FILIPI 1 - PATHIAN LEKHABU IRTHIANG C.L. Bible (BSI)

Chubai mûkna

¹ Paula le Timothea, Krista Jisua suakhaiin chu, Krista Jisua mi irthiang Filipi khuaa om murdi le Koiindang hruaituhai le sinthotuhai chubai kin mûk.

² Pathian ei Pa le Rengpa Jisua Krista kuang ata lungkhamna le irngeina nin kuang om ri se.

Filipihai ta hranga Paula chongchaina

³ Nin thurchi ki’rngaitua rikipin ki Pathian kuang lômthu kin sîr ngaia,

⁴ i ang zoroa khom nin rênga ta hrangin ki chongchai rikipin raifân takin ki chongchai ngai a ni.

⁵ Nin inhriat phut ni ata atûn tena Thurchi Sa hrilna sin nin ni thopui ngai sikin.

⁶ Nangnia hi thil sa insuaktu khan Krista Nikhuaa puihling dênin a tho mai ki iam ngit a ni.

⁷ Nangni ki’rngai tak tak hena, Pathianin hi dongtum a ni ipêk Thurchi Sa ta hranga ki beina le indettirna sin ki thônahai le atûn intângna ina ki om laia ni changpuituhai nin ni sikin ki milunga nin om maia, nin rênga chunga khaang lungrîl irput irhoi khom ki ni.

⁸ Nin rêngin Krista Jisua lungrîl irputin nangni ki’rngai a nih ti Pathianin an hriat.

⁹ Nin lungthungna chu inhriatnahaia, thil hmu’n fel theina tinrênghaia irsôna a pung ual ual theina hrangin ki chongchai a ni.

¹⁰ Khanchu, thil sa ualhai kha inthang thei nin ta, Krista Nikhuaa khan irthiang le sêlnaboi lei ni nin ta,

¹¹ Pathian roiinpuina’n le inpâkna’n Krista zâra felna ra khan nin lei isip hrang a ni.

Ki ta hrangin chu hring hi Krista a ni

¹² Urênghaio, ki thil tuanghai hi Thurchi Sa indarna hrang a lei ni chian tih nin inhriat ki nuam a ni.

¹³ Ki thîrkol bunhai hi Krista sika a ni ti, Reng in enkoltuhai le mi dang murdihaiin an inhriat ta.

¹⁴ Urêng tam ualhai khomin ki thîrkol bun sikin Rengpa an iam uala, chi loiin Pathian thu khom an hril ngam ta.

¹⁵ Mi senkhat chu hnarsana le sêlna sikin Krista thu an hril sa ngaia, senkhat chu lungrîl satakin an hril ngai.

¹⁶ Thurchi Sa song hranga inkung ki ni, inhriatin lungthung sika hril an ni.

¹⁷ Mi senkhatin chu ki thîrkol bun chunga hin irngaisiatna ni bôk pe tumin, tho tak tak loiin, mâni satna hrang vai ngaitua’n Krista thu an ihril ngai a ni.

¹⁸ Poi make! A dolin mo, a takin mo i ang lama khom Krista thu ihril a ini hi raifân a om, raiinfân mai ki ti.

¹⁹ Nin ni chongchai pe sik le Jisua Krista Irtha changpuina sikin sansuak ki ni hrang tih kin hriat ta.

²⁰ Ki inuam tak le ki isabei ngit kha ite mualinphoi loia, hâitaka i zoroa khom, hi zoro ngêta khom hin, damin mo ithiin mo, ki taksa Krista chôiindôm hi a ni.

²¹ Ki ta hrangin chu hring hi Krista a nia, thi khom inlâpna a ni.

²² Nikhomsian, ki la hringin chu sin kâmom la sin thei ok ki ti, a i tak mo inthang hrang inhre ma ung.

²³ A lai lakloa omin, a’rngaina lamchang khom inhre loiin ki iom a ni. Hi hringnun hi mâkin, Krista kuanga om ta inlân ki’rzuk tak tak, kha kha a sa ual ok a ni.

²⁴ Khannisian, nangni sika hin ki la ihring mai hi kâm a la iom ual a ni.

²⁵ Nin rênga iamna irsôntir le nin raifânna inpung hranga ki dam mai hi a sa ual ti kin hriat ta.

²⁶ Ki hong nôk tika chu keima sikin Krista lan pâk ual nin ti.

²⁷ Mi danghai leh nin om dânhai kha Krista Thurchi Sa leh irhme bak ri se, ki hong mo hong no mo irtha hmunkhata ngîrindetin, lungrîl hmunkhat irputin Thurchi Sa iamna kha nin thop irrual ti inhriat thei ki ti.

²⁸ Khanchu, doituhai chu i ang khomin chi loiin, hâitakin om unglân; khanchu, nangni inhnê no nihaia, inhnêhai nin ti, kha kha anni ta hrangin irhmangna a nih ti irsinsiana feltak ni a ti; asan chu inhnêna nangni petu kha Pathian a ni.

²⁹ Krista sika ama nin iiam vai ni loiin, ama sika nin ituang sa hrang khomin phal nin ni.

³⁰ Irdoina keimaa nin ihmu ngai, atûn khom a om tih nin inhriat kha nangni khomin nin itong sa tâk a ni hi.