FESUAKNA 21 - PATHIAN LEKHABU IRTHIANG C.L. Bible (BSI)

Suak enkol hrang dân

¹ “Hiang hin Israelhai zôm hrang dân siam pehai ro:

² Hebrai mi siahloa an irchôkin chu, kum ruk sûng chu suakin om a ta, kum sari tena chu ite pe loiin insua nih a ti.

³ Ni suak a chang phuta khan dôngma a ihruai hrang ni ma; khannisian innei saia irchôk a ni’n chu a dôngma khom a ihruai sa hrang a ni.

⁴ A pu’n dôngma a inneitir a nia, nâi a neiin chu a dôngma le a nâi le tehai chu a pu ta an nia, ama chu a bing vaiin suak thei ni a ti.

⁵ Khannisian suak khan a pu, a dôngma le nâihai lunginkhama zalên taka om a nuam loina thu an puang suakin chu,

⁶ a pu khan Pathian ina hruai a ta, mikot kôla inngîrtir a ta, thîr irzum leh a mikuar inver pe a ta, a hring kâr chu a suak ni mai ta a ti.

⁷ Mi’n a nâinu suakin a zuarin chu pasal suaka an insuahai angin chu phal ni mah.

⁸ Ama chu dôngma nei nuamtuhai hranga zuar a nia, a nuam nôk noa ni’n chu, a pa kuang zuar nôk hrang a ni, a pu’n a huang sika khan mi dang kuang a izuar thei loi a ni.

⁹ Mi’n a nâipasal dôngma hrangin suak nupang a’rchôkin chu a nâinu ang takin a ienkol hrang a ni.

¹⁰ A nâipa’n dôngma dang a nei nôkin chu a dôngma miluinu kha fâk nêk silkai le thuneina a lei hong inei ngai khom kha a la inneitir mai hrang a ni.

¹¹ Hi sintum inthumhai hi a tho pe thei no’n chu a man la loiin a insua hrang a ni.

Kuttum chungchâng

¹² “Mi tukhomin mi vîk sianlân, a ivîk kha a thi’n chu, ama khom kha that ngêt hrang a ni.

¹³ A tum sika a ithat a ni no’n chu, hmun nangni ki indang pena khan lût a ta, khatak khan zôk thei a ti.

¹⁴ Zôk hrangin mi’n irtanhai khom sianlân, ningmur irlâka mi dang that chu kêlsuapaia, thatpai hrang a ni.

¹⁵ “Mâni nu le pa chunga kut insum chu that hrang a ni.

¹⁶ Zuar hranga mo, a suak ni hranga mihriam inrûk khom thatpai hrang a ni.

¹⁷ “Ama mo, a pa mo, khomâk sâmtu chu thatpai hrang a ni.

¹⁸ Mi irsualhai sianlân, inkhat khôkin lungtum leh suk sianlân, kut tum leh irchûm sianlân, a thi no’n chu ite dûk tho loi hrang a ni, kut tum tuangtu khan zâlhmuna inbokpui a ti.

¹⁹ Zâmin hong dam a ta, tuala khianghrol chôiin a’rvâk thei mâka chu a vîktu khan a ituam ving hrang a ni.

²⁰ “Mi’n a suaknu mo, a pa mo vîk thatpai sianlân, kha mi kha dûk tho hrang a ni.

²¹ Thi zel loiin sûn khat sûn hni la dam sianlân a pu kha dûk tho loi hrang a ni. A inei a inchân kha a ta hrangin dûk thôna a iruk pe a ni sikin.

²² “Mi an irsuala, nupang inrâi an innatir duaiin chu, ama’n pop liam tong no khom sianlân, a nâi vong kha a siat pein chu, nupang pasal irphu dôrin, roirêltuhaiin a sa an iti lam taka ircho hrang a ni.

²³ Khan nupangin pop liam a tongin chu, hringna irthûlin hringna

²⁴ mit irthûlin mit, ha irthûlin ha, kut irthûlin kut, ke irthûlin ke,

²⁵ meia kâng irthûlin vîkirdulin a ituang hrang a ni.

²⁶ “Mi’n a suakpa mit mo, a suaknu mit moh vîk incho pe sianlân, a mit siatna man a ipêk hrang a ni.

²⁷ A ha inkham pe sianlân an ha manin an ithuan hrang a ni.

A neituhai mophurna

²⁸ “Sehrâtchalin mi tu mani sik that sianlân, sechal chu lung leh dêng that ni a ta, a hmê kha fa hrang ni ma; a chongpu khomin a kut a insum hrang ni mah.

²⁹ Sehrâtchal khan mi a lei sik mai ta ngaiin chu, sechal chu lung leh dêng that ni a ta, a chongpu khom lung leh dêng that ni a ti.

³⁰ Khannisian a chongpu kha a hringna inzôk hranga irchôk a ni’n chu a bituk zât chu a ipêk ngêt hrang a ni.

³¹ Sehrâtchal khan nâipang pasalte mani nupang mani a that khomin ulian a isik that rêl anga rêl hrang a ni.

³² Sehrâtchal khan suakpa moh suaknu moh sik that sianlân a chongpu khan suak neitu kuanga khan tangka sômthum a ipêk hrang a ni, sechal chu lung leh dêng that hrang a ni.

³³ “Mi’n khur sîng an hongin chu, khur thar choiin a sîng nôk noa sehrâtchal moh sakuartung moh a tâkin chu,

³⁴ a hmun a ichoi ngêt hrang a ni. A chongpu kuang khan sum chu pe a ta, a hmê chu la thei a ti.

³⁵ Mi sechalin mi dang sechal that sianlân, an ruaiin a la dam sechal kha zuar an ta, a man irsem an ta; a thi sai hmê khom kha an irsem hrang a ni.

³⁶ Khan sehrâtchal khan mi sik a lei songa a chongpu khan khit indet loi ni ta ang sianlân, a isik that pepu kha sehrâtchal ngêtin a ituam hrang a ni, a hmê chu la thei a ti.