FESUAKNA 9 - PATHIAN LEKHABU IRTHIANG C.L. Bible (BSI)

Sahai chunga hripui inlêng

¹ Khanchu, Rengpa’n Mosia kuang, “Faroa kuang fe’n lân, ‘Rengpa Hebraihai Pathianin hiang hin a ti: ki sin an tho theina hrangin ki mihai infetirhai ro:

² Anni nin fetirhai noa, ni khaphai maiin chu,

³ irngai ro, loia ni sa omhai chunga, sakorhai chunga, saringseihai chunga, sehrât pâlhai laia, ni kêlbelrahai chunga,

⁴ Rengpa’n a kut thâk a ta, hri irkhêl tak hong om a ti. Khanchu Rengpa’n, Aigupta mihai le Israel mi sahai zêkhai a ta, Israel irchihai ta chu ite thi viat no ni,’ a tih ti’n hrilin lân,” a tia.

⁵ Khanchu Rengpa’n zoro an kung pehaia, “Hi thil hi, hi rama hin zînga Rengpa’n zuan changtir a ti,” a tia.

⁶ Khanchu zînga chu kha thilhai kha Rengpa’n an changtir tâka. Aigupta rama sa om murdihai chu an thi zoi tâka; khannisianlân Israel irchihai sahai chu inkhat khom thi viat mahai.

⁷ Khan Faroa’n mi a tîra; irngai ro, Israel mihai sahai chu inkhat khom thi mahaia. Khannisianlân Faroa lungrîl chu a la ngar maia, mihai kha la’nfetir nuam mai maka.

Sakhuai

⁸ Khan, Rengpa’n Mosia le Arona kuang, “Irtapa irvut nin kutkâng sipin chôi unglân, Faroa mit hmua Mosia’n irvân tiang hlôn ri se.

⁹ Khanchu Aigupta ram pumpui chunga vâiphin khu a sipa, Aigupta ram pumpuia mihriam le sa om murdihai chunga sakhuai invûng chang a ti,” a tia.

¹⁰ Khanchu irtapa irvut kha an lâka, Faroa kôla an ngîra; Mosia’n irvân tiang a hlôna, khanchu mihriam le sahai chunga sakhuai an irvei ving tâka.

¹¹ Kha sakhuai irveina sika khan tasân theihai chu Mosia makunga ngîr ngam ta mahai, kha sakhuai kha Aigupta mi murdi le tasân theihai khomin an irvei vinga.

¹² Khan, Rengpa’n Faroa lungrîl chu a la’nngartir pea, Rengpa’n Mosia kuanga a lei ihril tâk angin, anni thuhril chu irngai ual mah.

Irial

¹³ Khan, Rengpa’n Mosia kuang, “Zînga thoiin lân, Faroa kôla ngîrin lân, a kuang, Hebraihai Pathian Rengpa’n hiang hin a ti, ki sin an tho theina hrangin ki mihai infetirhai roh.

¹⁴ Hnuai chunga hin keima ang hi tûte om mahai ti nin hriat theina hrangin, atûn a zoro hin chu, ni mihai le ni siahlohai le nangma chunga khom, hi hri hi hong tîr ki ti.

¹⁵ Atûn hin ki kut irlek ki ta, ni mihai le nangma khom hripuiin nangni hrem ki ta, hnuaia irthokin sâtpai ni ta ni ti.

¹⁶ Khannisianlân hi thil ki ithôna ang taka hin ki sinthotheina chu inentir a ni theina hrangin le, rammual pumpuia ki’rhming puang indarh a ni theina hrangin nang ki la indam mai a ni hi te.

¹⁷ Ki mihai chunga hin nangma le nangma chôiindômin, annihai chu ni la infetir nuamhai loi mo?

¹⁸ Irngai ro, zînga hiang tika hin chu irial inrik takin zuan thotir ki ta; hiang dôra Aigupta ram a’rzir ata a vuan tena hin a la ihrât ngai loi chu hong om a ti.

¹⁹ Khasikin, atûn hin mi tîrin lân, loia ni thil nei murdi le ni sahai chu hong hruai lat ri sehai; sa le mi loia om murdi chu, an chunga irial hong tho a ta, thi ving an ti, in sûng tianga hong thei hrang tûte om ta no nihai, a tih tiin hril ro,” a tia.

²⁰ Faroa siahlohai laia Rengpa thu chia omhai chu an siahlohai le an sahai in sûnga thun inlût an ta,

²¹ khan Rengpa thu irngai loituhai siahlohai le sahai chu loia an inomtira.

²² Khanchu Rengpa’n Mosia kuang, “Aigupta ram pumpuia, loia chîmu tinrênghai chunga le, sa chunga le mihriam chunga, Aigupta ram pumpuia irial tamtak a hong tho theina hrangin, irvân tiang ni kut phar ro,” a tia.

²³ Khanchu Mosia’n a khianghrol chang tiang an leka; khanchu Rengpa’n khonri le irial a zuang insua tâka, hnuai chunga mei angin a hong irtêktir tâka, Rengpa’n Aigupta ram sûnga irial an thotir tâka.

²⁴ Khanchu, irial le michêk tâk chu a’rkoptira, irkhêl takin Aigupta ram pumpuia, nam inkhat ram a hong chang ata la hmu ngai loi chu a hong om tâka.

²⁵ Aigupta ram pumpuia khan, loia thil om murdi chu sa le mihriam khom a dêng thathai vinga; irialin loia sûlhna om murdi a dêng that vinga, rama thingkung khom a dêng that zoi ta.

²⁶ Israel irchihai omna, Gosen ram ti no chu irial tâk loina om mah.

²⁷ Khanchu Faroa’n mi a tîra, Arona le Mosia an koitirhaia, an kuang, “Atûn hin chu ki lei insual ok a ni ta: ki mihai le kei chu kin tukul a liana, Rengpa chu a fel a ni.

²⁸ Ruk ta ri se, irial le khonri irvân inrûm hi a boi theina hrangin, Rengpa kha nghi tan lân, khanchu infetirhai ki ta, om ta no chin ni,” a tia.

²⁹ Mosia’n a kuang, “Khopui ki suaksan zoiin chu, Rengpa tiang ki kut phar ki ta, hnuai hi Rengpa ta a nih ti nin hriat theina hrangin, irvân inrûmhai mong a ta; irial khom tho ta no ni.

³⁰ Khannisian, nangma le ni siahlohai chu, Rengpa Pathian la chi ual no chin ni, ti kin hriat,” a tia.

³¹ Khan, patkung le fachaihai dêng thatin an oma, fachai vûi lai tak le pat khom a ra lai tak a nia.

³² Bupui le chîmu danghai chu dêng that ni mahaia, an la mông no sikin.

³³ Mosia chu Faroa kuang ata khopui a suaksanin chu, Rengpa tiang a kut a phar tâka; khanchu irvân inrûm le irial chu a mong ta, rua khom inthotir ta maka.

³⁴ Khan, Faroa’n rua le irial, irvân inrûm chu om ta mah ti an hriat khomin, a la tho’nchâi maia, a siahlohai le an lungrîl a la ngar maia.

³⁵ Khan, Faroa lungrîl inngarin a la oma, Mosia bâia Rengpa’n a lei ihril tâk angin, Israelhai chu infetir nuam maka.