HOSEA 8 - PATHIAN LEKHABU IRTHIANG C.L. Bible (BSI)

Rengpa’n Israelhai millim an biak sikin thiam inchang mah

¹ Bekul kha ni hmûra irsuntir ro, Rengpa sûngkuahai chunga irmupui angin a zuang e, ki thuthung an tho’nchâia, ki dân an lôipai sikin.

² Ki Pathian keini Israelhaiin chu nang kin inhriat, tiin ki kuang khêk an ti.

³ Israelhai khan thil sa an hnôla, râlhaiin irzûl an ti.

⁴ Ki itho ni loiin anni khan rêng an siama; kin hriat loiin hruaituhai an siama, an irhmangna hrangin an tangkarua le rângachakin millim an irsiama.

⁵ O Samari, ni sehrâtte irlim kha a hnôl e; an chunga ki ning an mur tak tak a ni. Itik tena mo a irthiang nôk hrang?

⁶ Israel kut theithiamhai millim siam kha, Pathian ni ma. A ni, Samaria sehrâtte irlim kha inkhoipai zit ni a ti;

⁷ phâivua an songa, phâivua saloi an i-ât hrang a ni: a kung inding nei maka, a’rzîk khan ra insua no ni; a ra insuak khom sianlân, mikhualhaiin fa zoi an ti.

⁸ Israelhai kha irlem zoiin an iom a ni: bêl, a sûnga lômna om loi angin atûn hin nam dang laia an iom a ni.

⁹ Ram sakuartung inkhât tak angin Assuria rama an kâia, Efraima khan arditpuihai ar hloppui e.

¹⁰ A ni, nam danghai irhloppui khomsian, irkhôm ki ta, rêng le hruaitu hriak an ipol ngai kha inmongtir bak ki ti.

¹¹ Efraima khan maichâm a inpungtir hi an thil tho sualna sika a nia, an ta hranga sualna rêng rêng kha sualna mai mai a ni.

¹² Ki dân chu ki’rziak pe tu tuaia, khannisian thil dangin an ibe a ni.

¹³ Ki ta hranga thil inhlan irbôlnahai chu hmê an inhlana, an fâka; khahai kha Rengpa’n pom mah: khanchu an pualoina an hriat maia, an sual a hrema, anni kha Aigupta rama kîr nôk an ti.

¹⁴ Israel khan a siamtu a’rnghil paia, in roiinpuihai a sina; Juda khan khopui kulhai an pungtira, khannisian a khopuihaia khan mei tîr ki ta, a in roiinpuihai kâng zoi a ti.