FESUAKNA 40 - PATHIAN LEKHABU IRTHIANG C.L. Bible (BSI)

Rengpa omna puan in sin le inhlan

¹ Rengpa’n Mosia kuang hiang hin a ti pea,

² “Tha masa tak, sûn khatna nî chu Rengpa omna puan in sin roh.

³ Thuthung Bôm a sûnga thupêk sômhai omna kha a sûnga sen lân, a maton tiang puanzâr târ ro.

⁴ Dokâng chu a sûnga thunin lân; a chung tianga hmangruahai se roi. Meiser siana khom thuninlût sa unglân, a chunga meiser intoi roi.

⁵ Rângachak maichâm, mirimhoi hâlna hrang chu, Thuthung Bôm maton tiang se unglân, puan in mikota khan puanzâr târ roi.

⁶ Hâlirvôm thilinhlanna hrang maichâm chu puan in maton tiang intoi unglân,

⁷ irsûkinfâina tuibêl chu tui sung inbitin puan in le maichâm kâra se roi.

⁸ A tual kha dâiin sung unglân, a kotbâia khan puanzâr târ roi.

⁹ “Khante, puan in le a hmangrua murdi chu hriak irthiang polin thârin lân, a hong irthiang hrang a ni ta.

¹⁰ Kha hnung chu maichâm le hmangruahai pol intharin lân, a hong irthiang hrang a ni ta.

¹¹ Irsûkinfâina tuibêl le a toihmun khom khaang dênin ni ithâr hrang a ni.

¹² “Arona le a nâihai puan in mikota hong hruaihaiin lân, dân anga irthâr hrangin tuiirsil hrangin ti pehai roh.

¹³ Arona chu ochai tukfamhaiin irvo sian, sahriak irthuin hiang tak khan ni iserhai bîk hrang a ni, ochai nia ki sin a tho theina hrangin.

¹⁴ A nâihai khom koi inlûthaiin lân, anni chu songkol irfual innghâktirhai roh.

¹⁵ Khanchu an pa sahriak ni irthu ang tak khan, anni chu ochai sintho hrangin, sahriak irthutirhai roh. Hi hriak irthu hin anni chu zoro la hong hranghaia khom ochaiin a isiamhai mai hrang a ni ta,” a tia.

¹⁶ Rengpa thupêk ang tak khan Mosia’n itinrêng a tho vinga.

¹⁷ Khaang takin Aigupta ram ata an suak zoia, kum hnina le tha masa tak sûn khat nî sûn khan, Rengpa omna puan in chu an indingtir ta.

¹⁸ Mosia’n a bul intoinahai an deta, a hmangruahai a’rfûktira, tângkhang an khopa, chopuihai a phuna;

¹⁹ puan in chunga khan a irkhûna puanzâr a târa, a chung nôka khom khan a’rthuatira, Rengpa thupêk lam takin.

²⁰ Khanchu lungphêk inhnihai kha a lâka, Thuthung Bôm sûnga a siah tâka, a zônfunghai chu Bôm irzônna irkual sûnghai khan a rola, a sîngna leh a sînga.

²¹ Bôm chu puan in sûnga a chôi inlûta, a irhli hrang puanzâr chu a târa, Rengpa thupêk lam takin an sina.

²² Puan in sûng tentan sûnginta ual hmâr tiang khan dokâng a doa,

²³ Rengpa thupêk ang takin a chunga khan bai ser a siaa.

²⁴ Sim tiang khan puan in sûnga meiser siana chu dokâng depna tiang an toia.

²⁵ Kha hmuna khan Rengpa makunga, a thupêk ang takin meiserhai chu an choka.

²⁶ Rângachak maichâm chu puan in sûnga tentan puanzâr kôla a doa.

²⁷ RENGPA thupêk ang takin thil mirimhoihai chu a hâla.

²⁸ Puan in mikota puanzâr chu a târa;

²⁹ kha puanzâr pêna khan hâlirvôm thilinhlan le bu le bâl thilinhlanhai a’rhlana, RENGPA thupêk lam takin.

³⁰ Dâr irsûkinfâina tuibêl chu puan in le maichâm kâra khan a siaa, tui a sung inbita.

³¹ Kha khan Mosia’n, Arona le a nâihai khom an kut le kehai an irsûkinfâia,

³² puan in sûnga mo, maichâma moh an fe hrang richamin RENGPA thupêk lam ang takin an kut le kehai an irsûkinfâi ngai a ni.

³³ Mosia khan puan in le maichâm irhualtu hrang dâi a sina, a dâi mikota khan puanzâr a târa.Hiang hin sin hrang murdi chu a izoi zit a ni ta.

RENGPA omna puan in chunga a tuamtu sûm

³⁴ Khanchu puan in kha sûmin a tuama, RENGPA ompuina vâr irkhêl khan a sipa.

³⁵ Hi sika hin Mosia kha puan in sûnga a ilût thei ta loi a ni.

³⁶ Israel nâihai khan puan in chung ata kha a’rthon vaiin an riakbuk kha an irthon theia.

³⁷ Sûm kha, kha hmuna khan a om kâr kai chu an riakbuk kha an irthon ngai loi a ni.

³⁸ An chaninvâi laiin a zîng sûng kâr chu sûna RENGPA ompuina sûmin a tuama, zâna meichokin puan in chunga khan an hmu ngaia.