FILIPI 2 - PATHIAN LEKHABU IRTHIANG C.L. Bible (BSI)

Krista irngaiintômna le roiinpuina

¹ Krista zâra irtharngamna nin nei tâka, a lungthungna khan nangni an lôma, Irtha pôlna nin chunga, irngaiinnatna le irlungkhamna nin nei ta.

² Khasikin, lunginrual takin lungirthung irhlôma, inthuruala lungrîl hmunkhat irputin ki raifânna irkiptir roi.

³ Mâni hrang irzûl le irngaiinhlu taka ite tho loiin tukhomin irngaiintôm takin mi danghai sa ualin bê roi.

⁴ Mâni satna hrang vai zong loiin, mi danghai satna hrang khom zong roi.

⁵ Krista Jisua lungrîl ang hi nangni khomin irput mai roi.

⁶ Ama kha Pathian irangpui ni khomsianlân, Pathian irangpuia om kha tum ngit hrangin irbe maka,

⁷ Mihriamhai anga zuang irzirin, suak angin a’rsiama, ama le ama a’rngaiintôm ual tâka.

⁸ Khanchu, mihriam anga zuang omin, a’rngaiintôma, thipui rakin thu a zôma, krosa a thina ngei chu.

⁹ Khasikin Pathianin ama kha irsâng takin a sia tâka, irhming murdihai laia irhming inchungtak a pêk tâka.

¹⁰ Khanchu, Jisua irnênga mihai, irnêng hnuaia mihai a makunga khûksadel an ta.

¹¹ Pa Pathian roiinpuina hrangin mi tinrêngin, Jisua Krista kha Rengpa a ni tiin lan puang an ti.

Vâr anga rammual invâr hrang thu

¹² Khanchu, ki indit takhaio, ki om laia ki thu nin izôm ang khan atûn ki om no khomin nin zôm nôk ual a inang a ni. Pathian chi le inthing pumin nin saninhringna irkiptir hrangin sin mai roi.

¹³ Ama nuamlam tho tum hrang le tho thei hranga nangnia sintu kha Pathian a ni.

¹⁴ Chiar loi le irsêl loiin itinrêng tho roi.

¹⁵ Atûnlai mi irkôkpoploi le pualoi laia hin Pathian nâi, sual neiloi, irthiangliai, sêlnaboi nin ni theina hrang le rammual invârtuhai nin ni theina hrangin.

¹⁶ Khanchu, môk intân ni loia, môk sinsôl ni ual loiin, Krista Nikhuaa chu song hrang nei thei ki ti.

¹⁷ Nin iamna sin thôna le irbôlnaa khan inhlana om hrang ni khom inlân lôm ki ti, nangni khom nangni lômpui sa ki ti.

¹⁸ Khaang dênin, nangni khom lôm unglân, ni lômpui sa roi.

Timothea le Epafrodita

¹⁹ Nin thurchi inhriata milung dam taka ki om theina hrangin Rengpa Jisua’n a sa a ti’n chu, nin kuang Timothea hong tîr lat thei ki ti, ti ki sabei a ni.

²⁰ A dik taka keima anga nangni ngaitua chu ama vai hi a ni.

²¹ Mi danghaiin chu Jisua Krista ta hrang ngaitua loiin mâni ta hrangin an zong ngai.

²² Khannisianlân, ama hi chu a nangzia nin inhriat tâka, pa le nâi an sin suam angin Thurchi Sa sin kin tho suam ngai.

²³ Khanchu, ki thurchi hrang kin hriat le ama hi hong tîr zôi thei ki ti, ti hi ki isabei a ni.

²⁴ Rengpa’n sa a ti’n chu keima khom hong lat thei ki ti, ki iam.

²⁵ Khan, ki urêngpa, ki sipai chanpui le ki tirtôn, ki innang inchuk hranga nin mi hong tîr Epafrodita hi, nin kuang hong tîr a nangin ki inhriat a ni.

²⁶ Nin rêngin a sân nangni ar ngai tak taka, dam mah ti nin len hriat sikin a sân poi ki ti ok a ni.

²⁷ Dam loiin a oma, thi vânga na chu a nia, khannisian Pathianin lung an khama, ama vai khom ni loiin kei khom lung a ni inkham ni a ti, beiindong ualna tong loiin a ni siam ta.

²⁸ Khanchu, ama nin lei hmua nin lômna hrangin ama hi ki hong itîr lat a ni.

²⁹ Ama hi Rengpa irhmingin raifân takin lei lôm unglân, hiang mi hi irngaiinhlu roi.

³⁰ Nangnihaiin changpuina nin ni ipêk thei ban kha, ama’n ni pêk a tuma, a sân irnak song tak takin Krista sinthôna sika, a lei thipui vâng vâng a ni.