FESUAKNA 36 - PATHIAN LEKHABU IRTHIANG C.L. Bible (BSI)

¹ “Bezalela, Oholiaba le kut sintheihai pâl, Rengpa omna puan ina hrang thil nang murdi sinsiam theina le vârna Rengpa ipêkhai khan, a thupêk ang takin itinrêng an isiam hrang a ni,” a tia.

Mihaiin thilpêk an pêk intam

² Mosia’n Bezalela, Oholiaba le Rengpa’n theina a ipêk le sinzong nuam kut sinthei pâlhai kha a koia, sin phut hrangin a hrilhaia.

³ Puan in irthiang sinna hranga Israel mihai thilpêk hong chôi kha Mosia kuang ata an idong a ni. A zîng tin Israel mihai khan an thilpêkhai Mosia tah hrangin an la hong chôi irzôm maia.

⁴ Mi kut sintheihai khan Mosia kuang an fea,

⁵ “Rengpa’n hmun irthianga sinthôna thil siam hranga a itih dân kêng mihaiin an hong ipêk a ni,” an tia.

⁶ Khanchu Mosia kha riakbuk hmun tina khan tukhomin puan in irthiang sinna hranga thilpêk inhlanna nei ta loi hrangin thupêk a sema; khanchu mihaiin thilpêk an hong ichôi ta loi a ni.

⁷ Hong chôi saia om tâk lua kha a nang murdi sinna hranga nang nêkin a itam ual a ni ta.

Rengpa omna puan in sinna thu

⁸ Sinthotuhai laia a kut irloi ualhai khan Rengpa omna puan in chu an sina, patzâi irhmi, samul rông dum, a senduk le a seninlâr cherub dûr ze enhoi taka zepa không hlek sôm hranga siam.

⁹ Puanzâr chu a sei lam mûk sômhni kiriat, puanzâr chu a khang tiang chu mûk minli seng a ni; puanzâr murdi chu a irtiat zit a ni.

¹⁰ Khan, puanzâr ringa kha chu an suiirzom zita, puanzâr ringa danghai khom an suiirzoma.

¹¹ Khan, puanzâr buk tina a hmor taka khan a rông duminpôlin a sina, khaang dên khan a puanzâr hmor letianga irkopa khan a sin saa.

¹² Phêk tin hmora khan hlam sômringa nângval irkopin, a’rdîntaka phêk inhnina khom khan nângvalin sômringa dang inkhop sai.

¹³ Phêk hni kha inkhata siam hrangin a’rkoptirna hrang rângachak kuaikim sômringa an siama.

¹⁴ Puan in chung chu kêl mula siam puan hlek sômhleikhatin a siama.

¹⁵ A rêngin irangnatin a dung mûk sômthum le a khang mûk minliin a isiam a ni.

¹⁶ A phêkin ringa ngain an insui irkoptira, kiruk danghai khom phêk danga an inkhop sa.

¹⁷ Phêk khatna sîr tiang khan irkual sômringa le phêk inhnina sîrtaka lekha khan nângval sômringa an inkhop sa a ni.

¹⁸ In chung inkhata siam hrangin phêk hnihai insui irkoptir hrangin dâr kuaikim sômringa an siama.

¹⁹ A chung thuaa hmang hrangin kêlbelra chal vun sen le savun a sazât chi an siama.

²⁰ Khan, biakbuk bang intunghai chu sitim thingin a siama.

²¹ Thingphêk tin a sei tiang chu mûk sôm, thingphêk tin a khang tiang chu mûk khat le a chimrip a ni.

²² Thingphêkhai kha hmunkhata irzom theina hrangin a’rlûtmat thei, a kîm inhni a oma, a rêngin a kîm an inneitirhai chit a ni.

²³ Sim tianga intung hrangin sômhni,

²⁴ an toina hrangin a sûng ir-ông sumrua inluan sômminlia kîm inhnia chel indetna nei chitin, an toina hrang inhni an isia sa a ni.

²⁵ Hmâr tianga puan ina intung hrang phêk sômhni,

²⁶ an toitirna hrang sumrua siam sômminli, phêk khat hnuaia inhni hni toina siam sa a ni.

²⁷ Nitâk tianga puan ina intung hrang phêk ruk,

²⁸ a kil tianga hrang phêk hni an isiam a ni.

²⁹ Hi a kila hai hi a bula irzomtir a ni, a sîp dêna irzomtir a ni.

³⁰ Khaangin chopui kiriat, sumrua inluan an toitirna sômhleiruk, inkhat hnuaia toina hrang inhni hni a iom chit a ni.

³¹ A bang tung tianga indettirna hrangin tângkhang hrang sitim thingtuai sômhlei ringa,

³² hmâr tiang banga, sim tiang banga, a hnung tiang nitâk tianga banghaia khan ringa ngain an khanga.

³³ a tângkhang inlaina taka khan a tung tianga a laitaka khang khan, puan in hmor inhni khan an irtongtir a ni.

³⁴ Thingbuk intunghai chu rângachak tuiin an inluana, a tângkhang danghai indetna hrangin rângachak irkual an inkhopa, annihai khom khan rângachaka inluan a ni.

³⁵ Patzâi irhmi samul rông dum a senduk le a sen irzêl cherubhai dûr zia enhoi taka zepa không chu chontan puanzârin an hmanga.

³⁶ Sitim thing chopui minli puanzâr indettir hrang rângachak inluanin an phuna, rângachak kuaikim an inkhopa, chopuihai phûmna hrang sumrua inluan toina minli an siam sa.

³⁷ Puan in mikota târ hrang patzâi irhmi thûr sai samul dum, a senduk le a sen irzêl, a’rvô enhoi tak puanzâr an khônga.

³⁸ Hi puanzâr hranga hin sitim thing chopui ringa kuaikim inkhop, a sîphai le puan banga hrang khianghrol tuan rângachakin an inluana, a chopui intoina hrang dâr thîr ringa an siam sa.