EZRA 7 - PATHIAN LEKHABU IRTHIANG C.L. Bible (BSI)

Ezra Jerusalema a tung

¹ Khan kha irzoiin chu Persia rêng Artazerzia inlal laiin Ezra chu Babulon ata a honga; ama hi Seraia nâi a nia, ama hi Azaria nâi a nia, ama kha Hilkia nâi a ni,

² ama hi Saluma nâi a nia, ama kha Zadoka nâi a nia, ama kha Ahituba nâi a ni,

³ Ama kha Amaria nâi a nia, ama kha Azaria nâi a ni, ama kha Meraiota nâi a ni,

⁴ ama kha Zerahia nâi a ni, ama chu Uzia nâi a ni, ama kha Bukia nâi a ni,

⁵ ama kha Abisua nâi a nia, ama kha Finehasa nâi a nia, ama kha Eleazara nâi a nia, ama kha chu ochai rêng Arona nâi a ni:

⁶ Ezra chu lekha irziaktu, Rengpa Israelhai Pathian ipêk Mosia dân inhre mi tak a ni. Rengpa a Pathianin an ditna sikin a izong murdi a pêk maia.

⁷ Reng Artazerzia an lal kum sarina khan Israel irchia mi senkhat, ochai senkhat, Levi irchi senkhathai, hla sak ngai mi senkhat hai, mikot hrungtu senkhathai le Nethinim mihai chu Jerusalema an hong fea.

⁸ Khan, rêng kha kum sari an lal kum, a tha ringa nî chu Jerusalema a hong fea.

⁹ Tha khatna sûn khat niin Babulon ata a suaka, Pathian hruaina zârin tha ringana a sûn khat nî chu Jerusalem a tung ta.

¹⁰ Ezra’n Rengpa dân chu inhriata zômin le Israel hruaituhai lei inkung le roirêlhai irchûtir hrangin a lungrîla a’rvei maia.

Reng Artazerzia’n Ezra lekha a pêk

¹¹ Khan, ama hi rêng Artazerzia ochai, Ezra lekha irziaktu Rengpa thupêk thu le Israel mihai hranga thu’nkung irchû kuanga lekha thonna thu chu a ni.

¹² “Renghai rêng Artazerzia’n, ochai Ezra, irvân Pathian dân irziaktu chubai ki mûk.

¹³ Ki ram sûnga Israel mi murdi le ochaihai le Levi irchi Jerusalema mâni irzuknaa fe nuamtuhai chu ni kuanga hong hrangin thu ki pêk.

¹⁴ Pathian dân ang taka Judai ram le Jerusalem thurchi inhriat infel hrangin.

¹⁵ Jerusalema om Israel Pathian, mâni nuam lam ang taka an ipêk sum tangka le rângachak chôi hranga rêng le roirêltu sarihaiin nang an itîr a ni,

¹⁶ Babulon ram tina ni ihmu dôr tangka le rângachak, mâni phal taka mipuihai le deipuhai ipêk, Jerusalema an Pathian in hranga lômtaka an ipêk leh;

¹⁷ khasikin hi tangka hin sehrâtchal, kêlbelrachal, kêlbelrate, fâk le nêk hrang thilinhlan hrang leh irchôkin lân, Jerusalema nin Pathian ina maichâma ni inhlan hrang a ni.

¹⁸ Khan tangka le rângachak hmang banhai chu nin Pathian nuamlam angin, nang le ni urênghaiin a sa nin tihna taka hmang roi.

¹⁹ Khan ni Pathian in sin thôna hranga bungrua nang an ipêkhai chu Jerusalema Pathian kuang inhlan roh.

²⁰ Khan, ni Pathian in hranga hmang hrangin, a nangna a omin chu rêng sum ina kha hmang zel roh.

²¹ “Kei rêng Artazerzia ngêtin tui varâl tianga sum enkoltuhai chu, ‘Ochai Ezra irvân Pathian dân irziaktuin a izong murdi chu,

²² tangka talênt irzakhat, bu khom irzakhata varin, uain khom botol irzakhat, sahriak khom irzakhat, chîmu chu a zât ti ual loiin pehai zêl roi,’ tiin thu ki pêk.

²³ Irvân Pathianin thu a ipêk murdi chu, khaang takin irvân Pathian in hrangin tho ri se; ningmurna chu rêng le a nâihai ram sûnga hin itho ual mo om a ta?

²⁴ khan ochaihai, Levi irchihai, hla saktuhai, mikot hrungtuhai, Nethinim hai, ni Pathian ina sinthotuhai hi inhminhai ro, thil man omhai, irnêng manhai khom chôi ta loi hrangin nang kin hriattir.

²⁵ “Khan nang Ezra, ni inei Pathian vârna nang pêk angin tui varâl tianga omhaiin roirêl theina hrangin an hruaituhai le roirêltuhai, mi Pathian dân inhriat mi inthanghaiin lân, an hriat loihai chu irchutirhai roi.

²⁶ Khan mi tukhom ni Pathian dân le rêng dân zôm loihai chu thi thei rakin, ram ata inhnotsuakin mani; an bungrua lâkpai pehaiin mani, intângna ina omin mani, an chunga roirêlna om zôi hrang a ni,” a tia.

Ezra’n Pathian an pâk

²⁷ Jerusalema Rengpa in en inhoitir hrang rêng chu, hianga lungrîl invongtirtu le rêng le roirêltu rêng milian inlârtakhai kôla ki chunga lungkhamna insuatirtu Rengpa, kin pi le puhai Pathian chu inpâkin om ri se.

²⁸ Khan Rengpa ki Pathianin a nin rena, a nin hrâttira, khanchu a kuanga hong fepui hrangin Israel laia mi hruaitu u ualhai kin thang suakhai tâka.