HOSEA 1 - PATHIAN LEKHABU IRTHIANG C.L. Bible (BSI)

Hosea dôngma le a nâihai

¹ Juda rênghai Uzia, Jothama, Ahaza Hezekia hai inlal lai le Israelhai rêng Jeroboama, Joasa nâipa rêng laia Beeria nâipa Hosea kuanga Rengpa thu zuang tung kha.

² Rengpa’n Hosea irhminga Israelhai kuang thu an sîr irphut lai khan hiang hin Hosea kuang an sîr: “Fe’n lân, dôngma’n notizuar neiin lân; notizuar ata nâi nei ro: hiang hin ki mihai khan ni rotsana, an ni iuiresan tâk a ni,”

³ Khanchu a fea, Diblaima nâinu Gomeri kha a nei tâka; khan, nâi a vonga, nâipasal a nei pe ta.

⁴ Khan, Rengpa khan a kuang, “A’rhmingin ‘Jezreela’ phua ro; ir-ial loiin Jezreel thisen phuba kha Jehua sûngkuahai chunga la ki ta, Israel sûngkuahai ram kha inkingtir ki ti.

⁵ Khan, kha nikhua khan hiang hin ni a ta, Jezreel irhôra Israelhai thal ngul kha inkhiak ki ta,” a tia.

⁶ Khan, nâi a vong nôka, nâinupang a neia. Khan, Rengpa khan a kuang, A’rhminga Lo-ruhamai phua ro: Israel sûngkuahai kha inrenhai ngai ta no ning, ki ingaidamhai ta loi hrang a ni.

⁷ Juda sûngkuahai rêk chu inren ki ta, thal ngul mani, khandai mani, irdoina mani sakor mani, sakor chung chuang mi mani anni saninhring loiin, Rengpa an Pathian khan saninhring ki ti, a tia.

⁸ Khan, Loruhamai kha irhnu nêk an mongtira, khan nâi a vong nôka, nâipasal a nei.

⁹ Khan, Rengpa khan hiang hin a tia, “A’rhminga Lo-ammia phua ro: nangni hi ki mihai ni mak chêia, khan, kei nin Pathian ni no ning.

Israel inding nôk hrang thu

¹⁰ Aniachu, Israel nâihai kha tuikhanglian chiai vâiphin, varh theiloi le tep sêng loi zât ni an ta, khan, hiang hin ni a ta, an kuang, ki mihai ni mak chêi, tihna hmuna khan, Pathian hring nâihai nin ni e, ti ni a ti.

¹¹ Khan, Juda nâihai le Israel nâihai kha pung khôm an ta, an lu hrang inkung an ta, kha rama irthokin hong fe an ta, kha rama irthokin hong fe an ta, Jezreel nikhua kha a iroiinpui hrang a ni.