EZRA 1 - PATHIAN LEKHABU IRTHIANG C.L. Bible (BSI)

Reng Kura’n Judahai kîr hranga thupêk

¹ Persia rêng Kura inlal kum khatna deipu Jeremia hmanga a lei ihril tâk kha Rengpa’n an tungtir tâka. Ama thupêk, a ram pumpuihai inhriat hranga tep suak hrangin Rengpa’n Kura lungrîl an thor pea.

² “Persia rêng Kura’n hiang hin a ti, ‘Rammuala ram murdi chu Rengpa irvân Pathianin a ni pêk ta; khan Judai rama Jerusalema in sin hrangin thu a ni pêka.

³ Nin laia ama mihai murdi chunga Pathian chu om ri se; khanchu Judai ram Jerusalema fehai sian, Rengpa Israelhai Pathian, ama chu Jerusalema om Pathian in chu hong sin ri sehai; ama chu Pathian a ni.

⁴ Mi tukhom, kho hmuna khom inhnotsuaka om khom ni sian, an omna hmuna Pathian in hrangin, an nuam thua tho hrang ni loiin, sumru, le rângachak, bungruahai le sahai khom lei changpui ri sehai,’ tiin.

⁵ Khasikin, Juda le Benjamina irchi, in sûnga a lu u ualhai, ochaihai, Levi hai, Jerusalema Rengpa in hong sin hranga Pathianin an lungrîla a inthorhai chu an hong sina.

⁶ Anni lungrîl nuamlam anga ni loiin, an kôla mi tamtak sumrua siam bungrua, rângachak, sahai, le thil hlu tamtak pêkin, an changpuihaia.

⁷ Reng Kura khomin, Nebukadnezara’n Rengpa ina bungrua Jerusalem ata a lâk suaka, a pathian ina a isiahai kha a lâksuak nôka,

⁸ a isiahai kha Persia rêng Kura’n a enkoltu Mithredata kha an kêlsuatira, a tepa, Judahai hruaitu Sesbazara kuang a pêka.

⁹ Khan hihai hi a om zât chu a ni: rângachaka siam tâbor sômthum, sumrua siam tâbor sângkhat chemte sômhni kuak;

¹⁰ rângachak khilât sômthum, sumrua khilât chi da dang irzaminli sômkhat, bungrua dang sângkhat le

¹¹ Rângachak le sumrua bungrua murdi chu sângringa irzaminli a ni. Sal intânghai chu Babulon ata Jerusalema an hruaihai lai khan Sesbazara khan hihai murdi hi a hong ichôi a ni.