FILEMONA toc2 FILEMONA 1 - PATHIAN LEKHABU IRTHIANG C.L. Bible (BSI)

Chubai mûkna

¹ Paula, Krista Jisua sika intângna ina intâng le ei urêngpa Timothea khan, kin sinthopui inditom tak Filemona hai,

² kin farnu Afii hai, kin sipaipui Arkipa hai ni ina inkhôm ngai Koiindang mihai chubai kin mûk.

³ Ei Pa Pathian le Rengpa Jisua Krista kuang ata lungkhamna hai, irngeina hai nin kuang om ri se.

Filemona lungthungna le iamna

⁴ Ki urêngpa Filemona, ki chongchai rikipa nang kin hriat mai ngai, ki Pathian kuang khom lômthu ki hril ngai.

⁵ Ni iamna thu le Rengpa Jisua le mi irthianghai lung ni thungzia kin hriatin Pathian kuang lômthu kin sîr a ni.

⁶ Iamna sika irpôlkhômna ei inei takna hin Kristaa khan satvurna tinrêng ei idonghai inhriat thiamna an thûk ual ki sabei.

⁷ Urêngpa, ni lungthungna thu kin hriatin ki râi a fân tak taka, mi irthianghai lungrîl khom ni kaiinhar tâk sikin ki’rtha a’rngam ruam ta a ni.

Paula’n Onesima a ngên pena

⁸ Hi sik taka hin Kristaa urêng ei inina ni itho irhoi tho hrangin thu nang pe ngam khom inlân,

⁹ ni lungthungna inhriatin, keima Paula, atûn Krista Jisua sika intângna ina intâng hin, a ngênin nang ki ingên a ni.

¹⁰ Khaang khan, intângna ina intânga ki om laia Kristaa ki nâi Onesima ta hrangin keima irtha tianga pa hin ni kuang ki ingên a ni.

¹¹ Matona khan ni ta hrangin hmanghmunboi ni khomsian, atûn chu ki ta hrangin a sân a nang tâka, ni ta hrang khomin nang ta ti.

¹² Ki inuampuina lungrîl tak takin leh hi pa hi ni kuang ki hong tîr nôk a ni duah.

¹³ Thurchi Sa sika kin tâng sûng hin nangma irthûla ni changpui hrangin ompui mai ki nuam tak taka.

¹⁴ Khannisianlân a sa ni ti no’n chu ite tho tum ma ung; lungthungna chu nangma ata suak ngei ni sian tih ki nuam sikin, ama hi nang khappai pe ki inuam loi a ni.

¹⁵ Idôr ten sûng mani nang a irotsan hi kumkhuaa ni kuanga ngam patna irthûl ni a ti.

¹⁶ Atûn chu, suak ang ni ta loiin, suak nêka hlu tak, urêng inditom tak a ni ta, ki ta hrangin a satak taka, ni ta hrang khomin taksa tiang le Rengpaa sa nôk ual ngêt a ti.

¹⁷ Khasika khan, ni sinthopuiin ni ni bê tak takin chu keima ang dênin ama hi lei lôm roh.

¹⁸ Ni kuang ata sininchâi mani, a intâng mani a omin chu keima’n nang thuan hrangin lei insâp roh.

¹⁹ Kei, Paula hin keima kut ngêta irziakin nang thuan ki ti, ki iti hi. Nangma ngei ki kuanga ni intâng ti ual chu ni ma ung.

²⁰ Khanchu, urêngpa, Rengpa sikin hi thil hi ni tho pe’n lân, Kristaa khan ki lungrîl nin lômtir roh.

²¹ Nang ki ingên hi hlo a chuk ngêt sabei ngitin ki irziak a ni, ki sabei nêka irkhêlin ni itho lele ki iam sa a ni.

²² Nin chongchaina hai kha sâmin nin kuang ki hong isuak ki sabei a ni, ki tungna hrang in ni lei ngaitua pe ro.

Inthâna chubai

²³ Epafra, Krista Jisuaa, intângna ina ki intângpui hin chubai nang a mûk.

²⁴ Ki sinthopui Marka hai, Aristarka hai Dema hai le Luka hai hin chubai nang an mûk.

²⁵ Ei Rengpa Jisua Krista lungkhamna kha nin rênga kuang om ri se.