FESUAKNA 29 - PATHIAN LEKHABU IRTHIANG C.L. Bible (BSI)

Ochai namindet dân

¹ “Keima sin tho hranga ochai sin tho hrang, Arona le a nâihai ni irserindang hrang dân chu, hiang hin ni a ti; sehrâtchal tuai inkhat le kêlbelra chal inhni demnaboi kaiin lân,

² chol kop loi bai oliv hriaka irpol leh, sahriak pol sai bai phêk satakin siamin lân,

³ annihai kha kok sûnga thunin lân, sehrâtchal inhni ni hong ichôi hrang a ni.

⁴ “Arona le a nâihai chu ki omna puan in kot bâia hong hruaihaiin lân, dân anga irthârna tui irsil hrangin hrilhai roh.

⁵ Arona chu ochai tukfam, songkol irfual, Efod songkol, Efod hnuaia songkol irfual rôpbel le kong khit irkipin.

⁶ A lua lukôm, “Rengpa HRANG TUM,” iti inkhumtir roh.

⁷ Irthû a nang zoroa hmang zât oliv hriak kha la’nlân, a lua buakin irthûtir roh.

⁸ A nâihai kha hong hruaihaiin lân, songkol innghâkhai sian,

⁹ an konga kongkhithai khitin, an lu tiang khom lukhum inkhumtirhai roh. Khaang taka khan Arona le a nâihai chu ni inamindethai hrang a ni. Anni le an irchihai chu ochai hong ni thei mai ta an ti.

¹⁰ Sehrâtchal tuai ki omna puan in kôla hong kaiin lân, Arona le a nâihai chu sehrât lu chunga kut irnghat hrangin hrilhai roh.

¹¹ Puan in kôla khan, ki kuang sehrâtchal chu that roh.

¹² Sechal thisen kha la’nlân, maichâm kila khan ni kut mitin leh polin lân, a ban la om chu maichâm kôla khan bun ving roh.

¹³ A rîl tuamtu, a hlap murdi le a mithin a sa tak, a bê inhni a thâi kop kha la’nlân, sual irbôlna hrangin maichâma hâlirvôm roh.

¹⁴ Khanchu a hme, a vun, le a rîlhai chu dâi pên tiang hâlirvômin lân, sual irbôlna thil inhlan a ni sikin hâlirvôm ving hrang a ni.

¹⁵ “Belrachal inkhat kaiin lân, Arona le a nâihai chu an lu chunga an kut irnghat hrangin hrilhai roh.

¹⁶ Thatin lân, maichâm irhîl kha thisen inthek ro,

¹⁷ hme kha irchan indi’n lân, a sûngkua le a hnungzâng tianga a malhai chu irsûkinfâi ro, a lu le a ke danghai chu a chunga khan se roh.

¹⁸ A rêngin thilinhlan belra chu ni inhlan hrang a ni, hi thilinhlan mirimhoi hin ki milung a inchuktir ngai a ni.

¹⁹ “Belrachal inkhat kai sa’n lân, serindangna hmang ngai kha, Arona le a nâihai chu an lu chunga kut irnghat hrang ti pehai roh.

²⁰ Thatin lân, a thisen chu Arona le a nâihai mikuar chang tianga silnianghaia, kut chang tiang kutpui hmora, kepui chang tiang hmora nâlin lân, a ban la om chu maichâm irhîl kha inthek roh.

²¹ Maichâm thisen irthûna hmang ngai oliv hriak senkhat la’nlân, Arona le a puanhai chunga le a nâihai le an puanhai chunga khan inthek roh. Khanchu ama le a nâihai an puanhai murdi keima hranga serindang ni ta an ti.

²² Kêlbelra irmei satak, a sûngkua tuamtu a hlap, a mithin sanatak, a bê inhni a thâi kop le a chang tianga malpui kha âtin lân,

²³ bai inhlan khamphulua sia chu a zât kipa bai tiam khat seng oliv hriak le inhmet bai tiam khat le chol kop loi bai tiam la’nlân,

²⁴ kha fâk le nêk thil murdi kha Arona le a nâihai kuta fe’n lân, ki ta hrangin thilpêk bîk nghi hrangin, thâr hrangin ni ihrilhai hrang a ni.

²⁵ An kuta irthokin la’nlân, maichâma hâlirvôm thilinhlan chunga khan sia’n lân, ki ta hrangin thilinhlanna nei roh. Ni thilinhlan mirimhai hin a ni inlômtir ngai a ni.

²⁶ Hi belrachal mier hi la’nlân, ki ta hrangin thilpêk bîk ni hrangin thâr roh. Khaangin hihai hi ni dongtum ni a ti.

²⁷ Ochai namindet zoroa kêlbelrachal mier le a malpui thârin ki kuang thilpêk bîk ni inhlan hrang a nia, ochaihai ta hranga thâr hrang a ni.

²⁸ Israel nâihai irhîlin thil an inhlan kha la’nlân, a mier le a malpui chu ochaihai dongtum kumtuanga hranga ki indet a nia, hi hi Rengpa’n thilpêk bîk mipui ata ki idong chu a ni.

²⁹ “Arona ochai tukfamhai hi a thi tena chu a nâihai kuang ochai ni hranga an phunhai zoroa an innghâk hrang a nia, an kuta ni ipêkhai hrang a ni.

³⁰ Arona nâi irthûla ochaia namindet khan sintho hranga ki omna puan in hmun irthiang a fe zoroa sûn sari sûng chu hi puanhai hi a irbel hrang a ni.

³¹ “Arona le a nâihai namindetna hrang, kêlbelrachal hme chu lâkin hmun irthianga but roh.

³² Anni khan ki omna puan in mikot bula khan khamphulu sûnga bai la om le khan fa ri se.

³³ Anni namindetna sual irbôlna hme chu an ifâk hrang a ni; khalâi irthiang a nia, ochai vaiin an ifâk thei hrang a ni.

³⁴ I mani, hme mo bai mo zîng dênin fa loiin a la omin chu, hâlpai ving hrang a ni; hme ser a ni sikin, a dâi chu fa hrang ni ta mah.

³⁵ “Thu nang ki ipêk ang takin Arona le a nâihai chu sûn sari sûng chu ni iserindanghai hrang a ni.

³⁶ A sûn tin sual irbôlna hrangin, sehrâtchal inkhat inhlan ngêt ni ta, kha leh khan maichâm kha a ithâr hrang a ni. Khanchu oliv hriak pol ni ta, irthiang taka ni isiam hrang a ni.

³⁷ Khaang khan sûn sari sûng chu, a sûn tin tho ngaiin lân, khanchu maichâm kha hor thiang ving a ta; mihriam mo, a dang khomin a tôn murdi a’rthiangna irtha khan a ipol ving hrang a ni.

A sûn tina thilinhlan

³⁸ “Zoro la hong om mai hrangin a sûn tin maichâma kêlbelrate inhni ni inhlan ngai hrang a ni.

³⁹ Zîng tin belratehai laia inkhat inhlan ni ta, a dang kha khohloi tiang inhlan ngai roh.

⁴⁰ Belrate matona leh khan baidi a sa chi her khat le oliv hriak irthît sai litar khat ni inhlan hrang a ni.

⁴¹ Belrate inhnina kha chu khohloi tiang inhlan nôkin lân, ama leh khan baidi oliv hriak le uain khom zîng tianga dôr kha inhlan nôk roh. Hi hi keima Rengpa kuanga fâk nêk thilinhlan chu a nia, a mirimhai hin a ni inlômtir ngai a ni.

⁴² Zoro la hong thiaia hin, hâlirvôm thilinhlan hin ki omna puan in kotbâi kôla khan inhlanin a iom mai ngai hrang a ni, kha hmuna khan kêng ki mihai zuang irtongpuihai ngai ki ta, nangni ki ichongpui hen hrang a ni.

⁴³ Kha hmuna khan Israel mipuihai irtongpuihai ki ta, ki ompuina vâr irkhêl khan a hmun kha irthiangin siam ki ti;

⁴⁴ puan in le maichâm chu ser irthiang ki ta, Arona le a nâipasalhai khom chu ochai sina ki sin tho hrangin serindanghai ki ti.

⁴⁵ Israel mihai laia lêng ki ta, an Pathian ni ki ti.

⁴⁶ An laia ki lêng theina hrangin Aigupta ram ata anni hruaisuaktu Rengpa an Pathian kha ki nih ti inhria an ti. Keima hi Rengpa an Pathian chu ki ni.