FESUAKNA 2 - PATHIAN LEKHABU IRTHIANG C.L. Bible (BSI)

Mosia suakna thu

¹ Khanchu mi inkhat Levi irchi laia miin Levi nâinu dôngma’n a neia,

² kha nupangnu kha an râia, nâipasal a neia, kha nâi kha a hmêl sa hrai sikin tha thum a thupa.

³ Zoro sôttak thup a intak pe tâk sikin, irkuangte âlkataraa inluan a siama, kha sûnga khan an zâla, khanchu tuipui muangpanga phâiruang bil kôla a va siaa.

⁴ Nâite farnu khan nâite imo chang nih tiin hlatak ata a ena;

⁵ khanchu Faroa nâinu tuiirsil hrangin a zu fea, a suaknuhai khom tui kôla khan an oma, Faroa nâinu’n phâiruang kôla irkuangte a va hmua, a suaknu a van lâktira.

⁶ Irkuang kha an hongin chu nâite kha a hmua, a hong chap pea, a sân an ren ngôi ngôia, “Hi nâi hi chu Hebrai nâi a ni hi te,” a tia.

⁷ Khanchu nâite farnu khan Faroa nâinu kuang khan, “Hi nâite don hrang hin Hebrai nâi enkol thei nang zong pe ki tih”, a tia.

⁸ Khanchu, Faroa nâinu’n, “Fe’n lân, va zong ro”, a tia. Khanchu a va fea, kha nâite nu kha a va hruaia.

⁹ Faroa nâinu khan, kha nupangnu kha, “Hi nâite hi hruaiin lân ni don pe’n lân, thahlo nang pe ki ti,” a tia. Khanchu, nupangnu khan nâite kha a hruaia a pomin a enkol ta.

¹⁰ Khanchu nâite chu a hong lian tâka, Faroa nâinu kuang a hruaia, khanchu a nâipa a chang tâka. “Tui ata ki ilâk suak a ni sikin”, a’rhming khom Mosia ti’n a phua ta.

Midian rama Mosia rotna

¹¹ Khanchu Mosia a hong ulian tena chu, a zât a ponhai a va panhaia, Aigupta mihaiin intak taka sin an inthotirhai a hmua; khan Aigupta mi inkhatin Hebrai mi a vîk lai tak a hmua.

¹² Mosia’n a kôl a kiang a thîra tûte mi om mahai ti an hriatin chu, Aigupta mi chu a vîk thata, a phûmpai tâka.

¹³ Khanchu sûn danga a va fe nôka, Hebrai mi inhni an le’rsual pea, dik loi ualpa kuang khan, “Itho mo ni rualpa ni ivîk?” a tia.

¹⁴ Anni khan “Nang hi tu’n moh kin chunga roirêl le ircham nei hranga nang siam? Aigupta mi ni ithat ang khan ni that ni itum rêk ma ni?” a tia. Khanchu Mosia chu a chi tâka, “An inhriat kêng a ni ta hi teh”? a tia.

¹⁵ Kha thu kha Faroa’n an hriatin chu, Mosia that hrangin a’rsiama, khannisianlân Mosia chu Faroa in ata a rota, Midian rama a om ta: sûn khat chu tuisunsuak tuikuang kôla a oma.

¹⁶ Midian rama ochai khan nâinupang sari a neia; khahai kha tui chôi an fea, an pa kêlbelrahai in hrangin tui an irthaka.

¹⁷ Khan, belra entuhaiin an irzûlhaia; khannisianlân Mosia kha a thoia, nupanghai kha a sanhaia kêlbelrahai tui a pêkpuihaia.

¹⁸ Khanchu an pa Reuela kuang an va tungin chu, “A vuan sûn teh imo nin itong nin hon rang bâka”? a tia.

¹⁹ Anni khan, “Aigupta mi inkhatin belra entuhai kuang ata a ni changpuia, kin belrahai tui a ni pêkpuia, tui a ni irthakpui a ni”, an tia.

²⁰ Khanchu an pa khan, “Kha mi kha khôn mo a om? Itho mo nin hong imâksan? va koi unglân, bu anh khom hong fa ri se ba,” a tia.

²¹ Khanchu Mosia chu kha pa kuanga om kha a nuam tâka: Khanchu a nâinu Zipori kha a dôngma hrangin a pêka.

²² Nâipasal a neia, a’rhming khom Gersoma a tia. Mi rama rot ki ni sikin, a iti a ni.

²³ Zoro a hong sôt nôkin chu, Aigupta rêng kha a thia; Israel nâihai chu an sintho intakin an khêka, kha sin sôltaka an ikhêk kha Pathianin an hriata,

²⁴ Pathianin Abrahama, Isaka le Jakoba-hai kuanga a thuthung kha an hriat maia.

²⁵ Khanchu Pathianin Israel irchihai kha a thîrhai maia, a donsuihai mai a ni.