FESUAKNA 20 - PATHIAN LEKHABU IRTHIANG C.L. Bible (BSI)

Thupêk sôm

¹ Pathianin thu a hrila, a thu hril chu hihai hi a ni:

² “Suaka nin omna Aigupta rama irthoka nangni hruai suaktu, Rengpa nin Pathian chu ki ni.

³ Keima ti no chu Pathian dang reng nei no roi.

⁴ Nangma hrang millim khom siam no ro, chung tianga irvâna om mo, irnênga om mo, irnêng hnuaia om mo, ir-angpui ite ni isiam hrang ni mah.

⁵ Annihai kha chubai ni imûk hrang khom ni ma, an sin khom ni itho hrang ni mah. Keima Rengpa ni Pathian hi Pathian nunsetak ki nia, a ni hualtuhai chu an irchi khom irlo thum irlo minli dênin an pahai sualna sikin an nâihai deng kin theitir ngai.

⁶ Khan lung ni thunga ki thupêk zômtuhai chu an irchi sâng tamtak tena khom lungkham insua mai ki ti.

⁷ “Rengpa ni Pathian irhming sâmin minlak tho no ro, minlaka a’rhming sâmtu chu Rengpa’n dengintheitir loiin om no ni.

⁸ Sabat nî chu ni iser hrang a nih ti inhre mai roh.

⁹ Nangma hrangin sûn ruk sûng sin thei ni ta;

¹⁰ Sûn sari nî chu Rengpa ni Pathian ta hranga irngam nî a nia; Kha nî sûn khan chu ite ni isin hrang ni ma, ni nâipasal le nupanghai, ni suakhai, ni sahai, nam dang nin rama om khomin sin an izong hrang ni ma;

¹¹ Rengpa khomin sûn ruk sûnga khan Tuikhanglian, irnêng le irvân le a sûnga om murdi a siama, sûn sari nî chu a irngam chian a ni, satakin sat a vura a iser a ni.

¹² “Ni nu le pa mahrip tho’n lân, khanchu Rengpa ni Pathianin ram nang a ipêka hin hring dam sôtin om ni ti.

¹³ Mi ni ithat hrang ni ma,

¹⁴ Ni iuirê hrang ni mah.

¹⁵ Inru ni itho hrang ni mah.

¹⁶ Ni tualbômhai chunga inhriattu mi laka ni irsiam hrang ni mah.

¹⁷ “Ni tualbômhai neinun ni irzuk hrang ni ma, ni bômhai dôngma ni irzuk hrang ni ma, a suakpa mani, a suaknu mani, sehrâtchal mani, sakuartung mani ni bômhai ta rêng rêng chu ni irzuk hrang ni ma,” tiin.

Mipui irtha’nvâi

¹⁸ Mipuihai khan khonri tho’n kôlirtêk an hmua, bekul irhâi an inhriata, tâng sîpa meikhu hlet hlut an hmu’n chu, an phûk an thinga, hlatak ata an thîra.

¹⁹ Mosia kuang, “Kin kuang thu insîrin lân, irngai kin ti, Pathian ngêtin kin kuang thu an sîrin chu, kin thi duai ngânin te, iti hi kin ichi a ni,” an tia.

²⁰ Mosia khan, “Chi viat no roi, ama chitna lungrîl nin nei maia, sual sin ta loia nin omna hrangin nangni en irsin hrang vaia Pathian chu a izuang a ni,” tiin a sâma.

²¹ Khan khoma mipuihaiin hlatak ata an thîr maia; Mosia vaiin Pathian omna sûm duk kha a va nâia.

Maichâm hmang hrang dân

²² Rengpa’n Mosia kha Israelhai laia ti pe hrangin thu a pêka; “Atûn hin irvâna irthokin keima Rengpa’n nangni ki ichongpui a ni, ti nin inhriat ta.

²³ Sumru mo, rângachakin mo, nangni hrang siam no roi, keima ti no chu chubai mûk hrang ite siam no roi.

²⁴ Nin ni chongpuina hrang hmun ki indangna tina pil maichâm siam unglân, kha khan hâlirvôm thil inhlan le irbôlna thil inhlan kêlbelra le sehrât inhlan roi, zuang ki ta, sat nangni vur ki ti.

²⁵ Ki ta hrangin lung maichâm nin siamin chu, incher no unglân, nin lung sukna hmang sika khan nin iporinchetir a ni ta.

²⁶ Kalbi siam nang raka irsângin maichâm ni siam pe no roi, nin siamin chu nin lui tena nin ithuphai an lang duai itinin,” a tia.