâi vonghai, inrâihai om no nihai.

¹² An nâihai puihling khomhai sian pasal reng om loi hrangin insûntir ngêt ki ti. A ni, anni kha ki’rheisan tika chu, an chung kha rik ual a ti.

¹³ Tura ki ihmu ang dênin Efraima kha hmunhoi taka sia’n om a ti: khannisian, Efraima khan a nâihai kha thattu kuang la hruai suak a ti.

¹⁴ O Rengpa, inneitir ro; imo ni inneitir hrang? sul nâi siat ngai le irhnu zûrhai kha inneitir roh.

Israel chunga Rengpa roirêl

¹⁵ An sualna murdi kha Gilgal-a an tho irphuta, kha khan anni kha ki khôkmâka. An thiltho sual sika khan ki in ata inhnot suak ki ti. Annihai hi lungthung ta no ning; an hruaitu murdihai kha tehel zong an ni.

¹⁶ Efraima kha zêmin a oma, an irzung kha a châr zoia, ra insua maka. A ni, suak khom sianlân, an sul ra inditom tak kha that lele ki ti.

¹⁷ Ki Pathian khan anni kha pai irhmang a ti, ama an uksak no sikin. Khanchu, nam danghai laia chaninvâiin om an ti.