HLAHAI HLA 1 - PATHIAN LEKHABU IRTHIANG C.L. Bible (BSI)

¹ Hlahai hla Solomona iphua chu.

Hla inkhatna Dôngmate

² Ni hmûr leh khan ni tumin lân, Ni lungkhamna chu uain nêkin a sa ual sikin,

³ Ni rimtui nang pol ngaitu hin mirim hoitak a nei; Ni’rhming chu mirimhoi irpai angin a vuang; Khasikin dôngmatehaiin lung nang an inkham a ni hi.

⁴ Ni kuang ni hruaiin lân, rot zel ei ti; ki ta hrangin rêng nin lân, ni tentana ni hruai lût ro, Ei raiinfân suam ei ta, lungirthungna uain irhnik takin insuam ei ti, dôngmate murdi’n lung nang inkhamhai khom sian.

⁵ O, Jerusalem nâinuhai, ki duk nâkin ki hmêl chu a sa, ramchâra Kedara puan in le Solomona puanzârhai angin ki isa a ni.

⁶ Ki duk sika hin nin sit ual no’n lân, misa’n a ni em induk sika a ni. Ki nuchahaiin ki chunga an ningmur an insuma, grep irhuana sintho hrangin an ni tîra; ki taksa ir-enkolna hrang zoro nei ma ung.

⁷ Nin hril ro, ni lungkhamna hi, Kho tiang mo ni belrahai hôlin, sûn laia kho tiang mo ni irngamtirhai hrang? Nangma zongin belrapu danghai kuang ki ichai vêl hrang ma ni?

Ruatharte

⁸ O, nang nupang laia hmêl satak, nin hriat no’n chu belra rualhai hnung kha suiin lân, ni kêlhai chu belrapuhai puan in kôla lêng ri sehai.

⁹ O, nang ki lungdi, Faroa tâli kai ngaitu Sakorchal le sakor irla raifân angin, pasalhai râi nin fântir a ni.

¹⁰ Ni bianga sam kâia khan en an hoitira, ni ringa lunghlu irtheihai leh khan.

¹¹ Khannisian nangma ta hrangin rângachak irthei le sumtak tukrivo nang siam pe kin ti.

Dôngmate

¹² Ki rêng chu a zâlhmuna a zâla, Ki nard mirimhoi vuangin a kôl a kiang a sip zoi tâka.

¹³ Ki lungdi chu ki rôpsuama a zâla, ama chu Mura mirimhoi tak ang a ni.

¹⁴ Ki lungdi chu irhuana pâr irbom lai angin, Engedi grep irhuana pâr lai tak ang a ni.

Ruatharte

¹⁵ O, lungdi ni hmêl sa lam dân hi chu o! Ni mit khom vasu mit ang a nia;

Nupang

¹⁶ O, ki irngâitak, ni hmêl sa lam dân hi chu o! A sân ki râi nin fântir, ei zâlhmun chu durba hring ang ni a ti.

¹⁷ Sidar thinghai chu ei miliang ni sian, ei tukrophai chu meisâr thing ni an ti.