FESUAKNA 25 - PATHIAN LEKHABU IRTHIANG C.L. Bible (BSI)

Pathian kairêng sinna hrang tholôm

¹ Rengpa khan Mosia kha hiang hin a ti pea,

² “Israel mihai chu ki kuang thil hong pe hrangin hrilhai roh. Mi’n thil an pêk nuam dôr chu lei la pehai roh.

³ Thilpêkhai chu, rângachak, sumru le sumsen;

⁴ Puanzâi irhmi, samul dum, a senduk le a sen; kêl mul leh isiam puan;

⁵ kêlbelra vun chingsen leh irpol; savun sa zât; sitim thing;

⁶ Meiser le inchokna hrang hriak; irthu zoroa hmang hrang sahriak le hâl hrang mirimhoi;

⁷ Ochai a rôpa a irbel hrang onik lung songkol irfîng le lung man tamhai a ini hrang a ni.

⁸ Mipuihaiin ki ta hrangin puan in irthiang an ni isin pe hrang a ni, an kuang ki om theina hrangin,

⁹ kairêng chu a sûng irvotir hrang dân chu a’rlim nang ki irhmutir lam takin ni isin hrang a ni.

Thuthung Bôm

¹⁰ “Sitim thing le bôm, a dung mûk hni a chimrip, a khang mûk khat a chimrip, a’rsâng lam mûk khat a chimripin ni isin hrang a ni.

¹¹ A pên tiang le a sûng tiang rângachak irthît infâi hmangin inluan ni a ti, a hmor chu rângachak rôngin ni ituam irhlûm hrang a ni.

¹² Rângachak leh irki minliin siam unglân, a ke minlihai khan a ruaiin inhni hniin inkhophai roi.

¹³ Sitim thing leh zônfunghai siam unglân, rângachaka tuamin

¹⁴ Bôm sîra khan irki omhaia khan nin irol hrang a ni.

¹⁵ Zônfunghai chu bôm irki sûnga a iom mai hrang a nia, la suak viat hrang ni mah.

¹⁶ Lungphêk inhni, thupêkhai chuangna nangni ki ipêk hrang kha a sûnga se roi.

¹⁷ “Bôm sîng hrang chu a dung mûk hni a chimrip, a khang mûk khat a chimrip, irthît infâi sai rângachak leh siam roi.

¹⁸ Rângachak suk inphêkin cherub inhni,

¹⁹ A sîng dung tianga omin siamin lân, a sîng leh khan phêk khata suain ni isiam hrang a ni.

²⁰ Cherubhai chu hmâi irsongin ni isiahai hrang a ni, an mitha inphar leh khan bôm sînghai kha a irkhu zoi ving hrang a ni.

²¹ Bôm sûnga khan lungphêk inhni nang ki pêk hrang dân sia’n lân; a sîng leh irkhutir roh.

²² Bôm kôla khan irtok hen ei ta, cherub inhni Thuthung Bôm chunga om kâra irthokin nang chongpui ki ta, Israelhai laia thu ki ipêk hrang lam nang zuan hril ki ti.

Bai inchai sai siana dokâng

²³ “Sitim thingphêk leh dokâng ni isiam hrang a ni; a dung mûk hni a khang mûk khat, a’rsâng lam mûk khat a chimrip ni ri se.

²⁴ Rângachak rông leh inluanin lân, a sîrhai khom rângachak leh tuam roh.

²⁵ Bêl minli a hmor irangsarin siamin lân, rângachak leh ni ithop hrang a ni.

²⁶ Rângachak leh a’rzônna hrang irki minli siamin lân, a ke irki minli omnahai khan inkhop roh.

²⁷ A’rzônna fung rolna hrang irki minli chu a hmor thopna kôla ni isia hrang a ni.

²⁸ Sitim thing leh ngêt zônfung sinin lân, rângachak leh tuam roh.

²⁹ Khênghai, khilât hai, bêlhai le khuri hai uain thilinhlana hmang hrang rângachak irthît infâiin ni isin hrang a ni.

³⁰ Dokâng chu Thuthung Bôm kôla ni ido hrang a ni. A chunga khan ki kuanga inhlan bai ser kha a iom mai hrang a ni.

Meiser siana

³¹ “Rângachak irthît infâi le meiser siana hmun sari ni isiam hrang a ni. A ngul le a ônhai chu ni incher hrang a ni; a’rvotirna pâr irmuamhai le an rêngin an irzom ving hrang a ni.

³² A kungpuia irthokin a ôn kiruk suak a ta, hi tiang inthum, hi tiang inthumin.

³³ A ôn kirukna tina khan a’rvôtirna pâr illim inthum almond pum irmuam le a pâr a iom hrang a ni.

³⁴ Meiser siana ngul a thungpuia khan almond pâr irmuam le a pâr anga a’rvotirna pâr minli a inei hrang a ni.

³⁵ Khan a ôn bop thum hnuaia khan pâr irmuam inkhat a iom hrang a ni.

³⁶ Pâr irmuam le a ônhai le meiser siana hmun kha rângachak irthît infâi suk sai phêk khat a ini hrang a ni.

³⁷ Meiser siana hmuna khan meiser sari inchokin lân maton tiang a êl theina hrangin a siana khan intoitir roh.

³⁸ Meiser inchokna ni hmang hrang meichep le mei indomna rângachak irthît infâi saiin siamin lân.

³⁹ Rângachak irthît infâi sai her 35 le meiser siana le ni hmangrua danghai le ni isiam hrang a ni.

⁴⁰ Tâng chunga a dûr nang ki irhmutir ang tak khan irdîn takin ni isin hrang a ni.