HOSEA 4 - PATHIAN LEKHABU IRTHIANG C.L. Bible (BSI)

Israelhai chunga Rengpa chiarna

¹ Israel irchihaio, Rengpa thu kha irngaitua u ta; hi rama hin thutak le lungkhamna le Pathian inhriatna a om no sikin, Rengpa khan ram luatuhai beina hrang a nei.

² Khomâksâm, irhuang, irthat, inrûk, uire uarhai a punga, thisen kha thisenin a zui mai.

³ Khasikin ram khan sûn a ta, a sûnga lêng tinrêng sôl an ti, ramsahai chunglêng vahai le; a ni, tui khangliana ngahai dênin lâkpai ni an ti.

Ochaihai a sêlhai

⁴ Aniachu, tûte irbei irhlôm no ri sehai. Tûte halirchu no ri sehai; ni mihai kha ochai beituhai ang an nia.

⁵ Sûna tûk ni ta, nangma le deipuhai khom zâna tuk a ta, ni nu khom inboipai ki ti.

⁶ Ki mihai kha inhriatna an irsam sikin inboipai an nia, inhriatna ni hnôl sikin kei khomin ki ochai ni nina ata nang hnôl ta ki ti. Ni Pathian dân ni’rnghilpaia, kei khomin ni nâihai irnghil pai ki ti.

⁷ An hong rikip le ki chunga an sual sit sit saa, an roiinpuina kha mualinphoinaa inchangtir ki ti.

⁸ Ki mihai sualna zâra irchong an irtia, an pualoinaa khan an lungrîl an irnghata,

⁹ a mipui a ochaiin hmunkhata hrem ni an ta, an lampuihai sika khan anni kha hremhai ki ta, an thil thohai thuan ki ti.

¹⁰ Fâk an ta chu khop no nihai, notizuar uar an ta chu pung no nihai, Rengpa ngaisakna an nei no sikin.

Nam dang pathian biak a hrilsiat

¹¹ Notizuarhai, uainhai, uain tharhai khan, milung a lâkpai ngai.

¹² Ki mihai khan thing millim an irdona, an khianghrolin a hril ngai; notizuarna lungrîl khan a hruai irhmanga, an pathian ata an hur irhmang tâka.

¹³ Tâng sîphaia khan an irbôla, mualhaia khan mirimhoi an hâla, thing sesua le bero le tarpin thing hnuaihai khan a raifân a hoi sikin. Khasikin nin nâinuhai khan notizuar an uara, nin moihaiin uire an iuar a ni.

¹⁴ Nin nâinuhaiin noti an zuara, nin moihai an uire’n hrem no ning: anni ngei khom notizuarhai le an bingin an fe sikin. Notizuarhai leh hmunkhatin irbôl suama; inhre thiam loi mipuihai kha tûk siat an ti.

¹⁵ Israel, nang chu notizuar uar khomin lân, Juda kha chu tûk sa no ri se. Gilgal-a khan hong no unglân, Bethaven-a khom hong fe no ro; “Rengpa a hring mai angin,” tiin chong irkhâm no roh.

¹⁶ Sehrât irla tukullian ang dênin Israelhai chu an tukul a liana; atûn chu Rengpa’n belrate angin sûla infa thei ning mo?

¹⁷ Efraima khan millim a zompui tâka, a om omin om ri se.

¹⁸ An zu in kha an chîna, nôtizuara an irsiama, an roiinpuina nêkin inzakpuiom kha an irngaiinhlu uala.

¹⁹ Phâivua isêm angin sêm invuangin la om an ta, an sonong irbôlnaa khan lan zak ngêt an ti.