HOSEA 2 - PATHIAN LEKHABU IRTHIANG C.L. Bible (BSI)

¹ Nin urêngpahai kuanga khan, Ammia, ti unglân, nin farnuhai kuanga khan, Ruhamai, ti roi.

Uirenu Gomeri-uirenu Israel

² Nin nu hi bei roi, bei roi; Ama hi ki dôngma ni maka, kei khom a pasal ni ma ung, A hmel ata a notizuar uar hi pai thâk sianlân, A rôp ata a uire uar hi pai thâk ri se;

³ khano’nchu, bomboiin inomtir ki ta, A suak nikhuaa a om ang khan inomtir ki ta, Ramchâr angin siam ki ta, ramchâr khohroi angin inomtir ki ta, tui inhrâlin that ki ti.

⁴ A nâihai khom inren no ning, notizuar nâi an ni sikin.

⁵ An nu khan noti a zuar ngaia, anni invongtu kha inzakom takin a om: ki bu hai, ki tui hai, ki samul hai, ki pat hai, ki sahriakhai le ki in hranghai ni pêktu, ki irditpuihai irzûl ki ti, a iti a ni.

⁶ Khasikin, irngai ta, ni lampui kha ilhlingin inpingtir ki ta, ama khâlin dâi khit ki ta, a lampuihai hmu no ni;

⁷ Khan, a’rditpui irzûl a ta, irzûl pha no ni; annihai kha zong a ta, hmuhai no ni; khanchu, ki pasal masa kuang kîr nôk ki ta, atûnlai nêkin tianlai kha ki ta hrangin a sa ual ti a ti.

⁸ Bu, uain, sahriakhai hi, tangka ki inpung pehai hi, rângachak, Baal hranga an ihmanghai le, keima ipêk a nih ti hi inhre mahai.

⁹ Khasikin, ki bu kha a ât zoroa, ki uain khom kha a sôm zoroa la kîr nôk ki ti. ki samul le ki pat, a bomboina irkhûna hrang kha, lapai pe ki ti.

¹⁰ Khanchu, a’rditpuihai mit hmua, a bomboina ser inlangtir ki ti, ki kut ata tûte’n sansuak no nihai.

¹¹ A raiinfânna murdi, a kût hai, a tha thar hai, a irngam nikhua hai le mi pung khômna zoro murdihai, inboipai sa ki ti.

¹² A grep hrui le a theipui kung, hi hi ki irditpuihai ni ipêk ki ihlo kha a ni, A ichitna ngai kha inramtir ki ti: Ram hnuaia siam ki ta, ram sahaiin fa an ti.

¹³ Mirimhoi a hâl pe ngai Baal nikhuahai kha a chunga thuan ki ti, kha lai khan a bômzoihai le a irvônahai ar bela, ar ditpuihai a pana, keima a ni irnghil a nih ti hi Rengpa thu suak a ni.

A mihai Rengpa’n lung a thung

¹⁴ Khasikin, irngai ta, inthêm ki ta, ramchâra hruai ki ta, irngai om ang takin ama kha chongpui ki ti.

¹⁵ Khan, kha tena khan chu, a grep irhuanhai kha a kuang pe ki ti, Akor irhôr khom sabeina mikot hrangin: khataka khan a thoibop lai nikhuahai le Aigupta ram ata a zuang suak nikhua ang khan, sâm a ti.

¹⁶ Khan, Rengpa thu suak khan hiang hin a ti: Kha nikhuaa khan hiang hin ni a ti, ki pasal ni ti a ta, Baal ni ti ta no ni.

¹⁷ A bâia irthokin Baal irhminghai hi ki’rhmangtir pe hrang a nia: an irhming hi sâm viat viat ta no ni.

¹⁸ Kha nikhua khan ramsahai, chunglêng vatehai, irnênga thilhringhai leh an ta hrangin thuthung siam ki ta; thal ngulhai khandai mani le irdoinahai hi irnênga irthokin irhmangtir ki ta, hoi takin inom hmunkhattir ki ti.

¹⁹ Kumkhuain, ki ta hrangin nang hual khak ki ta, felna mani, roirêlna mani, lunginkhamna mani, inrenna mani ki ta hrangin hual ki ti.

²⁰ Iamomna’n ki ta hrangin hual ki ta, khanchu Rengpa kha inhria ni ti.

²¹ Kha nikhua khan hiang hin ni a ta, changpui ki ta Rengpa thu suak khan a ti. irvânhai chongpui ki ta, khan anni’n irnêng chongpui an ti.

²² Khan, irnêng khan bu mani, uain mani, hriak mani chongpui an ta; khan, anni khan Jezreel chongpui an ti.

²³ Khan, kha kha ki ta hrangin irnênga hin song ki ta, inren loinu kha inren ki ta, ki mi ni loi kha ki mi ni nih ti ki ti,” khan, ama khan, “Ki Pathian ni nih,” ti a ti.