FILIPI 3 - PATHIAN LEKHABU IRTHIANG C.L. Bible (BSI)

Iamna sika thiamchangna

¹ A mongna taka chu ki urênghaio, Rengpaa khan lôm roi. Thu pangai dên irziak nôk hi ki ta hrangin ihnông om ni mah, nin ta hrangin inlâp a ti.

² Uihai ata, thil saloi thotuhai ata, sertan uarhai ata irdîn roi.

³ Eini Pathian Irtha zâra Pathian biak le Krista Jisua songa pên tiang thila irnghat loihai hi sertan dik tak ei ni ual a ni.

⁴ Nuam inlân chu kei khomin pên tianga thil chu ki isong thei kêng. Mi’n pên tiang thil song theia an inhriatin chu kei khom kin hre nôk ual a ni.

⁵ Sûn riat nia sertan, Israel irchia mi, Benjamina irchia mi, Hebrai nu le pa kâra suak ki ni, Dân zômna lama chu Farisai ki nia.

⁶ Sathnem irngaina tiang lak Koiindanghai dengintheitirtu ki ni. Dânin a inphût anga hlen suakna lama khom sêlnaboi ki ni.

⁷ Khannisianlân, kha thil kha, ki ta hranga inlâpna hrang ka chu, Krista sikin inchânna ki bê tâk a ni.

⁸ Kha vai kha ni mah, ki Rengpa Jisua Krista inhriat hi a sân a hlua, itinrêng hi inchânna ki bê tâka, Krista kha ki nei theina hrang le ama leh pumkhat kin ni theina hrangin, ama sikin itinrêng kin chân tâka.

⁹ Dân zôm sika ni loiin Krista iam sika thiamchang ki ni, iamna sika Pathian makunga thiamchangna chu.

¹⁰ Thil ki inuam tak chu hi hi a ni. Krista inhriathai, a thoinôkna sinthotheina dong hai, a ituang anga tuang hai, a thina irtemtuhai hi a ni.

¹¹ Khanchu mithi thoinôknaa khan kaithoi ni ngêt ki ti.

Inkungna ten pana intân

¹² Ki hmu tâk irti ni ma unga, ki’rkip tâk irti khom ni ual ma ung, “Krista ni man nasan hi ki man rôi mo,” tiin irzûlin ki irzûl mai a ni.

¹³ Urênghaio, hlochuk tâkin irbe ma unga, thil inkhat ki tho ngai, thil fe tâkhai kha irnghilin mân tiang thilhai kha ki thîr ual a ni.

¹⁴ Krista Jisua Pathian chung tianga koina lômman, hringna kha, hmu ngêt hrangin inkungna tiang ki pan ngut ngut a ni.

¹⁵ Khanchu, eini puihling tâkhai hin chu khaang lungrîl kha irput ei ti. Khan, senkhatin ngaidân dang nin nei duai khomin Pathianin nangni lan fâi pe a ti.

¹⁶ I khom nisianlân, ei iphâk ten chit hi indikin, khataka irthokin mân tiang fe mai ei ti.

¹⁷ Urênghai, ki omdân irchupuhai ni roi, enton hrang nin ni neia, kin om dân anga omhai chu en ual takhai roi.

¹⁸ An om dâna Krista kros râl tamtak an om ti nangni ki hril mai ngai kha, atûn khom chap pumin nangni ki ihril nôk a ni.

¹⁹ Khahai mongna hrang chu siatna a ni, fâk hrang hi Pathiana an bêa, an inzakpui hrang thilhai kha an song uala, rammual thil ringot an ingaitua a ni.

²⁰ Eini chu irvân khua le tuihai ei nia, irvân ata a ni saninhringtu Rengpa Jisua Krista zuang hrang kha nghâkhmo takin ei ithîr a ni.

²¹ Itinrêng ar cham hnuaia sia theitu khan, ei taksa intem tak hi ama taksa roiinpui anga om hrangin a sinthotheina khan a ni indanglamtir hrang a ni.