HAGAIA 2 - PATHIAN LEKHABU IRTHIANG C.L. Bible (BSI)

Tempil thar roiinpuina

¹ Tha sarina, kha tha sûn sômhni le sûn khatnaa deipu Hagaia kuang Rengpa thu a zuang tunga:

² Sealtiela nâipa, Judai ram optu Zerubabela kuang le Jehozadaka nâipa, ochai inlaltak Josua kuang le mi la omsunhai kuanga khan hiang hin insîr ro ba, a tia.

³ “Hi in hi matona a roiinpui laia hmu, nin laia tu mo la om? Atûn lai hin i angin mo nin hmu? Nin mithmua ite lua a ini loi mo ni ma?

⁴ O Zerubabela, atûn chu hâitakin om roh, ti hi Rengpa thu suak a ni; o ochai inlaltak Josua, Jehozadaka nâipa, nang khom hrât takin om roh, khan, nangni hi rama mi murdihaio, hrât takin om sa roi ti hi Rengpa thu suak a ni. sin tho roi, nin kuang ki oma, ti hi Sipaihai Rengpa thu suak a ni:

⁵ Aigupta ram ata nin hong suak laia thu nangni ki inkungpui ang khan nin laia ki’rtha a la iom mai a ni, chi no roi.

⁶ Sipaihai Rengpa khan hiang hin a ti: voikhat chu sôtnote irvânhai le irnênghai le tuikhanglianhai le mual le tânghai kha inhnîngtir ki ti.

⁷ Nam tinrênghai kha inhnîngtir ki ta, nam tinrêng thil inuamhai kha hong tung a ta, hi in hi roiinpuina’n insiptir ki ta, sipaihai Rengpa khan a ti.

⁸ Tangkarua hi ki ta a nia, rângachak hi ki ta a nih, ti hi Sipaihai Rengpa thu suak a ni.

⁹ Hi in roiinpuina hnungkhôn ual hi a masa nêkin irkhêl ual a ti, sipaihai Rengpa khan a ti: khan hi hmuna hin irngeina intung ki tah,” ti hi Sipaihai Rengpa thu suak a ni.

Deipu’n ochaihai a irdonhaina

¹⁰ Daria inlal kum hnina, a tha kuakna, sûn sômhni le sûn minlina khan deipu Hagaia kuang Rengpa thu, hiang hin a zuang tung.

¹¹ Sipaihai Rengpa khan hiang hin a ti: “Ochaihai kha dân thu, hiang hin irdonhai ro:

¹² Tu’n mani a songkol irfual hmora sa irthiang infûn sianlân, a songkol irfual hmora khan bai mani, thil but inhmin mani, uain mani, hriak mani, fâk hrang rêng rêng mani lei khoi ta sianlân, irthiang ni mo?” tiin. Ochaihai khan, “Irthiang no ni,” tiin sâm an ti.

¹³ Khan, Hagaia khan, “Mithi ruak tôn ta sianlân, a porinche ma ni?” ti a ta. Ochaihai khan, “Porinche a ti,” tiin sâm an ti.

¹⁴ Khan, Hagaia khan hiang hin a sâm tâka: “Hi mi hi khaang tak kha an nia, hi nam hi khaang tak khan ki makunga an om, ti hi Rengpa thu suak a ni; an kut suak tinrêng khom khaang tak kha a nia, khataka an thil inhlan khom kha a irthiang loi a ni” a tia.

Rengpa’n satvur an kung

¹⁵ Atûn ata nakan ten khomin Rengpa biak ina lung nin ichung irchuan mân, matona thil kha ngaitua ngai roi.

¹⁶ Kha zoro lai murdi khan bu khamphulu sômhni irting thei ômtak buk khômnaa mi a hongin sôm vai a kâia; uain sômna hmun bûr sôm ringa thâl suak tuma a hongin, sômhni vai a lei irting ngai.

¹⁷ Nin itho suakna murdi chârna hai, irngêhai le irialin nangni ki hrema; khannisianlân, ki tiang hong irhei ual mak chêi, ti hi Rengpa thu suak a ni.

¹⁸ Hi tha kuakna, sûn sômhni le sûn minlina a vuan sûn ata hi nakan dênin, matonahai kha ngaitua roi, Rengpa biak in lungphûm nî ata kha ngaitua roi.

¹⁹ A chi kha fasiara a la iom ma ni? Grep hruihai, theipui kunghai, dalim le oliv thinghai kha la ra mah; a vuan ata hi sat nangni vur ki ti.

Zerubabela kuanga Rengpa chonginkungna

²⁰ Khan, Rengpa thu kha, kha tha, sûn sômhni le sûn minlinaa khan Hagaia kuang a zuang tung nôka;

²¹ hiang hin Judai ram optu Zerubabela kuang khan insîr ro: keima’n chu irnêng le irvân kin hnîngtir ngai: ram rêngtoihmunhai kha paitha ki ta, ramhai ram hrâtna kha insiat ki ta;

²² tâlihai le a chunga chuanghai kha irtettir ki ta, sakorhai le a chung chuanghai kha mi tin mâni urênghai khandaiin tûk an ti.

²³ Kha nikhuaa khan, o Zerubabela ki siahlo, Sealtiela nâipa, nang chel ki ti, Sipaihai Rengpa thu suak khan a ti; khan, irhming namna kutsabi anga nang siam sa ki ti, Rengpa thu suak khan a ti; nang ki len thang tâk a ni, Sipaihai Rengpa thu suak khan a ti, tiin.