FESUAKNA 4 - PATHIAN LEKHABU IRTHIANG C.L. Bible (BSI)

Pathianin Mosia thilirkhêl tho theina a pêk

¹ Khanchu Mosia khan, Rengpa kuanga, taksônloiin ki hê la no nihai, “Rengpa khom ni makunga nan lâr pe no ni, an ti ngânin te,” a tia.

² Khanchu Rengpa’n, “Ni kuta ni intûk kha i mani?” a tia. “Khianghrol,” a tia.

³ Khanchu Rengpa’n “Hnuaia khan lei pai ngân ta,” a tia. Khanchu a paia, voikhat zelin mirûl a hong chang pea, an tânsan ta.

⁴ Khanchu Rengpa’n, “Ni kutin zu’nbanin lân, a’rmei khan zu chel ro,” a tia. Khanchu a zu’nbana, a chelin chu khianghrol a chang pe nôk ta.

⁵ Rengpa’n nin irchibulhai Abrahama Pathian, Isaka Pathian le Jakoba Pathian chu nangma kuanga khom nang a ompui ti an inhriat theina hrangin, a tia.

⁶ Khanchu Rengpa’n ni kut leh khan, ni rôpa khan zu thun nôk ro, a tia, a zu thuna a hong kêlsua nôkin chu a kut chu ivur anga vâr ngoiin a phar suaka.

⁷ Ni kut kha zu thun nôk roh a ti pe nôka, khanchu a zu thun nôkin chu a pum danga a taksahai ang dênin a om pe nôk ta.

⁸ Khanchu Pathianin, thilirkhêl voikhatna kha ni thoa nang an iam no le khom, voihnina nir hmuhai tena chu nang iam ta an ti.

⁹ Khanchu kha irsinsiana inhni kha an iam noa, ni ihril tak an sôn no’n chu, tui luang tui zu thâlin lân, irnêng chârna buakin lân: kha tui irnêng châra ni ibuak kha thisen hong chang a ti, a tia.

¹⁰ Khanchu Mosia’n Rengpa kuanga, “O Rengpa ni tîr no ro, kei chu maton ata mi chong thei ni ma unga, mi chong ak mi ki lei ni sikin,” a tia.

¹¹ Khanchu Rengpa’n, “Mihriam hmûr hi tu isiam mo ni isôn, mikuar sêthai, mit vârhai, mitchôhai hi tu itho mo a ini?

¹² Khasikin fe zelin lân, ni hmûr chu keima hmûr ni a ta, ni ihril hrang khom nang ti pe thiai ki ti,” a tia.

¹³ “Ni mah Rengpa mi dang tîrhai ro,” a tia.

¹⁴ Kha tena chu Rengpa kha Mosia chunga a milung hoi pe maka, “Ni upa Arona Levi irchia mi a iom mo ni ma? Ama chu chong âng khom a theia, irngai roh nang a don hrangin a hong, nang a hmu’n chu a sân lômin a raifân a ta.

¹⁵ Khasikin nangma’n chongpui masa’n lân, ki thuhrilhai kha hril pe vingin lân, ni hmûr le a hmûrhai chu keima’n nangni ompui ki ta, nin iti hranghai khom, nangni intitir ki ta.

¹⁶ Khanchu Arona kha mipui laia ni thuhril irhlettu chang a ta, nangma hrangin ni hmûr ni bâi nang chang pe a ta, nangma chu ama hrangin a Pathian angin om ni ta.

¹⁷ Khanchu nangma’n, hi khianghrol hi chôi ni ta, kha leh khan irsinsiana thilirkhêlhai ni itho hrang a ni,” a tia.

Aigupta rama Mosia kîr nôkna

¹⁸ Khanchu Mosia chu a tarpu Jethroa kuang a kîr nôka, “Aigupta rama ki urêng omhai so a dam a harin mo an la om lungkham takin nin fetir ro,” a tia. Khan a tarpu Jethroa khomin “Irtharngam takin va fe ro,” a tia.

¹⁹ Khan Rengpa’n Midian rama Mosia kuanga khan, “Fe’n lân, Aigupta rama va kîr nôk ro: nang a that hranga irsiamhai kha an thi zoi ta,” a tia.

²⁰ Khanchu Mosia chu a dôngma le a nâihai a hruaihaia, sakuartung chunga an chuangtirhaia, Aigupta rama an kîr nôk ta. Mosia khan Pathian khianghrol kha a chôi maia.

²¹ Khanchu Rengpa’n Mosia kuanga khan, “Aigupta ram ni tung tena chu ni kuta thilirkhêl nang ki inchôitirhai hi Faroa mit hmua irlangtir ngêt ro, khannisianlân, a milung inliantir pe ki ta, khanchu mihai kha insuatirhai no ni.

²² Khan, nangin Faroa kuanga khan, ‘Rengpa’n, Israel hi ki nâipa ki nâi lutîr a ni:

²³ khan ki nâipa’n ki sin a tho theina hrangin insua roh ki tia, nuam mak chea, ni nâipa, nâilutîr thatpai ki ti, a ti ti ro,’ a tia.

²⁴ Khanchu hiang hin a hong nia, lampui riakbuka khan Rengpa’n Mosia chu a’rtongpuia, that a tuma.

²⁵ Khan Zipori’n lung bavo a lâka, a nâipa servun a tana, Mosia ke an tôn pea; khanchu Mosia’n, ‘Ki ta hrangin pasal thisen insuak ngam mi ni nih,’ a tia.

²⁶ Khasikin, ‘Sertan sikin pasal thisen insuak ngam ni nih,’ a tia.

²⁷ Khanchu Rengpa’n Arona kuang khan, “Mosia va don hrangin ramchârna hmuna son va fe ro,” a tia. Khanchu a fea, Pathian tânga khan a va hmua, a tum ta.

²⁸ Khan Mosia’n Rengpa’n a itîr nasan le thilirkhêl tho roh a iti murdi a hrila.

²⁹ Khanchu Mosia le Arona’n Israel irchi ulianhai kai chu an koi bukhaia:

³⁰ Khanchu Rengpa’n Mosia kuanga a ihril murdi kha Arona’n a hril pehai vinga, mipuihai mit hmua thilirkhêlhai kha a’rhmuhaia.

³¹ Khanchu mipuihai khan tak an sôna: Rengpa’n Israel irchihai chu a ompuihaia, an dengthei lamhai Rengpa’n a ni hmu mai a nih iti an irhriat suakin chu an lu kûnin, chubai an mûk ta.