ESTHERI 4 - PATHIAN LEKHABU IRTHIANG C.L. Bible (BSI)

Mordekaia’n Estheri changpui hrangin a ngên

¹ An thiltho dân murdi kha Mordekaia’n an hriatin chu a puan an potthêra, bora puan a sila a lua irvut ar pola, beidong takin a chap ngûi ngûia; kha sûnga khan khua chu ar fanga,

² Reng in tual lûtna mikot chu a va tunga; bora puan sil chu tûte inlûttir phal ngai mahai sikin, rêng in tual sûnga khan lût mah.

³ Ram bial tina rêng thupêk an inpuangna hmun tina, Judahai chu an chap mur mura; bu an ngheia, mi tamtak chu bora puan silin irvut an irthua.

⁴ Mordekaia omdân chu siahlo dôngmatehai le thainuzel saihaiin Estheri chu an hong inhrila, rêngnu chu a bêi an dong tâka, bora puan khekpaia a sil hrang puan dang Mordekaia chu a pêka, lei nuam maka.

⁵ Ama enkoltu hranga rêngin thainuzel sai inkhat a inkung pe, Hathaka chu a koia, thil omzia irdon infel hrangin Mordekaia kuang a tîra.

⁶ Hathaka chu rêng in lûtna mikot tuala khan a va suaka.

⁷ Mordekaia’n thil omdân murdi chu a lei inhrila, Judahai that zit an niin chu rêng sum bakota hin Hamana’n sum tamtak thun lût hrang a tum thuhai khom a lei inhrila.

⁸ Judahai thatna hranga thupêk Susa khopuia an inpuangna lekha irziak khom Hathaka a pêka. Mordekaia’n lekha chu Estheri pe hrangin a ngêna, thil om dân murdi a hril pe zita.

⁹ Hathaka’n kha chong kha a van tungtira.

¹⁰ Estheri’n hianga thu hi Mordekaia inhril hrangin Hathaka a tîr nôka.

¹¹ “A ram sûnga mi tukhom pasal khom nupang khom, koi loia rêng in sûnga lûta, rêng va hmu chu, a sinthotuhai ngei khom, that hrang ti mi murdi’n an inhriat, rêngin a rângachak khianghrol an lek pehai vaiin a ina lût thei a ni. Sûn sômthum reng ni koi ta mah,” tiin Mordekaia chu an inhriattira.

¹² Estheri chong chu Mordekaia an hrila.

¹³ Mordekaia’n hianga hril hrangin Estheri kuang a tîr nôka, “Reng in sûnga ni om sikin nangma vai zôk ki ti, ti irsôn no roh.

¹⁴ Atûn zoro hin ni la dâihrek maiin chu hmun danga Juda omhai chu iti tin mani saninzôkin an om khomin nang le ni pa in sûng mihai chu ei ithi ngêt hrang a ni. Hiang ngîrhmuna hin rêngnua ni ichang a ini loi ma ni?” tiin

¹⁵ Estheri’n Mordekaia kuang a tîr nôka,

¹⁶ “Fe’n lân, Susa khuaa Juda om murdi koi khômin lân, ki ta hrangin a sûn a zânin bu ngheiin sûn thum sûng chongchai roi. Ki siahlo dôngmatehai leh hin keini khomin khaang khan chongchai kin ti. Kha zoia chu dân ni no khom sian rêng makunga ki thi le ki thi irhuamin, va fe ki ti,” a tia.

¹⁷ Mordekaia chu a honga, Estheri iti ang takin a va tho zit tâka.