HLAHAI HLA 3 - PATHIAN LEKHABU IRTHIANG C.L. Bible (BSI)

Dôngmate

¹ Zân sôt ki zâlhmun chunga, ki lunginkham tak chu ki zonga, a ni ki zong ngota, Khannisianlân hmu ma unga.

² “Atûn thoi ki ta, khopui irfang ki ti, kotsua le lamlian hmun tina ki lungdi chu zong ki ti,” ki tia. Khannisianlân ama chu hmu ma ung.

³ Khopui hrungtuhaiin an ni hmua, an kuang, “Ki’rtha’n a ilunginkham kha nin lei hmu mo? tiin ki’rdonhaia.

⁴ Khan ki khêlhai zoi, chomkhat hnunga chu ki’rtha’n a ilunginkham kha ki hmua, ama chu ki chelkhaka; infetir nuam ta ma unga; Ka nu in tiang, sûnga ni vongtu tentana ki hon tungtir mâka chu.

⁵ O, Jerusalem nâinuhai, nangni ki ngên, Sazukpuihai le sakhihai irhmingin chonginkung roi, kin irditna hi nin buai loi hrangin.

Hla inthumna Dôngmate

⁶ Tu mo bepârthohai lai ata bero le mura lâka mirimhoi innam chot chota, ramchâr ata meikhu inding hlot hlota hong tâk so?

⁷ En ro, Solomona tâli a ni so, Israel mi hrâthai laia irdoi mi sômrukin an hong izui a ni soh.

⁸ Khandai an chôi chita, irdoi thei mi inzen an ni; mi murdi’n an khandaihai an konga an vong vinga, zâna thil ichiomna sikin.

⁹ Rêng Solomona khan a ta hrangin tâli a siama, Lebanon tânga thing leh siam a ni.

¹⁰ Khataka a chopuihai chu sumtaka siam a ni, a dâp chu rângachak, a toihmun dâp chu a dum inpôl leh siam a ni, Jerusalem nâinuhaiin sataka an ikhông a ni.

¹¹ O, nangni Zion nâinuhai, hong unglân, Rêng Solomona hi hong en roi, ama chu dôngma a nei nî, a lôm nia le a raifân nia, a nu’n rênglukhum a inkhumtir kha a khuma.