FESUAKNA 13 - PATHIAN LEKHABU IRTHIANG C.L. Bible (BSI)

Nâilutîr Pathian hrangin inhlan hrang

¹ Rengpa’n Mosia kuanga khan,

² “Israelhai laia nâilutîr pasal murdi sul sûng ata suak murdi mihriam mo, sa chal mo, ki kuang nin inhlan hrang a ni,” ki ta a ni sikin.

Chol koploi bai

³ Mosia’n mipuihai kuang khan, “A vuan sûn hin Aigupta ram suak ata nin zôk nî sûn a nih ti inhre mai roi; kut hrât takin Rengpa’n hi hmun ata nangni a ihruaisuak a ni hi; bai chol kop ite nin ifâk hrang ni mah.

⁴ Tha maton tak Abib tha a vuan hin nin isuak a ni.

⁵ Rengpa’n Kanaan mihai, Hit mihai, Amor mihai, Hiv mihai, Jebus mihai ram, dûttui le khuaitui luangna ram, nin irchibulhai pe hranga lei chonginkunga khan nangni a hruai intung tena chu, hi thaa hin a kum tin nin ihmang hrang a ni.

⁶ Sûn sari sûngin bai chol koploi nin ifâk ngêt hrang a ni, sûn sari ni sûn chu Rengpa ta hranga nin kût hmang nî ni a ti.

⁷ Sûn sari sûng chu bai chol koploi chu a om zel om no ri se, nin omna hmuna chol ite om no ri se.

⁸ Kha ni khan chu nin nâihai kuang, Aigupta ram ata kin hong suak laia khan Rengpa’n sinirkhêl a ni tho pe sikin, hi hi kin itho a ni hi,” tiin nin ihril hrang a ni.

⁹ Rengpa dân chu nin bâia a om mai theina hrangin nin kuta irsinsiana le nin mit kâra hin nin inhriat maina hrang ni a ti. Kut hrât tak Rengpa’n Aigupta ram ata nangni a hruai suak sikin.

¹⁰ Khaang khan hi thu inkung hi a kum tin a zoro taka nin hong izôm mai ngai hrang a ni.

Nâilutîr

¹¹ Hiang hin ni a ti, Rengpa’n nin kuanga le nin irchibulhai laia chonginkung dettak neia nangni pêk a inkung tâk ang khan, Kanaan mihai rama nangni a hruai intunga, nangni a pêk tena chu.

¹² Sul ata suak masatak pasal le nin sahai a chal maton takhai kha chu, Rengpa hrangin nin isia indanghai zêl hrang a ni: pasal murdi chu Rengpa ta hrang ni a ti.

¹³ Sakuartung a suak maton tak chu kêlbelrate le nin inhlan hrang a ni; nin inhlan nuam no’n chu a ring nin inkhiak pe hrang a ni.

¹⁴ Hiang hin la ni a ti, nakana chu nin nâihaiin, “Hi hi itina mo a ini?” tiin nangni an irdonin chu nangni’n an kuang, “Rengpa kut hrât takin Aigupta ram ata suaka kin om a ni insuaktir a ni.

¹⁵ Hiang hin a nia, Faroa’n kin suak hrang a phal no lai khom khan, Rengpa’n Aigupta rama nâilutîr murdi le sa a suak masa takhai chu a thathai vinga, khasikin pasal, sul ata suak masatak murdi hin Rengpa kuang kin irbôlna a ni hi; khannisian kin nâihai laia nâilutîr pasal murdi kin inhlan a ni, ti roi.

¹⁶ Nin kuta nin ta hranga irsinsiana ni a ta, nin michala irsinsianahai le kut hrât tak Rengpa’n Aigupta ram ata a ni hruaisuak tâka,” a tia.

Sûm le mei inding

¹⁷ Faroa’n mihai insuak hrang a phal zela khan, Pathianin Filistia ram tiang khan lampui nâi ual khomsian hruaihai maka; Pathianin irdoi a nang iti a’rhmu tena an lungrîl indang lamin Aigupta ram tiang ki mihai kîr nôk hrangin nuam ma ung, a tia.

¹⁸ Khasikin Pathianin mihai kha Tuipui Sen tiang panin ramchârna tiang a hruai irvêlpuihai ta; Israelhai kha Aigupta ram ata kha râl doi hrang irtûng chakin an irthok ta.

¹⁹ Mosia khan Josefa ruhai kha a chôia; Josefa’n Israel irchihai kuanga khan, “Pathianin nangni la zuang hruai a ta, ki ruhai hi, hi hmun ata hi nin ichôi hrang a ni,” tia chonginkung lei nei sai a ni.

²⁰ Israelhai khan Sukoth hmun an mâksana, ramchâr depna tiang Etham hmuna an riaka;

²¹ Rengpa khan sûn laia sûmin a hruaia, zâna chu anni invâr hrangin meichokin an mân a hruaia.

²² Sûna sûmin zâna meiin mipuihai kha a imâkhai viat loi a ni.