HOSEA 7 - PATHIAN LEKHABU IRTHIANG C.L. Bible (BSI)

Israel sualna le tehel zongna

¹ Israel indam ki tumin Efraima sualna a hong inlanga, Samari sualna le huang an uara, sûng tiang inru a hong lûta, pên tiang hrâtlâksong pâlin an roka.

² An sualna murdi kin hrât mai ti an milungin ngaitua mahai: atûn chu an thilthohai ngeiin a ngîm khak tâka. ki hmâi makunga an iom a ni.

³ An sualna’n inlaltak an lômtira, an milak thu khan mi lianhai an lômtira.

⁴ An rêngin uire an nia, bai siamtu’n irtap a ur inluma, baidi a inhmet inpok a thoi inranga, meisom a lei irngamsan ang hi an ni.

⁵ Ei inlaltak nikhuaa khan mi lianhai kha uain irhâi takin an inruitira; ama khan hmusittuhai pâlin a kut a phara.

⁶ Inrûka an irdîp laiin an milung kha irtap ang dênin an isiam tâk a ni: an ningmur kha zân sôtin a dâia, zînga chu mei ir-al angin ar ala.

⁷ Irtap ang dênin an lum zita, an roirêltuhai an hong irhmang tâka, an inlaltak murdi an tûka, an laia tûte mi khêk om mahai.

Israel le nam danghai

⁸ Efraima lak kha, nam danghai laia ar zêl saa, Efraima kha bai irlet loi a ni.

⁹ Mikhualhai khan a hrâtna an fâk zoi pea, ama khan inhre ma: mul chuakin a bôm tuai tâka, ama khan inhre mah.

¹⁰ Israel roiinpuina khan a hmâi makunga an hriattir ngaia, khannisianlân, hihai murdi khom hin, Rengpa an Pathian tiang khan irhei mahai, ama kha zong ual mahai.

¹¹ Efraima kha vasu milung chô, inhriat thiamna nei loi ang a lei nia; Aigupta tiang an khêk mura, Assuria tiang an fe mura,

¹² an fe laiin an chunga ki lên vôr ki ta, chunglêng vate chelin chel ki ta, an thilsual tho ang irphu’n hremhai ki ti.

¹³ An chung a rik e! ki kuanga irthokin an fe irhmang tâka, irhmangna an chunga a tung e! ki chunga tehel an zong tâka, keima’n chu ki saninhring nuama, anni rêkin chu milak an ni tho khuma.

¹⁴ An lungrîl takin ni koi mahai, an zâlhmuna an ichiar hnem hnum a ni: bu le uain hrangin an inkhôma, ki chunga lak tehel an zonga.

¹⁵ Keima’n chu ki hruai suaka, kin hrâttira, khannisian ki chunga thil saloi an ingaitua a ni.

¹⁶ An irheikîra, anchung taka kuang ni loiin; thal ngul mirûl ang an ni, an milianhai kha an chong per pur sikin, khandaiin tûk an ti. Hi hi Aigupta rama innuisan an inina ni a ti.