FESUAKNA 28 - PATHIAN LEKHABU IRTHIANG C.L. Bible (BSI)

Ochaihai tukfam

¹ “Ni upa Arona le a nâihai Nadaba, Abihua, Eleazara le Ithamara hai kha koihaiin lân, Israelhai lai ata keima ochai ni hrangin khâihai roh.

² Ni upa Arona ta hrangin ochai tukfam songkol irfual mahripom tak siam pe roh.

³ Kut sin theithiamna ki inneitirhai murdi koihaiin lân, ki sin tho hranga ochai irthiang an ni theina hrangin.

⁴ Hi tukfamhai hi an inei hrang a ni, lungbom, Efod songkol irfual, songkol sûnga innghâk zât lukôm, diar le kongkhit hai, ni upa Arona le a nâipasalhai innghâk hrang ochai songkolhai nei ri sehai, keima ochai an ni theina hrangin.

⁵ Kut theithiam pâl khatin samul dum, a senduk le a sen le rângachak pat zâi irhmi thûr sai samul dum, an ihmang hrang a ni.

⁶ Efod chu rângachak patzâi irhmi thûr sai samul dum, a senduk le a sen le irpol enhoi taka không hrang a ni.

⁷ Dârsuama inhnia inkhâiin, a hnung tiang le a mân tianga inkhopin, a khilina siam ri se.

⁸ Khaang dên khan kongkhit a sa chi a không inkhat a ni theina hrangin Efod puana khan an inkhop sa hrang a ni.

⁹ Onik lung inhni la’nlân, Israel irchi nam sômhleihni irhming ni irziak hrang a ni.

¹⁰ A ulian dônin kiruk rukin ni irziak hrang a ni.

¹¹ Lung man tam tianga inhriat thei mi inhrilin lân, Israel nâihai irhming lungphêk inhni sinin lân ni irziak hrang a nia, rângachak phûm hrang a ni.

¹² Lung man tam inhnihai kha dârsuam chunga khan Israel nam sômhleihni inhriat maina hrangin belsa ni sianlân. Arona khan Rengpa makunga a’rhming chu a dârsuama irvâ a ta, Israel namhai chu ki inhriat mai hrang a ni.

¹³ Lung man tam inkhopna hrang rângachak inhni siamin lân,

¹⁴ rângachak irthît infâi hmangin zîngziri hrui siam sa’n lân, an khopna hranga khan inkhop roh.

Rôpbel

¹⁵ “Patzâi irhmi thûr sai, samul dum, a senduk, a sen le rângachak pat anga efod anga khôngin, Pathian an koi zoroa ochaihai dâra bâng hrang puan insui theihai enhoi takin ni insuitirhai hrang a ni.

¹⁶ Thep pumin kil minli nei, khâpkhat vêla chêng ni ri se.

¹⁷ Lung man tam rân minli inkhop ni sianlân, a rân inkhatna khan Odam lung, Pitda lung, Berekot lunghai om sianlân;

¹⁸ A rân inhnina khan, emeral, safir le endonuk (lunghlu),

¹⁹ A rân inthumna khan Lasen, Agate, Amethist hai om sa sianlân;

²⁰ A rân minlina khan Tarkois, Onik, Jasper, lunghai om sa sianlân, kha lung man tamhai kha rângachak phêka inkhop ving hrang a ni.

²¹ Lung man tam sômhleihnihai laia an rêngin Israel nam inkhat seng irziak hrang a ni. Israel nam sômhleihni entîrna a ni theina hrangin.

²² Rôpbel inkhâina hrang rângachak irthît infâi zîngziri hruiin siamin lân,

²³ rângachak irkual inhni, rôpbel hmora inkhop hrang, siam sa roh.

²⁴ Zîngziri hmor inhni chu rôpbel hmora irkuala khan inkhop hrang a ni.

²⁵ A hmor inhni kha lung man tama inhni oma khan inkhopin lân, Efod puan irvâ leh khan irzom ri se.

²⁶ Efod dep rôpbel sûng tiang hmora rângachak irkual inhni inkhop sa roh.

²⁷ Efod puan irvâna irdîna kop sian, Efod khitna leh khan enhoi taka không sai hmora khan rângachak irkual dang inhni inkhop sa roh.

²⁸ Rôpbel le efod rângachak irkual chu pat dum inhrual leh irzomin lân, rôpbel chu a kong irdîna det mat sianlân, a irthôl viat hrang ni mah.

²⁹ “Hmun Irthianga khan Arona a hong lûtin rôpbela Israel namhai irhming chuangna chu a hong isong hrang a ni; ama kha keima Rengpa ki mihai nin hriat suaktirtu nih a ti.

³⁰ Efod songkola khan Urim le Thumim kha om sianlân, ni chongpui hrangin a hong rikipa Arona lung irdîn taka a iom hrang a ni. Khaangin Arona a hong rikipin Efod kha innghâk a ta, Israel mihai hranga ki inuam lam chu siam infel thei a ti.

Ochai tukfam dang

³¹ “Efod hnuaia innghâk hrang songkol irfual chu samul dum rônga không hrang a ni.

³² A laitaka lu thunna tiang a ir-ông hrang a ni, a chet thei loina hrangin a hmor kîm hrang a ni.

^33-34 A hnuai tianga hmor irfuala khan samul dum, a senduk le a sen dûr rângachak silniang kârirthâk a inkhop hrang a ni.

³⁵ Kha kha ochai sin a tho zoroa Arona innghâk hrang a ni. Hmun Irthianga Rengpa kuang a lût tiang le a suak tiang silniang chu nok ngai a ta, that ni thei ngai no ni.

³⁶ “Rângachak felriai phêka khan, namindetna, kutsabia irziakin, a chunga khan, “Rengpa HRANG TUM,” ti irziak inchuang roh.

³⁷ Ochai lukôm maton tiang khan hrui dum leh khit roh.

³⁸ Arona’n lukôm leh khan a michala inkhop a ta, khanchu keima Rengpa hin Israelhai irbôlna thil ki kuanga an hong inhlan kai chu lei pom ki ta, an thil inhlanhai khan tho’nchâina nei khomhai sian.

³⁹ Arona innghâk hrang songkol hnuaia lukôm pat irhmia không ni sianlân, a kong khitna hrang khom enhoi taka irvôtir ni ri se.

⁴⁰ “Songkol irfual kong khit le lukhumhai, Arona nâipasalhai hrang siam pehai ro; man neia irvôtir hrang a ni.

⁴¹ Ni upa Arona le a nâihai chu innghâkhai sian, ki sinthotu ochai ni hrangin Oliv sahriak irthûtirhaiin lân, inhlanin lân, ser indanghai roh.

⁴² Pat ze irhmia không, tuman kong hnuai ata a mal dêna sei ni ri se, an inzakpui an lang loina hrangin.

⁴³ Arona le a nâihai khan, puan ina an hong lût zoroa, Hmun Irthianga om maichâma ochai sintho hranga an hong zoro khoma, kha kha an ikai ngêt hrang a ni. an inzakpui ngai an lang duai khoma that an ni loina hrangin, hi hi Arona le a’rchihai hrangin kumkhuaa tho hrang dân chu a ni.