FESUAKNA 1 - PATHIAN LEKHABU IRTHIANG C.L. Bible (BSI)

Aigupta-haiin Israelhai dengintheitirna

¹ Hihai hi Israel nâihai Aigupta rama omhai irhming chu a ni; mi tin mâni in sûngkuahai tuangin Jakoba kuang an fea.

² Reubena, Simeona, Levi le Juda,

³ Isakara, Jebuluna, le Benjamina;

⁴ Dan le Naftalia, Gada le Asera.

⁵ Jakoba sûnga irzir murdi chu sômsari an ni. Josefa chu Aigupta rama lei om tâk a ni.

⁶ Khanchu, Josefa le a urênghai irlo khathai chu an thi zoi tâka.

⁷ Khan, Israel irchi chu an la hong pung nôk maia; an hong tam tîr tîra, an hong hrât sit sita, kha ram kha an hong bit zoi tâka.

⁸ Khanchu, Aigupta rama khan Josefa inhre loi rêng thar a hong om tâka.

⁹ Khanchu a mihai kuang khan, “Irngai roi, Israel irchihai hi eini nêkin an tama an ihrât kêng a ni ta.

¹⁰ Hiang hin lôhai ei ti: chôitum neia sinthoin dengintheitirhai ei ti: anino’nchu hong pung mai an ta, nakana irdoina a hong omin chu, ei ikhôkmâkhai tiang kop an ta, an ni doia, hi ram hi an suaksan ngânin te”, a tia.

¹¹ Khanchu Faroa ta hranga neinun hrêna in siam hrangin, Pithom le Ramases khuaa khan an siahaia, dengthei le sinrunat taka sin hrangin enkoltu an sia pehaia.

¹² Khannisianlân deng an intheihai lia an pung li liaa, an zaphai nôk maia; Israel irchihai pung dân enin a sân an char a dong pehai ta.

¹³ Aigupta mihaiin a satea sôlin sin an inzongtirhaia;

¹⁴ sin intak takhai, lungtuk le pilrôngar an insiamtirhai le loi inmân tiang khom intak taka sin inthotirin an oma. Itinrêng sinna hmun tina lungkhamna boi pitin an insintirhai a ni.

¹⁵ Khanchu Aigupta rêng khan Hebrai mi nâi suak enkol ngai, Sifraii le Puaii hai kha hiang hin a ti pehaia.

¹⁶ “Hebrai mi nâi nei thar, nâipasal an ni photin chu thatpaihai unglân, nâinupang an niin chu thathai no roi”, a tia.

¹⁷ Khannisianlân nâi kurmâhai khan Pathian an chi sikin rêng thupêk zôm loiin, nâipasalhai khom an inzôkhaia.

¹⁸ Khanchu Aigupta rêng khan nâi enkoltuhai kha a koihai nôka, “Itina mo hianga nin itho? ki thupêk zôm loiin nâipasal nin inzôktirhai”? a tia.

¹⁹ Khan, kurmâhai khan Faroa kuanga khan, “Hebrai nupang hi Aigupta nupang ang an nih no sikin a ni. Annihai hi chu an nâi nei a ola, kin tung mân an lei nei zoi ngai sika a ni”, an tia.

²⁰ Pathian an china sikin, nâi le te an hong punga, an hong tamin, an hong ihrât mai a ni.

²¹ Khanchu hiang hin kurmâhai chu Pathianin in sûngkua satakin a hong siamhai ta.

²² Khanchu Faroa’n a mihai chu hianga tho hrangin thu a pêkhaia, “Atûn ata nâipasal suak murdi chu Nail vadunga paihai unglân, khan nupang chu inzôkhai roi”, tiin.