EFESI 4 - PATHIAN LEKHABU IRTHIANG C.L. Bible (BSI)

Takpum inkhat nina

¹ Khanchu, nangni a ikoina irphua om hrangin kei, Rengpa sika intâng hin, nangni ki ngên.

² Lam tinrênga irngaiintôm le thuhnuairôl takin lungthungna le tuangdiarnahai nei mai ngai roi.

³ Irngei taka om suamin Irthaa pumkhatna hi vong khak roi.

⁴ Nangni a ikoina san sabeina hmunkhat nei hranga koi nin ini angin, Takpum inkhat le Irtha inkhat vai a om.

⁵ Rengpa inkhat, iamna hmunkhat, baptisma hmunkhat,

⁶ mi murdi Pa, Pathian inkhat vai a om. Ama chu itinrêng chunga a oma, itinrêng ar fang suaka, itinrênga a om sa a ni.

⁷ Khanchu, Krista lungkhamna thilmanboi pêk chu a ruk a iti ang takin a ni ipêk seng a ni.

⁸ Pathian Lekha thua khom: “Chung tiang a kâia khan râl tamtak a imanhai kha suaka a hruaia, Mihriamhai kuang khom thilpêk a sem,” ti a ni kha.

⁹ Chung tianga kâi ti hi i tihna ma ni? Irnêng hmun irhnuai taka zuang chum masa tihna a ni.

¹⁰ Itinrêng a famirkip theina hrangin, zuang chumpu ngei kha irvân chung daiha a hong kâi nôk tâka kha a ni.

¹¹ Khanchu, “Mihriamhai kuanga thilpêkpu” kha ama hi a ni: mi senkhat chu tirtôn hrangin, senkhat chu deipu hrangin, senkhat Thurchi Sa hriltu hrangin, senkhat pastor le irchutirtu hrangin a zuang inkunga.

¹² Khaang khan, Krista takpum sin inngîrna hrangin Pathian mihai murdi Kristian sinthônaa sin an tho theina hrangin, kha kha a itho a ni.

¹³ Kha kha ei rênga iamna hmunkhat ei vonga, Pathian Nâipa inhriatna ei neia, mi puihling, Krista a ifamirkip dôra mi famirkip ei hong ni theina hrang a ni.

¹⁴ Khanchu, mihriam vârirlethaiin, an minlakna hmanga ihuanga omin, irchûna dikloi sika tuilian isok le phâivua’n hi tiang so tianga a isok le a isêm nâipang siat ang hi ni no roi.

¹⁵ Khanchu, lungthungnaa thudik insîrin itinrênga Krista tianga hong irsônlian thei ei ti, ama chu Lu a nia, Krista chu.

¹⁶ Takpumpui chu amaa a’rnghata, irthahrui le irnakin a khit hlûma, takpum om tin chu an itho ang tho chitin an irsôn inruala, lungthungna’n an irfa inlian ngai.

Om dân milui le om dân thar

¹⁷ Khanchu, hi hi kin sîr nuama, Rengpa irhmingin nangni ki hril; lungrîl mumal neiloi Jentailhai om lam angin om ta no roi.

¹⁸ An lungrîl a zîng zoia, inhriatna nei mahaia, an milung an incho tâk sikin Pathian hringna tak ata senin an om ta.

¹⁹ Inzakna lam khom inhre ta mahaia, sual porinchenaa an irpumpêka, huatirham takin thil porinche tinrêng an thoa.

²⁰ Nangni chu Krista irchutu nin nia, khaanga om sa hrang ni mak chêi.

²¹ A thu nin zôma, thutak, Kristaa om kha, irchutir nin ni tâka.

²² Khasikin, nin taksa irzukna’n a insiat tâk, nin om dân masa, mihriam milui kha, mâksan roi.

²³ Nin lungrîl le lunginchong kha inthar ni sianlân:

²⁴ thutaka suak, felna le irthiangnaa Pathian anga siam, mihriam thar khan, irbel roi.

Om dân thara om hrang dân

²⁵ Khanchu milak tho mâk unglân, Krista takpum ôn ei ni seng sikin mâni tualbômhai kuang thudik vai hril roi.

²⁶ Ninginmur khom unglân, thil sual tho no roi, misa tâk de dênin ninginmur no roi.

²⁷ Diabola kha zoro’nchum pe no roi.

²⁸ Inrûk ngai khan inru ta no ri se, mi irsam kuang pêk hrang a nei theina hrangin mâni kut ngeia sin tho’n tam ual ri se.

²⁹ Chong saloi rêng rêng hmang no roi, mi siaminsat thei vai, nin bâia suak ri se, khanchu a’rngaituhai hrangin lômom a ti.

³⁰ Pathian Irtha Irthiang kha beiindongtir no roi, irtanna ni hrangin ama ta ngei nin nizia Pathianin nangni a isinsia a ni.

³¹ Irkhôkmâkna hai, ninginmurna hai, nuarna hai hrângna hai, insirinsiatna murdi hai nangni ata pai irhmang roi, sualna murdi hnung songsan roi.

³² Lungirkham irhlômin, ir-en irhlôm unglân, Pathianin Kristaa nangni a ingaidam angin irngaidam irhlôm roi.