EZRA 4 - PATHIAN LEKHABU IRTHIANG C.L. Bible (BSI)

Tempil sin irkalna

¹ Juda mi le Benjamina mi râlhai khan, sala intâng zôkhaiin Rengpa Israelhai Pathian biak in an sinpuihai ti an inhriatin chu.

² Jerubabela le an in sûnga a lu u ualhai kuang an va fea, an kuang, “Nangni sinpui kin ti; keini khomin nin izong ang hin, nin Pathian zong kin ti; hitaka ni hong hruaitu Assuria rêng Esarhadona an lal lai ata a kuanga kin irbôl ngai kêng,” an tia.

³ Khannisianlân Zerubabela le Jesua le Israelhai in sûnga ulianhai leh a danghaiin an kuang, “Kin Pathian in sinna hin, nin kopna hrang ite lampui om mah; Persia rêng Kura’n thu a ni ipêk ang hin keinihai vaiin kêng Rengpa Israelhai Pathian in chu kin isin pe hrang,” an tia.

⁴ Khanchu kha rama mihai khan Judahai kut an irzaltir pehaia, an inbuaihai ta.

⁵ Persia rêng Kura inlal sûng chu, Persia rêng Daria inlal dênin an sintumhai sin thei loi hrangin a hrilpui hrang irbe’n an om ta.

Jerusalem inding le hnôl thu

⁶ Khanchu Ahasuera inlal a hor phut le khan Judai le Jerusalema omhai sêlna lekha an phuaa,

⁷ khan Artazerzia inlal laiin Bislama hai, Mithredata hai, Tabeela hai le an rual danghaiin Persia rêng Artazerzia kha lekha an thona; an lekha irziak chu Aramaik chong, Aramaik horopa irziak a ni.

⁸ Hruaitu Rehuma le lekha ziaktu Simsaia’n Jerusalema mihai sêlin Persia rêng Artazerzia chu hiang hin lekha an thona:

⁹ Lekhathontu chu: Hruaitu Rehuma le lekha irziaktu Simsaia le a rualhai roirêltu danghai, ram optu Persia mihai, Elam rama om ngai Erek mihai, Babulon mi le Susa mihai;

¹⁰ mi roiinpui Asurbanipala’n suaka hruai Samaria khuaa le Eufrates tui kôla tâng tea omhai kha an ni.

¹¹ Reng Artazerzia chu hiang hin lekha an thona, “Inlaltak Artazerzia ni siahlo Eufrates tui kôla omhaiin chubai nang kin mûk.

¹² Ni kôla Juda mi ki kuanga honghai kha Jerusalema an honga; khua mi he lâkloi ngai le sualnahai an inpunga, a kul khom an pai tâka, a lungphûm chu an siam insa nôk tah ti rêngin inhre ri se.

¹³ Hi khua hi an indinga a kulhai an siam zoiin chu, omna man chôina, thil man le irnêng manhai chôi nuam no nihaia, a hnungkhôn taka chu rênghai hrangin siatna vai kêng a ini hrang ti rêngin len hre ta ri se.

¹⁴ Reng michi inliak kin nia, khasikin rênghai satloina hmu hi keini hrangin fel loitak ni a ti;

¹⁵ Khasikin ni pi le puhai thil irsinsiana irziakna lekhabu chu zongin hong hmu ni ta, hi khuaa mihai hi mi irhel le tukullian song le an rênghai le an ram ta hranga ichiom tak an nia, kumtuangin an irhela. Khasikin hi khua hin siatna a itung a ni, ti lekha thonin rêng kin inhriattir a ni.

¹⁶ Hi khua hi an indinga a kulhai a’rzoi vingin chu tui râl tianga ramhai chunga chu ite ircham nei thei ta no chi nih, ti rêng nang kin inhriattir,” an tia.

¹⁷ Khanchu inlaltak khomin hiang hin lekha a thonhaia, “Hruaitu Rehuma lekha irziaktu Simsaia le an rama rual dang Samari le Eufrates tui tâng rama omhai chubai nangni ki mûk.

¹⁸ Nin lekha hong thon kha, ki kôla fel takin an tepa.

¹⁹ Khanchu thu ki pêkhaia, hi khua hi tian ata rêng chunga hin an irhela, khasikin nuarna le buaina a om ti kin hmusuak a ni.

²⁰ Jerusalema khan rêng sin tho theihai, varâl tianga roirêltuhai tenin an lei om tâka; khanchu omna manhai, thil manhai an le’rfuang ngai a ni.

²¹ Khaang mihai kha irngamtir unglân thu kin sua mâka chu khua kha inding no ri sehai.

²² Ir-ial ta no roi: Itho ual mo rênghai hrangin thil saloi a hong ipung hrang?” a tia.

²³ Khanchu rêng Artazerzia lekha kha Rehuma le lekha irziaktu Simsaia le a rual danghai makunga an tep zoiin chu irhnot takin Jerusalema Juda omhai kuang an fea, thuneina insuain an inmâksantirhaia.

²⁴ Kha tena chu Jerusalema Pathian in an isin chu an mâksana; Persia rêng Daria inlal kum hnina dênin an imâksan a ni ta.