EFESI 6 - PATHIAN LEKHABU IRTHIANG C.L. Bible (BSI)

Nâipanghai le nu le pa

¹ Nâipanghaio, Rengpaa khan nin nu le nin pahai thu zôm roi, kha kha thil dik tak a ni.

² “Ni nu le ni pa chôiindôm roh,” ti hi thupêk laia tep masa tak a ni.

³ “Ni ta hrangin sa a ta, irnênga hin dam insôt ni ti,” ti a ni kha.

⁴ Khan, nangni pahaio, nin nâihai ninginmurtir no unglân, Rengpa irchutirnaa le isepnaa khan enkol ual roi.

Suakhai le an puhai

⁵ Suakhaio, Krista thu nin izôm angin lungrîla a sate’n chi pum le inthing pumin taksaa nin puhai thu zôm roi.

⁶ Mihriam inlômtir tumtuhai ang dêna an hmu lai ringota sin loiin Krista suak ni irhoiin lungrîl takin Pathian nuamlam tho unglân,

⁷ mihriam sintho vai ni loia Rengpa sintho nin ini ual angin raifân takin sin ngai roi.

⁸ Suak khom suakloi khom, mi tinin an thil sa tho lômman Rengpa kuang ata an hmu seng hrang a nih ti nin inhriat a ni.

⁹ Khan, nangni hruaituhaio, khaang dênin an chunga tho roi. Nin suakhai le nin Hruaitu, theibîk neiloi kha, irvâna a om ti inhre maiin irngô irhal ma roi.

Sual doina hrangin Pathian râltukfam

¹⁰ A mong taka chu Rengpa le a hrâtna ata kha sinthotheina la mai ngai roi.

¹¹ Diabola nangni inthêmna hrang nin lei khâl theina hrangin Pathian râltukfam irkipin irbel roi.

¹² Mihriam râl doi mak meh, inlalna hai le irchamneina hai, hi rammual inthim chunga roirêltuhai le irvân hmuna irtha sual omhai ei idoi ual a ni hi.

¹³ Khasikin, Pathian râltukfam irkip khan irbel unglân, nikho saloi a tung tika râl kha khâl khak thei nin ti, nin khâl zoia khom ngîr mai thei nin ti.

¹⁴ Khanchu, det takin ngîr unglân, thutaka nin kong khitin, dikna kha rôpphoa innghâk roi.

¹⁵ Irngeina Thurchi Sa inpuang hranga irsiam diamna kha kekokin bun unglân,

¹⁶ mi sualpa thal chok theihai kha nin that mai theina hrangin iamna hi phô’n hmang roi.

¹⁷ Saninhringna kha lukhuma hmang unglân; Irtha khandai, Pathian thu kha, vong roi.

¹⁸ Chongchai mai unglân, Pathian chu nin innang rikipin zong unglân, Irtha hruai ang takin, itiklai khom chongchai roi. Nin chongchainaa khan mi irthiang murdi hrangin mongloiin zong roi.

¹⁹ Thurchi Sa irthup kha kin hriat theia, hâitaka inpuangsuak hranga ki ngîr tika, Pathianin thu a ni pêk theina hrangin keima ta hrang khomin ni chongchai pe sa ngai roi.

²⁰ Atûn hin intângna ina om khom inlân, Thurchi Sa palai ki ni. Khasikin, Thurchi Sa insîrna lama khan ki hâi hrang dân taka ki hâi theina hrangin ni chongchai pe ngai roi.

Inthâna chubai

²¹ Rengpaa urêng inditom tak le sinthotu iamom tak Tukika hin ki thurchi nin inhriat theina hrangin itinrêng nangni hril a ti.

²² Ki thurchi nangni hril hrang le irtharngam nangni sak hrangin ama hi ki hong itîr a ni.

²³ Pa, Pathian le Rengpa Jisua Krista kuang ata irngeina hai, lungthungna hai le iamna hai kha urênghai kuang om ri se.

²⁴ Pathian lungkhamna kha lungthungna chuai theiloia ei Rengpa Jisua Krista lungthungtuhai kuang om ri se.