ESTHERI 2 - PATHIAN LEKHABU IRTHIANG C.L. Bible (BSI)

Estheri rêngnu a hong chang thu

¹ Reng kha a ninginmurna a dâi hnung khomin Vasti thiltho dân le a chungchânga thupêk om chu a ngaitua maia.

² Reng sinthotuhaiin rêng kuang, “Reng ta hrangin dôngmate irthiang, hmêl satak zong ni ri se.

³ Bial tina hruaitu inkung sian, anni’n bial tina dôngmate hmêl sa zong suakhai sianlân, hi khopui Susa khuaa rêng ina hong hruai khôm ri sehai. Reng ina nupanghai omna tentan enkoltu, thainuzel Hagaia kuang honghai sianlân, irvô dân irchû ri sehai.

⁴ Khanchu dôngmate ni indit tak inthang ni ta, Vasti irthûla rêngnu’n siam ni ti,” an tia. Rengin sa a tia, khaang khan an tho tâka.

⁵ Susa khopuia khan Juda mi Zaira nâipa Mordekaia a oma, Benjamina nama Kisa nâipa Simeia irchia mi a ni.

⁶ Babulon rêng Nebukadnezara’n Jerusalem ata Judai rama rêng Jehoiakina leh mi a ichelhai sala a hruaihai lai khan Mordekaia khom hi a kop sa.

⁷ A pa tianga nu le pa murdi an thi tâk sikin an nâinu Estheri, Hebrai chonga Hadasa an iti chu, a donsui inliana, ama nâinu ang dênin a ienkol a ni, dôngmate hmêl satak a ni.

⁸ Reng thupêk an inpuang zoia chu Susa khopuia Hagaia enkol hrangin dôngmate tamtak an hong hruai zut zuta. Estheri khom rêng ina nupanghai omna tentan enkoltu, Hagaia kuang an hruai sa tâka.

⁹ Nupang hmêl satak a nia, a lei indot tak taka. a irvôna hrang chu a pêk zut zuta, fâk nêk tui tak tak a pêka, ama sinthotu hrang le ama irvôtir hrangin rêng ina dôngmate sari an thang saa. Reng ina nupang omna hmun hoi taka a siahlohai leh an omtir tâka.

¹⁰ Estheri’n tu nam mo a ini, tu in sûngkua mo a ini ite hril ma; Mordekaia’n hril loi hrangin a khap ngit sikin.

¹¹ Estheri kha imo a itho, itin mo a hong om ngai, ti inhre hrangin a nitin rêng ina nupanghai omna tentan mikota khan Mordekaia chu a fe mai ngai.

¹² Reng dôngma hrang chu irvôna zoro ringot khom kum khat a nang ngai. Tha ruk sûng chu Mura hriak an irpola; kha zoia tha ruk sûng ngêt sahriak mirimhoi chi dang dang an irpol nôk ngai. Khaanga an irvô zoia vai khan rêng kuang an ife thei ngai a ni.

¹³ Reng makunga an fe’n chu nupang omna tentan sûnga an indit tak an hruai sa ngai.

¹⁴ Zân tiang rêng makunga an hruaia, zînga rêng dôngmahai omnaa thainuzel Saazgasa kuta an sia ngai. Rengin a nuama, ar hminga a koi no’n chu rêng makunga fe nôk ta ngai mah.

¹⁵ Khanchu, Estheri chu rêng makunga fe zoro a hong tung tâka. Estheri hi Mordekaia irkaipui Abihaila nâinu a nia, ama nâinu angin a idonsui tâk a ni. Estheri chu rêng makunga fe a hong chuk tikin, nupang omna tentan enkoltu Hagaia’n a ruk tôkin a’rvotira, a hmu murdi’n a sân a hmêl a sa an tia.

¹⁶ Reng Ahasuera, kum sari an lal kum, tha sômna, Tebet tha khan Estheri chu rêng makunga an hruaia.

¹⁷ Rengin dôngmate dang danghai nêkin Estheri chu an dita, an renin lung an kham bîka, rênglukhum an khumtira, Vasti irthûla rêngnu’n a sia tâka.

¹⁸ Khan, rêng khan a rênghai le a siahlohai murdi ta hrangin, hruai roiinpui tak Estheri hruaithe kha a siam tâka, a ram puipuia mihai ta hrangin irngam nî sûn a siam tâka, rêng tikhoina ang takin lômmanhai khom a pêk saa.

Mordekaia’n rêng hringna a inzôk

¹⁹ Rengin Mordekaia chu sorkâr sin liantak an sintir tâka.

²⁰ Estheri chu Juda mi a nih ti tukhom inhril maka, Mordekaia’n tûte hril loi hranga a iti kha, a nâipangte ata a thu a izôm ngai ang khan a la zôm mai a ni.

²¹ Mordekaia chu rêng ina sorkâr sin liantak rêngin an sintir sikin rêng in mikot nghâktu thainuzel inhni Bigthana le Teresa haiin rêng Ahasuera chunga an nuara, rêng chu that an tum tâka.

²² Kha thil kha Mordekaia’n inrûkin an hriata, rêngnu Estheri chu an hrila; khanchu, Estheri’n Mordekaia irhmingin rêng an hril nôka.

²³ Thil omdân an suisuak infela, kha kha a dik a ni sikin, an ruaiin an inkhâi thathai tâka. Kha thu kha rêng irsinsiana bua an irziak inlût tâk a ni.